ތ. ފުނައްޑޫ--
22 މާޗް 2022 - 19:37
1 comments
ކުރިން މަސް ކިރުވުމުގެ ހިދުމަތް ދެމުން އައި ތ. ފުނައްޑޫ އަލުން އޮޕަރޭޝަނަށް ގެންނަށް މިފްކޯއާ ސަރުކާރުން ހަވާލުކޮށްފި އެވެ.
މިފްކޯގެ ސީއީއޯ އިސްމާއިލް ފައުޒީ "މިހާރު" އަށް ވިދާޅުވީ ފުނައްޑޫ ތަރައްގީ ކުރަން އެ ކުންފުންޏާ މަސައްކަތް ހަވާލުކުރީ މި މަހުގެ ކުރީ ކޮޅު ކަމަށެވެ. ސަރުކާރުން އެ ރަށް ހަވާލުކޮށްފައި ވަނީ ބޭންކަށް ދައްކަން ޖެހޭ އިކުއިޒިޝަން ކޯސްޓް ދެއްކުމަށް ފަހު ކަމަށް ވެސް އޭނާ ވިދާޅުވި އެވެ.
ފުނައްޑޫ ޓޫނާ ޕްރޮޑަކްޓްސް ޕްރައިވެޓް ލިމިޓެޑުން އެ ރަށުގައި ދެމުން އައި ހިދުމަތްތައް މެދުކަނޑާލަން ޖެހުނީ ބީއެމްއެލުން ނަގާފައިވާ ލޯނަކަށް އަނބުރާ ފައިސާ ނުދައްކައިގެން ބޭންކަށް އެ ރަށް ނެގުމުންނެވެ.
އިސްމާއިލް ވިދާޅުވީ އެ ރަށުގެ އޮޕަރޭޝަންތައް ހުއްޓިފައި އޮންނަތާ ގިނަ ދުވަސްތަކެއްވުމުގެ ސަބަބުން މުޅި ރަށް ވީރާނާވެފައިވާ ކަމަށެވެ. އެހެންވެ، އަލުން އޮޕަރޭޝަނަށް ގެންނައިރު ބޮޑު މަރާމާތެއް ކުރަން ޖެހޭ ކަމަށް އޭނާ ވިދާޅުވި އެވެ.
"މިހާރު ރަށުގެ އެސެސްމަންޓެއް ހެދީ. ބައިވަރު ކަންކަން އެބަހުރި ކުރަން. ބަނދަރު ވެސް ހަދަން ޖެހޭ މަސްވެރިންނަށް ހިދުމަތް ދިނުމުގެ ކުރިން،" އިސްމާއިލް ވިދާޅުވި އެވެ.
ބަނދަރު ހެދުމުގެ އިތުރުން އެ ރަށުގެ ބްލާސްޓް ފްރީޒާ ވެސް މަރާމާތު ކުރަން ޖެހެ އެވެ.
އިސްމާއިލް ވިދާޅުވީ ފައިސާގެ ތާށިވުމެއް ނެތް ނަމަ 10 މަސް ދުވަހުގެ ތެރޭގައި މަސައްކަތް ނިންމާލެވޭނެ ކަމަށެވެ. އެ ރަށް ހިންގާނީ ހަރަދު ކުޑަކުރެވޭ މެކޭނިޒަމެއްގެ ދަށުން ކަމަށް ވެސް އޭނާ ވިދާޅުވި އެވެ.
މިފްކޯއިން ވެސް ފުނައްޑޫ އަލުން އޮޕަރޭޝަނަށް ގެންނައިރު ދޭނީ މަސް ކިރުވުމުގެ ހިދުމަތެވެ. ނަމަވެސް ހިދުމަތްތައް ދާ ގޮތަށް ބަލައި ހިދުމަތް ފުޅާ ކުރަން ވެސް އެ ކުންފުނިން ވަނީ ނިންމައިފަ އެވެ.
އިތުރު ލިޔުންތައް
މަގްބޫލް ލިޔުންތައް
Mihaaru Print Edition
Download Mihaaru News App
Offline Alerts
SMS 'sub mihaaru' to 5454
ކޮމެންޓްތައް
މާމިގިލިސޮރު
23 March 2022
ދައުލަތުގެ ރަށެއްގައި އަމިއްލަ ބަޔަކު ކުރި މަސައްކަތަކަށް ބޭންކުން ނަގާފައިވާ ލޯނަށް ފައިސާ ނުދައްކާ ހުއްޓާ ދައުލަތުން އަލުން ރަށް މި ނަގަނީ ބޭންކަށް އެއްކަލަ ޕްރައިވެޓް ކުންފުނިން ދައްކަންޖެހޭ ފައިސާ ދައްކާފައި.. ދައުލަތުގެ މުދަލެއް އަމިއްލަ މީހެއްގެ އަތުން ދައުލަތުން އަލުން ގަންނަނީ.. މި ކޮރަޕްޝަނަށް ނުވާނީ ހަމައެކަނި ޒީރޯ ޓޮަލަރެންސްގަ.