އާޒިމާގެ އިތުރު މައްސަލައެއް ނެތް: ސިވިލް ކޯޓު

ކޮންގްރެސް ޕާޓީގެ ފަރާތުން މާލޭގެ މޭޔަރު ކަމަށް ވާދަކުރައްވާ އައިޝަތު އާޒިމާ ޝަކޫރުގެ މައްޗަށް ސިވިލް ކޯޓުގައި ދައުވާއެއް އޮތް ކަމަށް ބުނެ ނޫހަކުން ފެތުރި ހަބަރު ދޮގުކޮށް، ކޯޓުގެ ހުރުމަތް ކެނޑި ކަމަށް ބަލައި ފިޔަވަޅު އަޅާނެ ކަމުގެ އިންޒާރު ސިވިލް ކޯޓުން ދީފި އެވެ.

އިސްލާމިކް ބޭންކުން އާޒިމާ ނަންގަވާފައިވާ ގެދޮރުވެރިކަމުގެ ލޯނެއް ނުދައްކާ އޮތް މައްސަލާގައި ހަތަރު މިލިއަން ރުފިޔާ ދެއްކުމަށް ސިވިލް ކޯޓުން މިދިޔަ ހަފުތާގައި ވަނީ އޭނާގެ ޣައިރު ހާޒިރުގައި ހުކުމްކޮށްފަ އެވެ.

އެ ހުކުމްކޮށްފައި ވަނިކޮށް ފައިސާގެ އެހެން މައްސަލައެއްގައި ވެސް އާޒިމާގެ މައްޗަށް އިތުރު ދައުވާއެއް ކޮށްފައިވާ ކަމާއި އެ މައްސަލާގެ ހުކުމަށް ސިވިލް ކޯޓުން ތައްޔާރުވެފައިވާ ކަމަށް ބުނެ ނޫހެއްގައި ހަބަރެއް ޝާއިއުކުރި އެވެ.

އެ މައްސަލާގައި ސިވިލް ކޯޓުން މިއަދު ނެރުނު ބަޔާނެއްގައި ބުނީ ޕްލެޓިނަމް ރިއަލް އެސްޓޭޓްގެ ފަރާތުން އާޒިމާގެ މައްޗަށް ދައުވާކޮށް ސިވިލް ކޯޓަށް މައްސަލައެއް ހުށަހަޅާފައިވާ ކަަމަށާއި އެ މައްސަލާގައި ހުކުމް ކުރުމަށް އަޑު އެހުމެއް ތާވަލު ކޮށްފައިވާ ކަމަށް ނޫހެއްގައި ބުނެފައިވީ ނަމަވެސް އެފަދަ މައްސަލައެއް އެ ކޯޓުގައި ރަޖިސްޓާ ކޮށްފައި ނުވާ ކަމަށެވެ.

އެ މައްސަލައިގެ ލިޔެކިޔުންތަކެއް ކަމަށް ބުނެ އެ ނޫހުން އާންމު ކޮށްފައި ވަނީ ވެސް ސައްހަ ލިޔެކިޔުންތަކެއް ނޫން ކަމަށް ސިވިލް ކޯޓުން ބުންޏެވެ.

އެހެންވެ އެއީ ކޯޓުގެ ހުރުމަތް ކެނޑުން ކަމަށް ބަލައި ގާނޫނީ އިމުގެ ތެރެއިން އެޅެން އޮތް އެންމެ ހަރުކަށި ފިޔަވަޅު އަޅާނެ ކަމަށް ވެސް އެ ކޯޓުން ބުންޏެވެ.

Inthihaabee haggah araigaiy kamah vidhaalhuve Azima court aai police ah

The most trusted news source in the Maldives

Mihaaru

"...ރައްޔިތުންގެ ކުރިމަތީ ކޯޓާ މެދު ނުބައި ތަސައްވުރެއް އުފެދޭ ގޮތަށް އަދި ކޯޓުގެ ލިޔުންތަކެއް ކަމަށް ބުނެ ސައްހަ ނޫން ލިޔުންތަކެއް ތައްޔާރުކޮށް ކޯޓުގެ އަގު ވެއްޓޭ ގޮތަށް ކުރާ މިފަދަ އަމަލުތައް ހަރުކަށި އިބާރާތުން ކުށްވެރި ކުރަން،" ސިވިލް ކޯޓުން ނެރުނު ބަޔާނުގައި ބުނެފައި ވެއެވެ.

ސިވިލް ކޯޓުން މިދިޔަ ހަފްތާގައި އާޒިމާގެ މައްޗަށް ކުރި ހުކުމާ ބެހޭ ގޮތުން އޭނާ ނެރުއްވި ބަޔާނެއްގައި ވަނީ އެ ހުކުމް އެގޮތަށް ކޮށްފައިވަނީ ލޯނު ރީސްޓްރަކްޗާކުރުމަށް ވާހަކަ ދައްކަން ފަށައި ފައިސާ ދައްކާނެ ގޮތުގެ ޝެޑިއުލެއް ބޭންކަށް ހުށަހަޅާފައިވަނިކޮށް ކަމަށެވެ.

ބޭންކުން ވަނީ ލޯނު ރީސްޓްރަކްޗާކުރުމާ މެދު ވަކި ގޮތެއް ނިމެންދެން ކޯޓުގައި ހިނގަމުންދިޔަ މައްސަލަ މަޑުޖައްސާލަން ކޯޓަށް ލިޔުމުން އަންގާނެ ކަމުގެ ޔަގީންކަން ދީފައި ކަމަށާއި ނަމަވެސް އޭނާގެ ޣައިރު ހާޒިރުގައި ސިވިލް ކޯޓުން މައްސަލާގައި ހުކުމް ކުރީ އެކަމަށް ބޭންކުން އެދުމުން ކަަމަށް ބަޔާނުގައި ވެއެވެ.

"މިއީ އަޅުގަނޑު ކުރިމަތިލާފައިވާ މާލެ ސިޓީގެ މޭޔަރު އިންތިހާބު ކުރުމަށް ބާއްވާ ބައި-އިލެކްޝަންއަށް ނުފޫޒު ފޯރުވަން ބޭންކިންގެ ގާނޫނުތަކާއި އުސޫލުތަކާ ހިލާފަށް ބޭންކުގެ ވަކި މުވައްޒަފަކު ކޮށްފައިވާ ކަމެއް ކަމަށް އަޅުގަނޑަށް ގަބޫލު ކުރެވޭ ވަރުގެ މައުލޫމާތު ވަނީ ލިބިފައި،" އާޒިމާގެ ބަޔާނުގައި ވެއެވެ.

އެ މައްސަލާގައި އާޒިމާ ވަނީ އިސްލާމިކް ބޭންކްގެ މައްސަލަ ބަލައިދިނުމަށް އެމްއެމްއޭ އަށް ހުށަހަޅަން ވެސް ނިންމަވައިފަ އެވެ.

އޭގެ އިތުރުން ހަގީގަތާ ހިލާފު ހަބަރެއް ފެތުރި ކަމަށް ބުނެ އެ ނޫހާ ދެކޮޅަށް އަބުރުގެ ދައުވާ ކުރަން ވެސް އޭނާ ވަނީ ނިންމައިފަ އެވެ.