އެފްއެސްއެމްގެ ޕެޓްރޯލް ޝެޑަކުން ސައިކަލަކަށް ޕެޓްރޯލް އަޅަނީ-- ފޮޓޯ: ފަޔާޒު މޫސާ/މިހާރު
29 މާޗް 2022 - 10:39
6 comments
ހުޅުމާލޭގައި އެސްއެފްއެމުން ހިންގާ ޕެޓްރޯލް ޝެޑާއި ލޯންޗުތަކާއި ދޯނިފަހަރަށް ތެޔޮ އެޅުމަށް ހާއްސަ ކޮށްފައިވާ ޕަމްޕް ސްޓޭޝަން 24 ގަޑިއިރު ހުޅުވަން ނިންމައިފި އެވެ.
އެ ކުންފުނީގެ މެނޭޖިން ޑިރެކްޓަރު މުހައްމަދު ގަސަމް "މިހާރު" އަށް މިއަދު ވިދާޅުވީ ހުޅުމާލޭގެ ދެވަނަ ފިޔަވަހީގައި މީހުން ދިރިއުޅެން ފެށި ފަހުން އެފްއެސްއެމްގެ "އީޒީ ފިއުލް 3" އިން ހިދުމަތް ހޯދާ މީހުންގެ އަދަދު އިތުރު ވެފައިވާ ކަމަށެވެ. އެހެންވެ، ހުޅުމާލޭގައި ދިރިއުޅޭ މީހުންނަށް ފަސޭހަކަމާއެކު ހިދުމަތް ހޯދޭނެ ގޮތަށް 24 ގަޑިއަރަށް ޕެޓްރޯލް ޝެޑް ހުޅުވަން މެނޭޖްމަންޓުން ނިންމީ ކަމަށް އޭނާ ވިދާޅުވި އެވެ.
ގަސަމް ވިދާޅުވިގޮތުގައި ޕެޓްރޯލް ޝެޑް 24 ގަޑިއިރަށް ހުޅުވަން ފަށާނީ ރޯދަ މަހުގެ ފުރަތަމަ ދުވަހުން ފެށިގެންނެވެ.
"ދެވަނަ ފިޔަވަހީގައި މީހުން ދިރިއުޅެން ފެށި ފަހުން ޕެޓްރޯލް ޝެޑްގެ ކިޔޫ ވެސް ދިގު. އެހެންވެ އަޅުގަނޑުމެންގެ މެނޭޖްމަންޓުން ވިސްނީ މާލޭގައި ހުންނަ ގޮތަށް ހުޅުމާލޭގައި ވެސް 24 ގަޑިއިރު ހިދުމަތް ދޭ ތަނެއް ހުންނަން ވާނެއޭ. މި ގޮތަށް ނިންމީ ވަރަށް ބޮޑަށް މޮނިޓަ ކުރުމަށް ފަހު އެ ބަދަލު ގެންނަން ޖެހޭކަން އެނގުމުން،" ގަސަމް ވިދާޅުވި އެވެ.
"ރޯދަ މަހަކީ އެހެން މަސްތަކަށް ވުރެ ދުއްވާ އެއްޗެހި ގިނައިން ބޭނުން ކުރާ މައްސަރެއް. އެހެންވީމާ މި ހިދުމަތް ފަށަން މި މަސް އަޅުގަނޑުމެން ހިޔާރު ކުރީ. ރޯދައިގެ ފަހުން ވެސް ދެން އަބަދުވެސް އެ ތަނުން ހިދުމަތް ދޭނީ 24 ގަޑިއިރަށް."
ޕެޓްރޯލް ޝެޑްގެ އިތުރުން ހުޅުމާލޭގައި އެފްއެސްއެމުން ލޯންޗުތަކަށް ތެޔޮ ފޯރުކޮށްދޭ ޕަމްޕް ސްޓޭޝަނެއް ވެސް ހިންގަ އެވެ. އެ ސްޓޭޝަން ވެސް ރޯދަ މަހުން ފެށިގެން 24 ގަޑިއިރަށް ހުޅުވާލާނެ ކަމަށް ގަސަމް ވިދާޅުވި އެވެ.
"ލޯންޗު ފަހަރުތަކަށް ވެސް މިހާރަށް ވުރެ ފަސޭހަ ވާނެ މި ގެންނަ ބަދަލާއެކު. ރިސޯޓުތަކުގެ ލޯންޗުތައް ވެސް ތެޔޮ އަޅަން އަންނައިރު ފަތިހު ވިޔަސް ދަންވަރު ވިޔަސް އެ ހިދުމަތް ލިބެންޏާ ވަރަށް ބޮޑު ލުޔަކަށް ވާނެ،" އޭނާ ވިދާޅުވި އެވެ.
އެފްއެސްއެމް މާލޭގެ "އީޒީ ފިއުލް-1" އާއި ހުޅުމާލެ "އީޒީ ފިއުލް-3" 24 ގަޑިއިރު ހުޅުވި ނަމަވެސް ރޯދަމަހުގެ ހަވީރު 5:00 އިން ރޭގަނޑު 8:30 އާ ހަމައަށް ބަންދުވާނެ އެވެ. އެއީ މުވައްޒަފުންނަށް އާއިލާއާއެކު ރޯދަވީއްލާ ވަގުތު ދިނުމަށާއި ތަރާވީސް ނަމާދު ކުރުމުގެ ފުރުސަތު ފަހިކޮށްދޭން ގެނައި ބަދަލެއް ކަމަށް އެމްޑީ ވިދާޅުވި އެވެ.
މާލޭގެ ޕެޓްރޯލް ޝެޑުން މިހާރު ވެސް ހިދުމަތް ދޭ ގޮތަށް ކޮންމެ ހުކުރު ދުވަހެއްގެ ހެނދުނު 10:00 އިން މެންދުރު 2:30 އަށް ޝެޑްތައް ބަންދުވާނެ އެވެ.
އިތުރު ލިޔުންތައް
މަގްބޫލް ލިޔުންތައް
Mihaaru Print Edition
Download Mihaaru News App
Offline Alerts
SMS 'sub mihaaru' to 5454
ކޮމެންޓްތައް
އޮނަރަބްލް އަފީފު ދީދީ
29 March 2022
ނިންމުން ގޯހެއްނޫން. ތިތަނުން ފައިސާ ކެޑުމާއި ހިދުމަތް އަވަސް ކުރުމަށްޓަކާ ތެޔޮއަޅާ ނިމިގެން ފައިސާ ދެއްކުމުގެ ބަދަލުގައި "ތެޔޮ ކޫޕަނަށް" ނުވަތަ ކިއޫގައި ތިބެގެން ލާރިދައްކާފައި ފިއުލް ޕަމްޕަށް ދިއުމުން ތެޔޮއެޅޭގޮތަށް އިންތިޒާމް ކުރައްވާ. # އަދި ބޭނުންވަރަކަށް ތެޔޮއެޅުމުގެ ބަދަލުގައި 4 ލިޓަރު 6 ލިޓަރ 8 ލިޓަރ ނުވަތަ 15 އަދި 30 ލިޓަރ މިފަދަ ގޮތަކަށް މިތަނުން ބޭނުންވާ ވަރެއްގެ ޓިކެޓެއް ގަނެގެން ތެޔޮ އަޅާގޮތަށް ހެދީމަ ވައްކަން ކުރަންވެސް ދަތިވާނެ.
ޝާފިއު ޖަމީލް / ރަންހަދާގެ / ސ.ހިތަދޫ
29 March 2022
މިވަގުތު އޮތް ރެޖީމުން ވައްކަން ކުރޭތަ؟ ދީދީ ތިވިދާޅުވާއެއްޗެއް ސާފެއް ނޫން.
2222
29 March 2022
ޕެޓްރޯލް އަގު ބޮޑުވާނެ ދޯ
ހުނައިން
29 March 2022
ކޮބާހޭ ސެލްފް ސަރވިސް ޝެޑްތައް ހުޅުވަން ބުނި. މިހާރު ކުދިން މިކަމާ އުޅެބަލަ.
ކުޑަކަތީބު
29 March 2022
މި ނޫނީ ނުދެކެން ކެޕިޓަލް ސިޓީއެއް 24 ގަޑިއިރު ޒަރޫރީ ހިދުމަތް ނުލިބޭ އަދި އެކަމަށް ދެކޮޅު ހަދާ ބަޔަކު އުޅޭ ގައުމެއް، މި ކަމާ ދެކޮޅު ހަދާ މީހުން މި ކިޔަނީ ތަރައްގީ ގައުމުތަކުގެ ނުހުރޭ 24 ގަޑިއިރު ފިހާރަތަކެއް، މި ފަދަ މީހުންނަކީ އެންމެ ގިނައިން ލަންކާއާއި އިންޑިޔާގެ ޓްރިވެންޑުރަމް ނޫން ތަނެއް ނުފެންނަ މީހުން. މި މީހުންނަށް ނުފެނޭ މެލޭޝިޔާ، ތައިލެންޑު، އިންޑޮނޭޝިޔާ، އޮސްޓްރޭލިޔާ، އެމެރިކާ، ޔޫރަޕް، ތުރުކީ، ދުބާއީ އެއް ހުވަފެނުން ވެސް
ހަބީމް
29 March 2022
މާލަސްވެއްޖެ..ޕެޓްރޯލް ކިޔޫތައް ކުޑަވާނެ ގޮތްތައް ހަދަން ޖެހޭ އަވަހަށް