އެސްޓީއޯ އިން ވިއްކާ ދަގަނޑުގެ އަގު ހެޔޮކޮށްފި އެވެ.
އެ ކުންފުނިން ބުނީ މިއަދުން ފެށިގެން އެސްޓީއޯ ކޮންސްޓްރަކްޝަން ސޮލިއުޝަނުން ވިއްކަމުންދާ ދަގަނޑުގެ އަގު ހެޔޮކުރަން ނިންމާފައިވާ ކަމަށެވެ.
އެ ކުންފުނިން ވިއްކާ ދަގަނޑުގެ ބާވަތްތަކުން 14 ޕަސެންޓާ ހަމައަށް އަގުތަށް ވަނީ ދަށްކޮށްްފަ އެވެ.
ފާއިތުވި އަހަރުތަކުގައި ކޮވިޑާ ގުޅިގެން ދުނިޔޭގެ އިގްތިސޯދަށް އައި ލޮޅުމުގެ ސަބަބުން ތަކެތީގެ އަގު އުފުލުނުއިރު، ކޮންސްޓްރަކްޝަން މަސައްކަތުގައި ބޭނުންކުރާ ތަކެތީގެ އަގާއި، ދަގަނޑު އަގުތަކަށް ވަނީ ބޮޑެތި ބަދަލުތަކެއް އައިސްފަ އެވެ.
އެ ދުވަސްވަރުގައި ވެސް ރާއްޖޭގެ މާކެޓުގައި އެފަދަ ތަކެތީގެ އަގުތައް ކޮންޓްރޯލްކޮށް، އެންމެ ކުޑަ އަގެއްގައި މުދާ ފޯރުކޮށްދޭން މަސައްކަތް ކޮށްފައި ވާނެ ކަމަށް އެ ކުންފުނިން ބުންޏެވެ.
ސަޕްލައި ޗެއިންއަށް ދިމާވެފައިވާ ދަތިތަކުން އަރައިގަންނަމުން އަންނަ މިދުވަސްވަރު، އިމާރާތް ކުރުމުގައި ބޭނުން ކުރާ އެހެނިހެން ސާމާނުތަކުގެ އަގުތަކަށް ވެސް ހެޔޮ ބަދަލެއް އަންނާނެ ކަމަށް އެސްޓީއޯއިން މައުލޫމާތު ދެއެވެ.