ދުނިޔޭގެ އެންމެ އުހުގައި ސައި ބޮއެފި

ދުނިޔޭގެ އެންމެ އުސް ފަރުބަދަ ކަމަށްވާ ނޭޕާލުގެ މައުންޓް އެވަރެސްޓްގައި "ޓީ ޕާޓީއެއް" ނުވަތަ ސައެއް ބާއްވައިފި އެވެ.

މައުންޓް އެވަރެސްޓް ބަލައިލަން ދިޔަ އެމެރިކާގެ ބަޔަކު މިދިޔަ އަހަރު އެ "ޓީ ޕާޓީ" ބޭއްވީ އެ ފަރުބަދައިގެ 21،312 ފޫޓް މަތީގަ ވެ. އެ ފަރުބަދައިގެ އުސްމިނުގައި 29،000 ފޫޓް ހުރެ އެވެ.

އެއީ ދުނިޔޭގެ އެންމެ އުހުގައި ބޭއްވި "ޓީ ޕާޓީ" ކަމަށް ނިންމައި، މި މަހު ގިނިސް ވޯލްޑް ރިކޯޑް ފޮތުން ވެސް ވަނީ ޖާގަ ހޯދައިފަ އެވެ.

އެ "ޓީ ޕާޓީ" އިންތިޒާމުކުރުމުގައި އިސްކޮށް އުޅުނު ވޮޝިންޓަންގެ ހައި އެންޑުއަރެންސް އެތުލީޓެއް ކަމަށްވާ ހިއުގް ބުނި ގޮތުގައި އެ ހިޔާލު އޭނާ އަށް ލިބުނީ ކޮވިޑް-19އާ ގުޅިގެން ލޮކްޑައުންވެ ގޭގައި ތާށިވި ދުވަސްވަރުގައި ކަމަށެވެ. ބޭރަށް ގޮސް، ތަފާތު ކަންކަން ކުރުމުގެ މުހިންމު ކަން ރަނގަޅަށް ވިސްނުނީ އެ ދުވަސްވަރުގައި ކަމަށެވެ.

އޭނާއާ އޭނާގެ ރައްޓެހިންތަކެއް ބައިވެރިވެގެން އެ ޕާޓީ ބޭއްވީ މެއި 5، 2021 ގަ އެވެ. އޭނާ އެކު އަށް މީހަކު ދިޔަ އެވެ.

އެ ސަޔަށް އެމީހުން ގެންދިޔައީ ސަޔާއި ކޮފީ އާއި ކުކީސް އެވެ.

ހިއުގްގެ ރައްޓެހިން ބުނި ގޮތުގައި، އެ މީހުން އެ ޕާޓީ ބާއްވަން މައުންޓް އެވަރެސްޓަށް ދިޔަ ތަނާ ވަރަށް ބޮޑު ތޫފާނަކާ ވެސް ކުރިމަތިލާން ޖެހުމުން އެކަން ކުރަން ވެސް ވަރަށް އުނދަގޫވި ކަމަށެވެ. އަދި ވަރަށް ފިނި ހިސާބެއް ކަމުން، ސައި ޕާޓީއަކަށް ބޭނުންވާ ސާމާނު ހަލާކުވިޔަ ނުދީ، ގެންދަން ވެސް އުނދަގޫވި ކަމަށް ބުންޏެވެ.