އެމެރިކާގައި އަމިއްލަ ފަރާތަކުން ހިންގާ ޖައްވީ ކުންފުންޏަކުން، ޖައްވުގައި ހަދަން އުޅޭ ޓޫރިސްޓް ހޮޓަލެއް 2025 ގައި ހުޅުވަން ނިންމައިފި އެވެ.
އޯބިޓަލް އެސެމްބްލީ ކިޔާ އެ ކުންފުނިން މިހާރު ވަނީ އެ ހޮޓަލުގެ ކޮންސެޕްޓް ޑިޒައިން އާންމުކޮށްފަ އެވެ.
އެ ކުންފުނިން ރާވާފައި ވަނީ ޖައްވުގައި ދެ ހޮޓަލެއް ހުޅުވުމަށެވެ. ފުރަތަމަ ރޭވި ހޮޓެލް "ވޮޔޭޖާ ސްޓޭޝަން" ގައި 400 މީހުންގެ ޖާގަ އޮންނާނެ އެވެ. އެ ހޮޓެލް ހުޅުވަން ނިންމާފައި ވަނީ 2027 ގަ އެވެ. އޭގެ ކުރިން 28 މީހުންގެ ޖާގައިގެ ހޮޓަލް "ޕަޔޮނިއާ ސްޓޭޝަން" ހުޅުވަނީ 2025 ގަ އެވެ.
އެ ކުންފުނިން ބޭނުންވަނީ ސްޕޭސް ޓޫރިޒަމްގައި ކުރިއަށް ދާށެވެ.
"ޕަޔޮނިއާ ސްޓޭޝަން" ގައި ކުއްޔަށް ދޫކުރާ އޮފީސް ބަޔަކާއި ރިސާޗު ފެސިލިޓީއެއް ވެސް ހުންނާނެ ކަމަށް އެ ކުންފުނިން ބުންޏެވެ.
އެ ހޮޓެލްތަކުގެ ކޮންސެޕްޓް ޑިޒައިނުން ފެންނަ ގޮތުގައި އެ ސްޓޭޝަންތައް ވައްތަރީ ފުރޮޅަކާ އެވެ. އޭގެ އެތެރޭގެ ޑިޒައިން ހުރީ އާންމުކޮށް ލަގްޒަރީ ހޮޓެލްތައް ހުންނަ ސްޓައިލަށެވެ. އަދި އެ ހޮޓެލްގެ ވިއު އަކީ ދުނިޔެ އެވެ.
އެ ކޮންސެޕްޓް ހެދީ ރޮކެޓް ޓެކްނޮލޮޖީގެ ރޮނގުން އެންމެ ފުރަތަމަ އުފެދުނު މާހިރުންގެ ތެރޭގައި ހިމެނޭ ކުރީގެ އެއިރޯސްޕޭސް އިންޖީނިއަރެއް ކަމަށްވާ ވަންހަ ވޮން ބަރުންގެ މަސައްކަތުން އިސްޕަޔާވެގެން ކަމަށް ބުންޏެވެ. އޭނާ އަކީ ޖަރުމަނުގައި ނާޒީންގެ ބާރު އޮތް ދުވަސްވަރު އެމީހުންނަށް ރޮކެޓް ހަދައިދިން މީހެކެވެ.
އެ ހޮޓަލަށް ދާ މީހުންގެ އަތުން ދާނެ ހަރަދެއް އަދި އިއުލާންނުކުރެ އެވެ.
ސްޕޭސް ޓޫރިޒަމްގެ ވާދަވެރިކަން މިހާރު އަންނަނީ ބޮޑުވަމުންނެވެ. މަޝްހޫރު މަހުޖަނުން ކަމަށްވާ ޖެޕް ބޭޒޯސްގެ ބްލޫ އޮރިޖިން އާއި އީލޮން މަސްކްގެ ސްޕޭސް އެކްސް މިހާރު ވަނީ އެ ވިޔަފާރީގެ ތެރެއަށް ވަދެފަ އެވެ.