ބ. ކިހާދޫގައި ކުނި މެނޭޖުކުރާ އިކޯ ސެންޓަރުގައި ބޭއްވި މެންދުރުގެ ކެއުން -- ފޮޓޯ: ސޮނެވާ ނަމޫނާ
07 ޑިސެމްބަރ 2022 - 12:35
15 comments
މި ރަށު މީހުން މިތަނަށް ކުނިކޮއްޓެކޭ ނުކިޔަ އެވެ. މިއީ ބ. ކިހާދޫ މީހުންގެ އިކޯ ސެންޓަރެވެ. ކުނި މެނޭޖުކުރާ މި ސެންޓަރުގައި ކެއުންތަކާއި ހަފުލާތައް ބާއްވަ އެވެ. މި ދަތުރުގައި އަހަރެމެންގެ މެންދުރުގެ ކެއުން ވެސް އޮތީ މިތަނުގަ އެވެ.
މިތަނުން އެއްވެސް ނުބައި ވަހެއް ނުދުވަ އެވެ. ދިމާލެއްގައި މެއްސެއް އެނބުރޭތަން ވެސް ނުފެނެ އެވެ. އެހާވެސް ސާފުތާހިރެވެ.
ބ. ކިހާދޫގައި ކުނި މެނޭޖުކުރާ އިކޯ ސެންޓަރުގައި މެންދުރުގެ ކެއުން ތައްޔާރުކޮށްފައި -- ފޮޓޯ: މިހާރު
"ސޮނެވާ ނަމޫނާ"އާ ގުޅިގެން ކިހާދޫގައި ކުނި މެނޭޖުކުރަމުން އަންނަގޮތް ބަލައިލުމަށް މިނިސްޓަރުންނާއި ސަރުކާރުގެ އެހެން ބައެއް އިސްވެރިން، މިދިޔަ ހޮނިހިރު ދުވަހު މި ރަށަށް ކުރެއްވި ޒިޔާރަތުގައި އެ ބޭފުޅުން ވެސް، މެންދުރުގެ ކެއުމަށް އިންސާފުކުރެއްވީ މި ސެންޓަރުގަ އެވެ.
ކެއުމަށްފަހު ބޭއްވި ފޯރަމެއްގައި ޓޫރިޒަމް މިނިސްޓަރު އަބްދުﷲ މައުސޫމް ވެސް ވިދާޅުވީ މި ރަށުން ލިބިވަޑައިގަތް އެންމެ ބޮޑު ހައިރާންކަމަކީ މިއީ ކަމަށެވެ. މިވަރުގެ ކަމެއް އަދި އެއްވެސް ރަށަކުން ފެނިވަޑައިގެންފައި ނެތް ކަމަށް އޭނާ ވިދާޅުވި އެވެ.
ބ. ކިހާދޫގައި ކުނި މެނޭޖުކުރާ އިކޯ ސެންޓަރުގައި ބޭއްވި މެންދުރުގެ ކެއުމުގައި ޓޫރިޒަމް މިނިސްޓަރު އަބްދުﷲ މައުސޫމް އާއި ތިމާވެއްްޓާ ބެހޭ މިނިސްޓަރ އާމިނަތު ޝައުނާ -- ފޮޓޯ: މިހާރު
"ދުވަހަކު ވެސް ހިތަކަށް ނާރާ އެ ކަހަލަ ތަނެއްގައި [ކުނި މެނޭޖުކުރާ ސެންޓަރެއްގައި] ކާން ތިބެވިދާނެއެކޭ،" މިނިސްޓަރު ވިދާޅުވި އެވެ.
މި ސެންޓަރަށް ކުނިވާ ޒާތުގެ އެއްވެސް ކުންޏެއް ނުގެނެ އެވެ. އާންމުކޮށް ގެންނަނީ ފާޑުފާޑުގެ ޕްލާސްޓިކާއި ލަކުޑި އާއި ކަރުދާހާއި ބިއްލޫރި އާއި އަދިވެސް ކުނި ނުވާ އެކި ޒާތުގެ ކުންޏެވެ.
ބ. ކިހާދޫގައި ކުނި މެނޭޖުކުރާ އިކޯ ސެންޓަރުގައި ބޭއްވި މެންދުރުގެ ކެއުމުގައި ސަރުކާރުގެ ބައެއް އިސްވެރިންނާއި ރަށްރަށުގެ ކައުންސިލުތަކާއި ސޮނެވާ ނަމޫނާގެ އޮފިޝަލުން -- ފޮޓޯ: މިހާރު
ކިހާދޫ އިކޯ ސެންޓަރުގެ ސުޕަވައިޒަރު މުހައްމަދު ނަދީމް ބުނި ގޮތުގައި މި ސެންޓަރަކީ މިހާރު މި ރަށު މީހުން ފޫހިފިލުވާލަން ވެސް އަންނަ ތަނެކެވެ. ރަށުގެ އެކި އިވެންޓްތައް ވެސް ބާއްވާ މިތަނުގައި ކޮންމެ ގަޑިއަކު ކޮފީ ލިބެން ވެސް ހުރެ އެވެ. ކޮފީ ބޯން ތިބެން ހާއްސަ ކޮފީ ކޯނާއެއް ވެސް ހަދައިފައި އެބަހުއްޓެވެ.
"މިތަނަށް އަހަރެމެން ކުނިކޮއްޓޭ ވެސް ނުކިޔަނީ އެހެންވެ. ކުނިކޮއްޓޭ ބުނީމަ މީހުންގެ ބޮލަށް ސިފަވަނީ ވަރަށް ނުތާހިރު، ހަޑިތަނެއްގެ ގޮތުގައި. އެކަމަކު މިތަނަށް ބަލައިލިޔަސް އެނގޭނެ މިއީ 'ކުނިކޮއްޓެއް' ނޫންކަން،" އޭނާ ބުންޏެވެ.
ބ. ކިހާދޫގައި ކުނި މެނޭޖުކުރާ އިކޯ ސެންޓަރު -- ފޮޓޯ: މިހާރު
"އަބަދުވެސް މިތަން އޮންނާނީ މިހެން މިހާ ސާފުކޮށް."
ގޭގައި އުފެދޭ ކުނިވާ ޒާތުގެ ކުނި މެނޭޖުކުރަން މި ރަށުގައި، ކޮންމެ ގެއެއްގައި ވެސް ހާއްސަ އިންތިޒާމެއް ހަމަޖައްސާފައި އޮވެ އެވެ. އެކަމަށް ބޭނުންކުރަނީ "ޓަކަކުރާ ހޯމް ކޮމްޕޯސްޓިން" ކިޔާ ހާއްސަ މެތަޑެކެވެ. މި މެތަޑު ބޭނުންކޮށްގެން ގޭގޭގައި، ކައިފައި ބާކީވާ އެއްޗެހި ގަސްކާނާއަށް ބަދަލުކޮށްލަނީ، ގޭގެ ގޯތިތެރޭގައި އެ ބަހައްޓައިގެންނެވެ.
ބ. ކިހާދޫގައި ގޭގޭގައި އުފެދޭ ކުނިވާ ޒާތުގެ ކުނި، ހާއްސަ މެތަޑެއް ބޭނުންކޮށްގެން ގަސްކާނާއަށް ބަދަލުކުރަނީ މި ފޮތި ކޮތަޅަށް އަޅައިގެން -- ފޮޓޯ: މިހާރު
ކިހާދޫގެ އިކޯ ސެންޓަރުން ފެންނަ މި "ނަމޫނާ"އާ އެއްގޮތަށް، ސޮނެވާ ނަމޫނާގައި ހިމެނޭ 11 ރަށުގެ ކުނި މެނޭޖުކުރާ ސެންޓަރުތައް ވެސް ބަދަލުކޮށްލުމަކީ އެ ރަށްރަށުގެ ކައުންސިލުތަކުގެ އަމާޒެކެވެ.
އިތުރު ލިޔުންތައް
މަގްބޫލް ލިޔުންތައް
Mihaaru Print Edition
Download Mihaaru News App
Offline Alerts
SMS 'sub mihaaru' to 5454
ކޮމެންޓްތައް
ރަގަޅުވާނެ
08 December 2022
ޔާމީނަށް ސަޕޯޓްކުރާ މީހަކު ކެއްކި އެއްޗެހި ނޫނިއްޔާ ތި މެންދުރުގެ ކެއުމުގަ ޖެހޭނެ އެއްވެސް މައްސަލައެއް ނޯންނާނެ.
ޒްއާމުންސ
08 December 2022
މިކަމުގައި ފައްޒަ އަދި ބާބިއަށް ޝުކުރު ދަންނަވަން. އެކަމު ދެރަވަރީ ކައުންސިލުން ދެންހުރި ހުރިހާކަމެއް ހަނދާންނައްތާލާފަ މަންޖެ ފަހަތުން އަބަދު އުޅުން. އެހެން ކަންކަންވެސް ކުރަންވާނެ. 5 މީހުން ހޮވާފަތިބޭނެ ތިތަނަށް. ހަމަ ނަމޫނާ އެއް މީ ކުނި މެނޭޖްކުރުމުގައި. ބައެއްގޭގޭ ކުދިންނަށް ކުދި ވަކުރަން އުދަގުލީ! ކަންނެއް މީހުންނާއިދެގެން އުޅޭއަދިވެސް.
ރާއިދާމުރަލީ
08 December 2022
ކުނި މެނޭޖްކުރުމަކީ ގާނޫނުން ކައުންސިލްތަށް މަތިކޮށްފައި އޮންނަ ކަމެއް. ކިހާދޫ މިދަނީ ނަމޫނާ ދައްކަމުން. މިކަން ހަޖަމްނުވާ މީހުންވެސް އުޅޭ. ސޮނެވާއިން މިކަމަށް ކޮށްދޭ މަސައްކަތްތަކަށް ޝުކުރުކުރުމުގެ ބަދަލުގައި ފުރައްސާރަކޮށް ހެދުމެއްނޫން އޮތީ. ޒަމާނީ ފެންވަރުގެ އިކޯސެންޓްރޯއެއް ހަދާދީފި. 30،000 ރުފިޔާދައްކައިގެން ދޯނި ހިފައިގެން ކުނިބޭރުކޮށްދޭ. ޓެކްނިކަލް ހުރިހާ އެހީއެއްވެދޭ! ކައުންސިލުން މުސަރަދޭންޖެހޭނެތާ ކައުންސިލުން ކުރަންޖޭޙޭކަމެއްވިއްޔާ!
އެކަޑެމީ
07 December 2022
ކުނި މެނޭޖުކުރުން މީ ކިހިނެތް ކުރާކަމެއް ސާފެއްނުވި.. މެނޭޖުކުރުމަށް ދިވެހި ބަހެއް ނެތީތޯ.. ރަސްމީ ލިޔެކިޔުމްތަކަށްވެސް މިބަސް މިހާރު ވަދެފި
މެނޭޖުކުރުން
09 December 2022
ގަލަމާއި އަލަމާރި، ބޯކިބާ ދިވެހި ލަފުޒުތަކަކަށް ވީ ފަދައިން މެނޭޖުކުރުން މިއީ ވެސް ދިވެހި ލަފުޒެއް.
ޝެލަރީ
07 December 2022
ވިސްނާލުން ބުއްދިވެރި ރަށުކައުންސިލްއިން މުސާރަދެނީ ހުރިހާމަސައްކަތެއްކުރުމައް މުއައްޒިފުންގެމުސާރަ ކޮންމެމަހަކު ސާރުކާރުން މިވެރީންގެ ކަމަކީ މުދާ ކޮޅު އެއކުސްޕޯޓްކޮށްލައިގެން ލާރިކޮޅުކާލުން ތީސީދާ ކޮރަޕްޓް ދިވެހީންފެލުން ކިހާދޫ، ދަރަވަންދޫ މާޅޮސް ދެން ބާއަތޮޅުހުރިހާ ރަށެއް ހަންފަތުރަނީ މިޢޮއްގެން ތީ ތިންރުއް އިންދާފަ ސީއެސްއާރ ކިޔާޕާޓީ
ފަގުޑި
07 December 2022
މިސަރުކާރުގަ އުޅޭ އެންމެންވެސް އުޅެނީ މިކަހަލަ ދިއުޅިއެއްނުވާ ތާކުންތާކުނުޖެހޭ ޑްރާމާ ކުޅެންށާއި، ސްޓަންޓު ހެދުމުގަ.
ޑެބީ
08 December 2022
ޔާނުގެ ބޯއީސްއަށް ކެތެއް ނުވާނެ މިކަހަލަ ސަޅިކަންތައް ފެނުނީމަ.
ލަކުޑިކަޅޭ
07 December 2022
ހޫހޫ ބޭކާރުއަނގަނުތަޅާ ރަނގަޅައް ބަނޑުއަޅާލައިގެން ނުކުމެވޭތޯބަލާ
ކޮށްބަލަ
07 December 2022
ކިހާދޫ މީހުން ތިކަން ކުރާގޮތް ބަލާފައި މާލެގޮސް ގޭގައި ދެފައިދަމާލައިގެން ނިދާ އަރާމުކޮށްފައި ޕާޓީ ހިންގާފައި ގޮސް ދައުލަތުގެ ފައިސާއިން މުސާރަ ކާލަ ކައިލާ ތިބީމާ ފޮނި ކެނޑުމަކީ ތިކުރާ ކަމެއްގެ ނަފާ ރައްޔިތަކަށް ލިބޭނެ ކަމެއްނޫން. ނިކަން ތިކަން ކުރާގޮތް ޤައުމުގެ އެންމެންނަށް ދަސްކޮށްދީ ބޮޑު ޕްރޮގުރާމެއް ހިންގަދީބަލަ. މިހެންބުނީމާ އެގްޒިމް ބޭންކުން ލޯނުނަގައިގެން ދަރަނި ބޮޑުކުރަން ބޮޑު ޕްރޮޖެކްޓެއް ހިންގާނީއެއްނޫން. އެކަމަކީ ބޮޑު ބިރެއް.
ޝެލަރީ
07 December 2022
މީ ސްނެވާއިން ކުރާބޮޑު ވިޔަފާރިއެއް ކުނިކޮށީން އެތައް މިލިޔަނެއް އަހަރަކު ނަގާނެ ދަގަނޑު ދަޅު ބައްލޫރި ޕުލާސްޓިކް އެކުސްޕޯޓް ކޮށްގެން
ކިނިކޮށި
07 December 2022
ތި ބުނިގޮތުން ހީވަނީ ބަޔަކުމީހުން ރަނގަޅަށް ކަމެއްކޮށްކޮށް ތިއްބާ އެތަނަށް ސޮނެވާ ވަދެ ލާރިގަނޑު ކަޓުވަނީހެން. ރަށްރަށުގެ ކުނިމެނޭޖް ކުރާނެގޮތެއް ނެތިތިއްބާ އެމީހުން އެކަންކަން ހައްލުކޮށްދިނީ. އެމީހުން އެކަން ކޮށްގެން ބިލިއަނުން ނެގިއަސް ކޮބާތަ މައްސަލައަކީ؟ އެނޫންވެސް ބޮޑެތި ރިސޯޓްތަށް އެބައޮތް. އެމީހުން އުޅެނީ ކަނޑަށް ކުނި ނޭޅިގެން. ތިބޭޅާތީ އެކަހަލަ ވިސްނުމެއްގަ އުޅޭކަހަލަ ބޭފުޅެއްހެން ހީވޭ
ާއަލީ ޝަފީގް
07 December 2022
މީހަމަ ބޮޑު ދޮގެ އެމީހުން ކުރާ ހަރަދުގެ 1 ޕަސެންޓްވެސް ނުލިބޭނެ ތިޔަބުނާ ދަނގަޑު ވިއްކައިގެން ކަންކަން މުގެ ހަގީގަތް ނުބަލާ ކޮމެންޓް ކުރުމަކީ އެންމެ ރަނގަޅު ގޮތެއްނޫން
ށަވިޔަނި
07 December 2022
ކުނި މެނޭޖްކުރާ ހުރިހާ މީހުނަށް ދަރުސު ދޭން ތިތަނަށް ފޮނުވާ.