ރާއްޖޭގެ އެއާޕޯޓުތަކުގެ އެއާ ޓްރެފިކް ކޮންޓްރޯލާއި ކަސްޓަމްސް އާއި އިމިގްރޭޝަންގެ ހިދުމަތްތައް 100 ޕަސެންޓް ބޭރުގެ ހިއްސާ އޮންނަ ކުންފުނިތަކަށް ނުދޭން ނިންމައި، ފޮރިން އިންވެސްޓްމަންޓް ޕޮލިސީ (އެފްޑީއައި) އަށް އިސްލާހު ގެނެސްފި އެވެ.
އިކޮނޮމިކް މިނިސްޓްރީން އަލުން ގެޒެޓު ކުރި އިސްލާހުގައި ބުނެފައިވާގޮތުގައި 100 ޕަސެންޓު ބޭރުގެ ހިއްސާ އޮންނަ ކުންފުނިތަކަށް އެއާޕޯޓުތައް ހިންގޭނެ އެވެ.
މިދިޔަ އާދީއްތަ ދުވަހު އެ މިިނިސްޓްރީން އެފްޑީއައި ޕޮލިސީ އަށް ގެނައި އިސްލާހުގައި އެއާ ޓްރެފިކް ކޮންޓްރޯލާއި އެއާޕޯޓު ހިންގުން ބޭރުގެ 100 ޕަސެންޓް ހިއްސާ އޮންނަ ކުންފުނިތަކަށް ދޭން ނިންމުމުން ވަރަށް ގިނަ ބަޔަކު ވަނީ ސަރުކާރަށް ފާޑު ކިޔައިފަ އެވެ. މިކަމާ ގުޅިގެން އިކޮނޮމިކް މިނިސްޓަރު ފައްޔާޒު އިސްމާއިލް ވިދާޅުވެފައި ވަނީ އެއީ ލިޔުމުގެ ކުށެއް ކަމަށާއި އެ އިސްލާހު ބަދަލު ކުރައްވާނެ ކަމަށެވެ.
އަލުން ގެޒެޓު ކުރި އިސްލާހުގައި އެއާ ޓްރެފިކް ކޮންޓްރޯލްގެ އިތުރުން ސަރުކާރުން ފޯރުކޮށްދޭ އެހެން ބައެއް ހިދުމަތްތައް ވެސް ވަނީ އުނިކޮށްފަ އެވެ. މީގެ ތެރޭގައި ކަސްޓަމްސް ހިދުމަތާއި އިމިގްރޭޝަން އަދި އޭވިއޭޝަން ސެކިއުރިޓީގެ ސެކިއުރިޓީ ވެސް ހިމެނެ އެވެ.
އިކޮނޮމިކް މިނިސްޓްރީން މިދިޔަ އަހަރު ނެރުނު ޕޮލިސީގައި ބުނެފައިވާ ގޮތުގައި ރާއްޖޭގައި ފްރައިޓް ސާވިސްއާ އެކު އެއާ ޓްރާންސްޕޯޓުގެ ހިދުމަތް ދެވޭނީ ބޭރުގެ 75 ޕަސެންޓް ހިއްސާ އޮންނަ ކުންފުނިތަކަށެވެ. އެ ކުންފުންޏަކުން ފަސް އަހަރުގެ ދުވަހުގެ ތެރޭގައި މަދުވެގެން ފަސް މިލިއަން ޑޮލަރުގެ އިންވެސްޓްމަންޓެއް ރާއްޖޭގައި ކުރަން ޖެހޭނެ ކަމަށް ވެސް ވަނީ ބުނެފަ އެވެ.
އެއާޕޯޓް ބޭރު ބަޔަކާ ހިންގުން ހަވާލުކުރާ އިރު، ގައުމީ ސަލާމަތަށް ނުރައްކާވާ ހިދުމަތްތައް ދޫކޮށްލުމަކީ ކޮށްގެން ވާނެ ކަމެއް ނޫން ކަމަށް ތަޖުރިބާކާރުން އަންނަނީ ބުނަމުންނެވެ. ސަރުކާރުން ބުނީ، އެފަދަ ކަމެއް ނުކުރާނެ ކަމުގެ ޔަގީންކަން ދޭ ކަމަށާއި މިހާރު ހިންގަމުން އަންނަ އެއްވެސް އެއާޕޯޓެއް ހިންގުން ވެސް ބޭރުގެ ކުންފުންޏަކާ ހަވާލު ނުކުރާނެ ކަމަށެވެ. އެކަމަކު، އަލަށް އަޅާ އެއާޕޯޓްތައް ބޭރު ފަރާތްތަކަށް ދީގެން ތަރައްގީކޮށް ހިންގުމުގެ ވިސްނުން އެބަހުރި ކަމަށް ސަރުކާރުން ބުނެ އެވެ.