ފޮޓޯ ސްޓޯރީ: މުޅި އުމުރު ހިތްދަތިކަމާއި އެކަނިވެރިކަމުގައި

ގެއާ ވަކިން އިމާރާތްކޮށްފައިވާ ބަދިގޭގައި އައިމިނަތު ރޯދަ ވީއްލަނީ: ކޮންމެ ހޯމަ, ބުރާސްފަތީގައި ރޯދަ ހިފާއިރު އޭނާ ކައްކަނީ އަމިއްލައަށް. ގޭގައި އިތުރު އެއްވެސް މީހަކު ދިރިއެއްނޫޅޭ.

އައިމިނަތު އިބްރާހިމް ބުނި ގޮތުގައި ކައިވެނިކުރުމަށް ފަހު ފިރިމީހާ މަހަށް ގޮސްގެންނާއި އޭނާ ރަށުގައި އިނދެ ރޯނު ވަށައިގެން ރައްކާކުރި ފައިސާ އިން ގެ ހެދީ ދަރިން ހޯދައި ހެޔޮގޮތުގައި ތަރުބިއްޔަތުކުރަން. އެކަމަކު ދެމަފިރިންނަށް ދުވަހަކު ވެސް ދަރިއަކު ނުލިބޭ. އެކަމާ ގުޅިފައި އޮތީ ސިހުރު ކަމަށް، ކުރި ފަރުވާ އިން އެނގުނު ކަމަށް އޭނާ ބުނޭ.

ދަރިން ނުލިބުމުގެ ބައްޔަށް އޭރު މާބޮޑު ފަރުވާއެއް ލިބެން ނެތަސް އަތު ޖެހުނު ދިވެހި ބޭހުން ފަރުވާ ހޯދި. ހދ. ވައިކަރަދޫގައި 40 ދުވަސް ފަރުވާގައި ދެމަފިރިން ހޭދަކުރުމަށް ފަހު އެނބުރި ރަށަށް އަންނަން ޖެހުނީ ނާއުއްމީދާ އެކު. އޭނާ ބުނި ގޮތުގައި ދެ ދަތުރުން އެނގުނީ އެ ދެމަފިރިންގެ ދިރިއުޅުމާ ނުރުހޭ ބަޔަކު ސިހުރު ހެދިކަން.

ގޭތެރޭގައި ހުރި ފަތްޖެހިނދެގައި އައިމިނަތު އިބްރާހިމް އިށީދެލައިގެން: ދަރިއަކު ނުލިބި ދެމަފިރިންގެ ހަޔާތުގެ ދުވަސްތައް ހިތްދަތިކަމުގައި ގުނަނިކޮށް ދެން ކުރިމަތިވީ ވެސް ހިތާމަ. ވާގިނެތޭ ބަލީގައި ފިރިމީހާ އެނދުމަތިވީ. އޭނާ ބެލުމުގެ ހުރިހާ ޒިންމާއެއް އުފުލީ އައިމިނަތު އިބްރާހީމް. އެ ބަލީގައި ފިރިމީހާ ނިޔާވި އިރު ކައިވެންޏަށް 40 އަހަރު ވަނީ ފުރިފައި

އައިމިނަތު އޭގެ ފަހުން ދިރިއުޅެނީ އެކަނި. ދެމަފިރިން ބިނާކުރި ގެ ދޫކޮށްލާފައި އެއްވެސް ތަނަކަށް ދާން ބޭނުން ނުވީ. އުމުރުން 65 އަހަރުގެ އިނާޔަތުން ހަރަދުތައް ދެކޮޅު ޖައްސައި ފައިސާ ރައްކާކުރޭ.

ބަދިގެ ތެރޭގައި ތެލިތައް ތަރުތީބުން އަތުރާލައިފައި: އޭނާގެ ގޭތެރެއިން ފެންނަނީ ތަރުތީބުކަމާއި ސާފުތާހިރުކަން. އެ އުމުރުގައި ވެސް އޭނާ ހަރަކާތްތެރިވެފައި މުރާލި. ގޭގައި ހުންނަ ބަނބުކެޔޮ ގަސް ވެސް އަގުދީގެން ކޮށައި, ހުރިހާ ކުންޏެއް ނަގައި ސާފުކުރަނީ އަމިއްލައަށް.

އެންމެ އުނދަގޫ ވަނީ ބަލިވުމުން. ގިނަ ފަހަރަށް ޑޮކްޓަރަށް ދައްކަން ދަނީ އެކަނި. ނޫނީ ރަށުގައި އުޅޭ އާއިލާ މީހަކާ އެކު. އެއްވެސް މީހަކަށް އޭނާގެ ފަރާތުން އުނދަގޫ ޖައްސާކަށް އައިމިނަތު ބޭނުމެއް ނުވޭ.

އައިމިނަތު ގޭގެ ދޮރުކަނީގައި ލެނގިލައިގެން: އަމިއްލަ ހަރަދުގައި މިހާރު ދެ ފަހަރަށް އުމްރާއަށް ހިނގައްޖެ. އޭނާއާ އެކު ދިޔަ މީހާގެ ހަރަދު ވެސް ދިނީ އައިމިނަތު އިބްރާހީމް. އޭނާ އަދިވެސް އުއްމީދުކުރަނީ އަޅުކަމަކަށް މައްކާއަށް ދިއުމަށް.

އައިމިނަތު އިބްރާޙިމް ގޭ ބޭރުގަ ހުރި ޖޯލިފަތީގައި އިށީނދެލައިގެން: ދިރިއުޅުމުގައި ވަރަށް ގިނަ ހިތާމަ ތަހައްމަލްކުރަން ޖެހުނަސް އޭނާގެ ނަސީބުގައި ހުރި ގޮތް ކަމަށް ގަބޫލުކުރޭ. ބާކީ އޮތް ދުވަސްތައް އޭނާ ހޭދަކުރަން ބޭނުންވަނީ ފިރިމީހާގެ ގޭގައި. ދެ މީހުންގެ އުފަލާއި ހިތާމަ ވަނީ އެ ހަތަރު ފާރުގެ އެތެރޭގައި ކަމަށް އައިމިނަތު ބުނޭ. އޭނާގެ މޫނުމަތިން ފެނުނީ އެ ހިތާމަ އާއި މާޔޫސްކަން.