ޚަބަރު / ކުރީގެ ޗީފް އަބްދުއްރަހީމް އަބްދުއްލަތީފް

ލެފްޓިނެންޓް ޖެނެރަލްގެ ރޭންކް ލިބިވަޑައިގަތް ތިންވަނަ ބޭފުޅަކަށް ޑިފެންސް ޗީފް އަބްދުއްރަހީމް

ރައީސް ޑރ. މުހައްމަދު މުއިއްޒު، ޗީފް އޮފް ޑިފެންސް ފޯސްގެ މަގާމުގައި ހުންނެވި މޭޖާ ޖެނެރަލް އަބްދުއްރަހީމް އަބްދުއްލަތީފް، ލެފްޓިނެންޓް ޖެނެރަލް ރޭންކަށް މިއަދު ޕްރޮމޯޓް ކުރައްވަނީ. --ފޮޓޯ: އެމްއެންޑީއެފް

11 ޑިސެމްބަރ 2023 - 13:14

65 comments

ޗީފް އޮފް ޑިފެންސް ފޯސްގެ މަގާމުގައި ހުންނެވި މޭޖާ ޖެނެރަލް އަބްދުއްރަހީމް އަބްދުއްލަތީފް، ލެފްޓިނެންޓް ޖެނެރަލް ރޭންކަށް ރައީސް ޑރ. މުހައްމަދު މުއިއްޒު މިއަދު ޕްރޮމޯޓް ކުރައްވައިފި އެވެ.

ބަންޑާރަކޮށީގައި ބޭއްވި ހާއްސަ ރަސްމިއްޔާތުގައި، ރައީސުލްޖުމްހޫރިއްޔާ އަދި ސިފައިންގެ އެންމެ މަތީވެރިޔާ ރައީސް ޑރ. މުއިއްޒު، އަބްދުއްރަހީމަށް ލެފްޓިނެންޓް ޖެނެރަލްގެ ރޭންކު ހަވާލުކޮށްދެއްވިއިރު، މަގާމުގެ ކުރިއެރުން ދެއްވިކަމުގެ ލިޔުން ހަވާލުކޮށްދެއްވީ ޑިފެންސް މިނިސްޓަރު މުހައްމަދު ޣައްސާން މައުމޫނެވެ.

ޗީފް އޮފް ޑިފެންސް ފޯސް އަބްދުއްރަހީމަށް މަގާމުގެ ކުރިއެރުން ދިން ކަމުގެ ލިޔުން ޑިފެންސް މިނިސްޓަރު ޣައްސާން މިއަދު ހަވާލު ކޮށްދެއްވަނީ.---ފޮޓޯ: އެމްއެންޑީއެފް

މިއީ މި އަހަރު އަބްދުއްރަހީމަށް ޕްރޮމޯޝަން ލިބިވަޑައިގެންނެވި ދެ ވަނަ ފަހަރެވެ. މޭޖާ ޖެނެރަލެއްގެ ރޭންކަށް އޭނާ ޕްރޮމޯޓުކުރީ ކުރީގެ ސަރުކާރުގައި މިދިޔަ ޖުލައި 25 ގަ އެވެ. އޭގެ ފަހުން ރައީސް ޑރ. މުއިއްޒު މިދިޔަ މަހުގެ 17 ގައި ވެރިކަމުގެ ހުވާކުރެއްވުމަށް ފަހު ހަމަ އެ ރޭ އަބްދުއްރަހީމަށް ޗީފް އޮފް ޑިފެންސް ފޯސްގެ މަގާމު ދެއްވި އެވެ.

މިއަދު މަގާމުގެ ކުރިއެރުން ލިބިވަޑައިގަތް ލެފްޓިނެންޓް ޖެނެރަލް އަބްދުއްރަހީމަކީ ދިވެހި އަސްކަރިއްޔާގެ ތާރީހުގައި، ލެފްޓިނެންޓް ޖެނެރަލްގެ ރޭންކާ ހަމައަަށް ވަޑައިގެންނެވި ތިންވަނަ އޮފިސަރެވެ. ލެފްޓިނެންޓް ޖެނެރަލަކީ ސިފައިން ރޭންކްތަކުގެ ތެރެއިން ދެވަނަ އަށް އެންމެ އިސް ރޭންކެވެ. އެންމެ އިސް ރޭންކަކީ ޖެނެރަލް އެވެ.

ޗީފް އޮފް ޑިފެންސް ފޯސް އަބްދުއްރަހީމަށް ޕްރޮމޯޝަން ދިނުމަށް މިއަދު ބޭއްވި ރަސްމިއްޔާތުގައި ސިފައިންގެ އެންމެ މަތީވެރިޔާ ރައީސް ޑރ. މުއިއްޒާއި ޑިފެންސް މިނިސްޓަރު ޣައްސާން ބައިވެރިވެވަޑައިގަންނަވަނީ.---ފޮޓޯ: އެމްއެންޑީއެފް

މީގެ ކުރިން ލެފްޓިނެންޓް ޖެނެރަލް ރޭންކް ލިބިވަޑައިގަތް ބޭފުޅުންނަކީ ލެފްޓިނެންޓް ޖެނެރަލް (ރިޓަޔާޑް) އަންބަރީ އަބްދުއްސައްތާރާއި ލެފްޓިނެންޓް ޖެނެރަލް (ރިޓަޔާޑް) އަބްދުﷲ ޝަމާލް އެވެ.