އަޅުގަނޑު ބޭނުމީ ދުވެލި ހަލުވިކޮށް ނަތީޖާ ނެރެން: ރައީސް

ބޭނުންފުޅުވަނީ މަސައްކަތުގެ ދުވެލި ހަލުވިކޮށް، ނަތީޖާ ނެރެދެއްވަން ކަމަށާއި އެކަމަށް ސަރުކާރަށް އެއްބާރުލުން ދޭނެ ރައްޔިތުންގެ މަޖިލީހެއް ހޮވުން މުހިންމު ކަމަށް ރައީސް ޑރ. މުހައްމަދު މުއިއްޒު މިރޭ ވިދާޅުވެއްޖެ އެވެ.

ސަރުކާރުގެ ކޯލިޝަންގެ ތާއީދާ އެކު، މި މަހުގެ 21 ގައި ބާއްވާ ރައްޔިތުންގެ މަޖިލިހުގެ އިންތިހާބުގައި މާފަންނު އުތުރަށް ވާދަކުރައްވާ އެމްއެންޕީގެ ރައީސް މުހައްމަދު ނާޒިމްގެ ކެމްޕެއިނު ޖަލްސާގައި ރައީސް ވިދާޅުވީ، ކޮންމެ ދާއިރާއަކުން ވެސް ހޮވަންވީ، ސަރުކާރަށް އިހުލާސްތެރިވާނެ އަދި އެއްބާރުލުން ދޭނެ މެންބަރުންތަކެއް ކަމަށެވެ.

ސަފީރުންނަށް ރުހުން ދިނުން ފަދަ ސަރުކާރުން ނިންމަން ޖެހޭ ކުދިކުދި ކަންކަން މަޖިލިހުގެ އަޣުލަބިއްޔަތު ނެތި ނުނިންމޭ ކަމަށާއި ގައުމުގައި ހުރި ބޯހިޔާވަހިކަން ފަދަ ބޮޑެތި މައްސަލަތައް ހައްލުވާން އޮތީ މަޖިލީހުގެ ފުރިހަމަ ތާއީދު ލިބިގެން ކަމަށް އެ މަނިކުފާނު ވިދާޅުވި އެވެ.

ރައީސް ވިދާޅުވީ، ފާއިތުވީ ހަތަރު މަހެއްހާ ދުވަހު ފެށިގެން ދިޔައީ ސަރުކާރަށް ދަތިކޮށް، ކަންކަން ލަސްކުރަމުން ދާ ތަން ކަމަށާއި އެ ކަމުގެ އެންމެ ބޮޑު ހެއްކަކީ ތިން ވަޒީރުންނަށް އެއްވެސް ސަބަބެއް ނެތި ރުހުން ނުދިނުން ކަމަށެވެ.

މިހާރު މަޖިލިސް ތެރެއިން ފެނިގެން ދަނީ ސަރުކާރަށް އެއްބާރުލުން ނުދޭނެ މެންބަރުން ހޮވުމުން ވާނެ ގޮތް ކަމަށް ރައީސް ވިދާޅުވި އެވެ.

ސަރުކާރުން ތިބީ ތަރައްގީގެ ދުވެލި އަވަސްކޮށް، ނަތީޖާ ނެރެން ކަމަށާއި އެކަމަކު މިފަދަ މެންބަރުން ހޮވައިފިނަމަ ވަގުތު ބޭކާރުވެގެން ދާނެ ކަން ފާހަގަކުރައްވައި ރައީސް ވިދާޅުވީ އެ ކަންކަން ވާން އޮތީ ސަރުކާރު މެންބަރުން ހޮވައިގެން ކަމަށެވެ.

"ތަރައްގީއަށް ބާރު ދުވެލީގައި ތަރައްގީ އަށް ދެއްވާ ވޯޓަކަށް ވާނެ އަޅުގަނޑުމެންގެ ކެންޑިޑޭޓުންނަށް ދެއްވާ ވޯޓު. އެހެންނެއް ނޫން އަޅުގަނޑުމެންނާ ފިކުރު ދިމާ ނުވާ، ޖެއްސުން ކުރާނެ މިހާރު ވެސް އެ ހުރަސް އަޅާ ގޮތަށް ހުރަސް އަޅާ ބަޔަކު ހޮވައިފިއްޔާ އެއްވެސް ގެރެންޓީއެއް ނެތް. އަޅުގަނޑުމެންނަށް ކަންކަން ފާސްކޮށްދިނިއްޔާ ވާނީ،" ރައީސް ވިދާޅުވި އެވެ.

ރައީސް މުއިއްޒު ވިދާޅުވީ ރައްޔިތުން ވޯޓު ދޭނީ ތަރައްގީގެ ފިކުރަށް ކަން ޔަގީން ކުރައްވާ ކަމަށާއި ބޭނުންވަނީ އަމާންކަމާއެކު ގައުމު ގެންގޮސް، ރައްޔިތުން ބޭނުންވާ ނަތީޖާ ދައްކައިދިނުމަށް ކަމަށެވެ.

"ތަރައްގީ އަށް ދެއްވާ ވޯޓަކަށް އެ ވޯޓު މި ވަނީ އެ ވޯޓު ދިނީމާ ތަރައްގީގެ ފިކުރު، އަޅުގަނޑުމެންގެ ފިކުރުގައި ތިއްބެވި ނާޒިމް އާއި އަޅުގަނޑުމެންގެ ދެން ތިއްބެވި 92 ކެންޑިޑޭޓުން ހޮއްވެވީމާ އެ ދެވެނީ މުޅި ރާއްޖޭގެ ހުރިހާ ދާއިރާއެއްގެ ތަރައްގީ، އަޅުގަނޑުމެން މި ބޭނުންވާ، ރައްޔިތުން ބޭނުންވާ ހަލުވި ދުވެލީގައި ގެންދިއުމަށްޓަކައި ދެވޭ ވޯޓެއް،" ރައީސް ވިދާޅުވި އެވެ.