ކުންފުނިތަކުގެ ފައިނޭންޝަލް ޕޮލިސީ އެއްގޮތްކުރުމުގެ މަސައްކަތް ފަށަނީ

ސަރުކާރު ހިއްސާވާ ހުރިހާ ކުންފުންޏަކުން މާލީ ކަންކަން ހަމަޖެއްސުމުގައި އަމަލުކުރާނެ އުސޫލެ އެއްގޮތް ކުރުމުގެ މަސައްކަތް ޕްރައިވަޓައިޒޭޝަން އެންޑް ކޯޕްރަޓައިޒޭޝަން ބޯޑު (ޕީސީބީ) އިން ފަށައިފި އެވެ.

ޕީސީބީން ބުނީ، އެސްއޯއީތަކުގެ ފައިނޭންޝަލް ޕޮސިލީ އާއި ޕްރޮސީޖާތައް ރަނގަޅަށް ހެދިފައިނުވާކަން ފާހަގަކުރެވިފައިވާ ކަމަށާއި ހަރަދުތައް ކުރުމުގައި އަމަލުކުރަން ޖެހޭ މުހިއްމު ބައިތައް ބައެއް ކުންފުނިތަކުގައި ނެތް ކަމަށެވެ.

އެ އިދާރާއިން ބުނީ، މިކަން އިސްލާހު ކުރުމަށް ކުންފުނިތަކުން އަމަލުކުރާ މާލީ އުސޫލާއި ޕްރޮސީޖާތައް އެއްގޮތް ކުރުމަށް އާ އުސޫލެއް ހެދުމުގެ މަސައްކަތް ކުރަމުން އަންނަ ކަމަށެވެ. އެ އުސޫލުތައް ސްޓޭންޑަޑައިޒް ކުރުމަށް ކުންފުނިތަކުގެ ފައިނޭންޝަލް ޑިޕާޓްމެންޓްތަކުގެ އިސްވެރިންނާ އެކު މަސައްކަތް ކުރަމުން އަންނަ ކަމަށް ޕީސީބީއިން ބުންޏެވެ.

ޕީސީބީއިން ބުނީ، ފައިނޭންޝަލް މައުލޫމާތު ރިޕޯޓުކުރުމުގައި ހާމަކަން ބޮޑު ކަމާއި އިތުބާރު އުފެއްދުމަށްޓަކައި ކޮންމެ ކުންފުންޏެއްގައި ވެސް ސްޓޭންޑާޑް އެކައުންޓިން ޕޮލިސީތަކާއި ޕްރޮސީޖާތައް ހަދައި ކުންފުނިތަކުގެ ބޯޑުން އެންޑޯޒްކޮށްފައި ހުރުމަކީ މުހިއްމު ކަމެއް ކަމަށެވެ. އަދި ފައިނޭންޝަލް މުއާމަލާތްތައް ރެކޯޑު ކުރުމާއި ރިޕޯޓުކުރުމާއި އަގު ކުރުމާއި މާލީ ބަޔާންތަކާ އެކު ހާމަކުރަން ޖެހޭ މައުލޫމާތުތަކުގެ ގައިޑްލައިން ހިމެނޭ ގޮތަށް ޕޮލިސީތައް ހެދިފައި ހުންނަން ޖެހޭ ކަމަށެވެ.

މާލީ މުއާމަލާތްތައް ހިންގުމުގައި ކޮރަޕްޝަނަށް މަގުފަހިވާ ގޮތަށް ކަންކަން ކުރުމުން، މީގެ ކުރިން ބައެއް ކުންފުނިތަކުގެ މައްސަލަތައް ފެންމަތިވެ، އޭސީސީއިން ވެސް ބަލައިފައިވެ އެވެ. އަދި އެފަދަ ކަންކަމުގައި އިހުމާލުވި މުވައްޒަފުންނާ މެދު ފިޔަވަޅު ވެސް އަޅާފައިވެ އެވެ. މިދިޔަ އަހަރުގެ ފަހުކޮޅު ވަނީ، ޕެޓީ ކޭޝް ދިނުމުގައި އުސޫލުން ބޭރުން އަމަލު ކުރުމުން އާރްޑީސީގެ މައްސަލައެއް ވެސް ކަމާ ގުޅޭ އިދާރާތަކުން ބަލަން ފަށައިފަ އެވެ.