ސަމަންތާ ބުޅަލެއް އެޑަޕްޓުކޮށްފި

ބޭސްފަރުވާއަށް މިވަގުތު އެމެރިކާގައި ހުރި އިންޑިއާގެ ތަރި، ސަމަންތާ ޕްރަބޫ ބުޅަލެއް އެޑަޕްޓުކޮށްފި އެވެ.

ސަމަންތާ ބުޅަލެއް އެޑަޕްޓުކުރި ވާހަކަ ފޭނުންނާ ހިއްސާކުރީ އިންސްޓަގްރާމް ޕޯސްޓެއްގަ އެވެ. އެ ޕޯސްޓުގައި އިނީ އޭނާ އެ ބުޅަލާ ބައްދާލައިގެން އޮވެ ނަގާފައިވާ ފޮޓޯއެކެވެ.

އެ ބުޅަލަށް ކިޔަނީ "ގެލާޓޯ" އެވެ. އެއީ އަޅިކުލައިގެ ޕާޝިއަން ބުޅަލެކެވެ.

އޭނާ ޕެޓްކޮށްގެން ދެ ކުއްތާ ވެސް ގެންގުޅެ އެވެ. އެއީ ހާޝް އާއި ސާޝާ އެވެ.

ދެކުނު އިންޑިއާގެ ފިލްމުތަކުގައި މަޝްހޫރު އެކްޓްރެސް، ސަމަންތާ ވަރަށް ބޮޑަށް ބަލިވެ އުޅޭތީ އޭނާ ވަނީ އެކްޓިން އިން ހަ މަހުގެ ބްރޭކެއް ނަގައިފަ އެވެ.

ސަމަންތާ އެމެރިކާއަށް ދިޔައީ މަޔޯސައިޓިސްއަށް ފަރުވާ ހޯދުމަށެވެ. މަޔޯސައިޓިސްއަކީ ހަށިގަނޑުގެ އެކި ތަންތަން ދުޅަވެ، މީހާ ވަރަށް ބޮޑަށް ބަލިކޮށްލާ ބައްޔެކެވެ. މިއީ ވަރަށް މަދުން ނޫނީ ނުފެންނަ ބައްޔެއް ވެސް މެ އެވެ.

އެ ބައްޔަށް ޑައިގްނޯސްވި ކަމަށް، މިދިޔަ އަހަރު މީޑިއާއަކަށް ދިން އިންޓަވިއުއެއްގައި ސަމަންތާ އަމިއްލައަށް ބުނެފައިވެ އެވެ.