އެމްޑީޓީސީގެ މެނޭޖިން ޑިރެކްޓަރު ތަޒްމީލު ވާހަކަދައްކަވަނީ. އެކުންފުނިން އަންނަނީ ނާގޯށީގެ އަމަލީ މަސައްކަތް ފެށުމަށް ބޭނުންވާ ކަންކަން ކުރަމުން-- ފޮޓޯ:ފަޔާޒް މޫސާ/މިހާރު
09 ފެބުރުއަރީ 2023 - 11:32
އެމްޓީޑީސީން ތަރައްގީކުރާ، ހދ. ނާގޯށީގެ މަސައްކަތް އަންނަ އަހަރު ނިންމައި އެތަން ހުޅުވޭނެ ކަމަށް އެ ކުންފުނީގެ މެނޭޖިން ޑިރެކްޓަރު ތަޒްމީލު އަބްދުލްސަމަދު ވިދާޅުވެއްޖެ އެވެ.
އެ ކުންފުނީގެ 15 ވަނަ އަހަރީ ދުވަހާ ގުޅިގެން ރޭ ކުރުނބާގައި ބޭއްވި ރަސްމިއްޔާތުގައި ތަޒްމީލް ވިދާޅުވީ، އެމްޓީޑީސީން އަމިއްލައަށް ރިސޯޓު ހިންގައިގެން އެކަމުން ފައިދާ ބޮޑު ކުރެވޭނެ ކަމަށެވެ. އަދި އެކަމުގެ މަސައްކަތްތައް ވަރަށް ބާރަށް ކުރިއަށްގެންދާ ކަމަށް ވިދާޅުވި އެވެ.
ނާގޯށި ތަރައްގީކުރަނީ، ދުބާއީގެ ރޯ ގަލަދާރީ ކުންފުނިންނެވެ. އެ ކުންފުންޏާއި އެމްޓީޑީސީން ހަދާފައިވާ ޖޮއިންޓް ވެންޗާއެއްގެ ދަށުން އެ ރަށް ތަރައްގީ ކުރާއިރު ރޯ ގަލަދާރީގެ ހިއްސާއަކީ 85 ޕަސެންޓެވެ. ބާކީ 15 ޕަސެންޓް ހިއްސާ ވަނީ އެމްޓީޑީސީ އެވެ. ނަމަވެސް އެ ޑީލް ހެދީ ރިސޯޓު ހިންގުމުގެ ފައިދާގެ ފިކްސްޑް އަދަދެއް ކޮންމެ މަހަކު ވެސް އެމްޓީޑީސީ އަށް ލިބޭ ގޮތަށެވެ.
އޭނާ ވިދާޅުވީ، ދެ ފިޔަވައްސަކަށް ބަހާލައިގެން ތަރައްގީކުރާ އެ ރިސޯޓުގެ އަމަލީ މަސައްކަތް ވަރަށް އަވަހަށް ފަށާނެ ކަމަށެވެ.
އެމްޓީޑީސީގެ 15 ވަނަ އަހަރީ ދުވަސް ފާހަގަކުރަން ބޭއްވި ރަސްމިއްޔާތުގެ ތެރެއިން. --ފޮޓޯ: ފަޔާޒް މޫސާ/ މިހާރު
"މި ކުންފުނިން އިންވެސްޓުކޮށްގެން 230 އެނދުގެ ރިސޯޓެއް ތަރައްގީ ކުރުމަށް ބޭނުންވާ އެންމެހާ މަސައްކަތްތައް ހަލުއި ސްޕީޑުގައި ކުރިއަށްދާ ވާހަކަ ދަންނަވާލަން. މި ރިސޯޓު ތަރައްގީ ކުރެވިގެންދާނީ ޒަމާނީ ފެންވަރުގައި އެންމެ ފަހުގެ ވަސީލަތްތަކާ އެކު، ހުރިހާ ގިންތިއަކަށް ހާއްސަކުރެވިގެން،" އޭނާ ވިދާޅުވި އެވެ
ނާގޯށީގެ އިތުރުން އެކުންފުންޏަށް ދާއިމީ ގޮތެއްގައި އާމްދަނީ ލިބޭނެ ގޮތެއް ފަހި ކުރުމަށް އެ ކުންފުނިން ވަނީ ހުޅުމާލޭގައި އޮފީސް އިމާރާތެއް އެޅުމުގެ މަސައްކަތް ފަށައިފަ އެވެ.
އެމްޓީޑީސީން ބުނީ އެ އޮފީސް އިމާރާތަކީ ހުޅުމާލޭ ސެންޓްރަލް ޕާކު ސަރަހައްދުގެ 6،000 އަކަފޫޓުގެ ބިމެއްގައި ހަދާ އިމާރާތެއް ކަމަށެވެ. އެ އޮފީސް އިމާރާތް އަންނަ އަހަރު ފަހުކޮޅު ހުޅުވާނެ ކަމަށް އެ ކުންފުނިން ބުންޏެވެ.
ހަތް ބުރިއަށް ހަދާ އިމާރާތުގައި އެމްޓީޑީސީގެ އިތުރުން އެހެން ފަރާތްތަކަށް ވެސް އޮފީސް ޖާގަ ކުއްޔަށް ދޭނެ އެވެ. ޒަމާނީ ވަސީލަތްތަކާ އެކު ހަދާ އެ އިމާރާތުގައި މަލްޓި ޕާޕަސް ހޯލާއި، ޕާކިން އޭރިއާ އާއި ބިޒްނަސް ލޯންޖަކާއި ޖިމެއްގެ އިތުރުން އޯޕަން އިވެންޓްތައް ބޭއްވުމަށް ހާއްސަ ޓެރަސްއެއް ވެސް އޮންނާނެ އެވެ.
އެމްޓީޑީސީން މިހާރު އޮފީސް ހިންގަނީ މަޓީގެ އިމާރާތެއްގަ އެވެ. ގާތްގަނޑަކަށް 3،500 އަކަފޫޓުގެ އެ އިމާރާތުގައި މަހެއްގެ މައްޗަށް ކުއްޔަށް 70،000ރ. ހޭދަކުރަން ޖެހެ އެވެ. އެހެންވެ، އަލަށް ހަދާ އޮފީސް އިމާރާތާ އެކު އެމްޓީޑީސީއަށް ދާއިމީ ގޮތެއްގައި އާމްދަނީ ލިބޭނެ ގޮތެއް ފަހިވާނެ ކަމަށް އެ ކުންފުނިން ބުންޏެވެ.
މިވަގުތު އެކުންފުންޏަށް އެންމެ ބޮޑު އާމްދަނީއެއް ލިބެނީ ދެ ރަށެއް ރިސޯޓު ހަދަން ކުއްޔަށް ދީގެންނެވެ.
ރޭގެ ރަސްމިއްޔާތު ޝަރަފްވެރިކޮށްދެއްވި ފޮރިން މިނިސްޓަރު އަބްދުﷲ ޝާހިދު ވިދާޅުވީ، ކޮވިޑްގެ އުނދަގޫ ހާލަތުގައި ވެސް، ގިނަ ދުވަސްތަކަކަށް ފަހު ފައިދާ ލިބޭ ކުންފުންޏަކަށް އެމްޓީސީ ވުމަކީ ލިބުނު ވަރަށް ބޮޑު ކާމިޔާބީއެއް ކަމަށެވެ.
"މިއަދުގެ ބޯޑުން، ޗެއާމަން، މިއަދުގެ އެމްޑީގެ ވިސްނުންފުޅާ ދުރު ރާސްތާގައި ކުރަން ނިންމެވި ކަންކަން އެނގިގެން ހިނގައްޖެ. އެ ކަންތައްތަކުން އެނގިގެން މިދަނީ މިހާރު އެމްޓީޑީސީ އަމާޒު ހިފާފައި އޮތީ ވަރަށް ތަނަވަސް، ވަރަށް އުޖާލާ މުސްތަގްބަލަކަށް ކަން،" އޭނާ ވިދާޅުވި އެވެ.
އެ ކުންފުންޏަށް 11 އަހަރަށް ފަހު އަލުން ފައިދާވާން ފެށީ 2020 ވަނަ އަހަރުން ފެށިގެންނެވެ.
އެމްޓީޑީސީ އަކީ ސަރުކާރުގެ 47 ޕަސެންޓް އަދި އާންމު ހިއްސާދާރުންގެ 53 ޕަސެންޓް ހިއްސާ އޮންނަ ކުންފުންޏެވެ. އެކުންފުނީގައި އާންމުގެ ހިއްސާދާރުންގެ ގޮތުގައި 24،000 އަށް ވުރެ ގިނަ މީހުން އެބަ ތިއްބެވެ.
Copyright © 2025 Mihaaru · Terms and Conditions · Privacy Policy
ކޮމެންޓްތައް
ކެޔޮޅާ
09 February 2023
ކަންބޮޑުވަނީ ރެންޓަށް 75000ރ ދޭންޖެހުމުން ތޯ؟، ޝެއަރހޯލްޑަރުން ކަންބޮޑުވަނީ އެމްޑީ ގެ މުސާރަ އަށް 90000ރ ޚަރަދުކުރާތީ ނޫންތޯ؟ ކޮބައިހޭ ކުރާހާވެސް މަސައްކަތަކީ؟ ސަބްލީޒް އިންވޮއިސް ހެދުމާ ހެޑްލީޒް ޕޭމަންޓް ހެދުން ނޫންތޯ؟ ދެން ކުރާ އެއްކަމެއްވެސް އެބައޮތްތޯ. ސީނާޒާހިރު ސަރަނގޭވެސް ތިގޮތަށް ހެޑްލީސް ނަގާ ސަބްލީޒްކޮށް ވިޔަފާރިކުރޭ، 20 25 މީހުންގެ މުސާރައެއްވެސް ދޭކަށް ނުޖެހޭ. އެގޮތް މާރަގަޅެއް ނޫންހޭ؟
ބޮސްގެ ބޮސް
09 February 2023
އާންމު ހިއްސާދާރުންނަށް ފައިދާއިން ދެނީ ކިހާވަރެއްކަން ނުބުނެވުނު ދޯ؟
އަލީ އަސްފާގު
09 February 2023
ފުރަތަމަ ބުރުން ބޮޑު ފައިދާއެއް ދިނީމަ ދެވަނަ ބުރުން ހިއްސާ އެއަށްވުރެ ގިނައިން ގަތީމަ ކެހިދިން ބައެއް ތީ. މަކަރާއި ހީލަތުގެ ވިއަފާރި އެއްތީ. 13 އަހަރަށްވުރެ ގިނަދުވަސ ވީ ހިއްސާދާރުންނަށް އެއްޗެއް ނުދޭތާ،
އަލީ ރަމީޒު
09 February 2023
ފޮނިކެނޑުމުގެ ބޭނުމެއްނެތް ދެއްތޯ. 13 އަހަރުވީ ޕުރޮވިޑެންޓު ފަންޑު އުވާލާ އެފަންޑުގަ ހުރި ލާރިން އަޅުގަޑު ހިއްސާއަށް އިންވެސްޓު ކުރިތާ. 13 އަހަރުވީއިރު އަޅުގަޑަށް އަދި މި އުޅެނީ 1 ރުފިޔާ ވަރުވެސް ނުލިބި. ދެން ހިއްސާދާރުންނަށް އޮތީ ކޮންފައިދާއެއް ނުވަތަ ކޮން އުންމީދެއްތޯ. ތިޔަ ބިން ނުދިނަސް ހިއްސާދާރުންނަށް ފައިދާއެއްނެތް ދެއްތޯ، ހިއްސާދާރުންގެ އަތުން ފައިސާ ނަގައިގެން ތިމާމެން މުއްސަދިވެ ރައްޔިތުންގެ ކަރުގަ ހިފީމަ ވަރަށް ހަޑީދެއްތޯ
ޟީމާ
09 February 2023
އަހަރުމެން ރުޅިއަރުވަން ތިކުންފުނީގެ ވާހަކަ ނުދައްކާށެވެ.
ކަތްދައްތަ
09 February 2023
އަންއަހަރު އަންނަމަސް އަންދުވަސް މީދެން ސުމާރެއް މިނޭނެ ގޮތެއް ހައްދެއް ސުމާރެއް އޮތްކަމެއްނޫން. ގިޔާމަތް ނުވަންޏާ އަބަދުވެސް އަންނަ އަހަރު އަންނަ މަސް އަން ދުވަސް މިހެން ތަކުރާރުވާނެ. އަންފޮށައޭ ނުކިޔާތީ ދެރައީ.
ހޭލި
09 February 2023
ހިއްސާ ދާރުންނަށް ބައިލާރިއެއް ނުދެވުނަސް ކޯޓް ލައިގެން ރިސޯޓް ތަކުގައި ޚަރަދު ބޮޑު އިވެންޓް ބާއްވާތި.
ހިތަދޫ
09 February 2023
ތިހެން ހިނގި ދާނެ ކޮންމެ ކުންފުންޔެއްވެސް ކުލި ލިބޭނެ އިމަރާތެއް ހަދަން އަދި އިންވެސްޓަރަކު ހަދަން ރަށެއް ސަރުކާރުން ދިނީމަ، ބޭކާރު
އަސްލުވެސްދޯ
09 February 2023
އެމްޓީޑީސީން ދައުލަތަށް ދައްކަންޖެހޭ 16 މިލިއަން ޑޮލަރު އެބައޮތް. އެ ފައިސާ އޮތީ ފަހުން ދައްކާގޮތަށް ހަމަޖައްސާފައި. އެވާހަކަ ނުދައްކާ، ފައިދާވަނީއޭ ކީމަ އެބައެނގޭދޯ އޮޅުވާލަނީކަން.
އޮނަރަބްލް އަފީފު ދީދީ
09 February 2023
ކުންފުނީގެ %53 ޙިއްސާގެ ތެރެއިން ބޮޑުބައެއް އެބައެއްގެ ބާރުގެ ދަށުގައިއޮތް މަޓީގެ އިމާރާތެއްގައި ކުންފުނީގެ ހެޑްއޮފީސް ހިންގުމަކީވެސް ކުންފުނީގެ މައްޗަށް އެމީހުންެ ބާރާއި ނުފޫޒު އޮތްވަރު އިގޭ ކަމެއް. # މިފަދަ އަމިއްލަ ވިޔަފާރީގެ މަސްލަހަތު އޮތްބައެއްގެ ކަންޓްރޯލް ތިޔަ ކުންފުނީގައި އޮވެގެން ދުވަހަކު އެމީހުންގެ ވިޔަފާރިއާއި ވާދަކުރަން އެމްޓީޑީސީއަށް ފުރުސަތު ލިބޭގޮތަކަށް ކުންފުނި ހިންގާން އެމީހުން ޖާގަ ނުދޭނެ. ފުރަތަމަ މިކަން ރަނގަޅު ކުރޭ.