މަޖިލީހުން ބޭރުކުރި ޑިމޮކްރެޓްސް އަށް ބަނަ ކުރިމަގެއް؟

ޑިމޮކްރެޓްސްގެ "ފާރަވެރިވުން" ރައްޔިތުންގެ މަޖިލީހުގައި މުހިއްމެއް ނޫނެވެ؛ މި މެސެޖް އެ ޕާޓީއަށް ދިނީ ޒިންމާދާރުކަމާ އެކު އެކަން ކުރާނެ ކަމަކަށް ރައްޔިތުންނަށް ގަބޫލު ނުކުރެވޭތީ އެވެ. ނޫން ނަމަ، ނިމިގެންދިޔަ މަޖިލިސް އިންތިހާބުގައި ކުރިމަތިލީ 37 ދާއިރާ އިން އެންމެ ގޮނޑިއެއް ވެސް އެ ޕާޓީއަށް ދިނީހެވެ.

އުފެއްދިތާ އަހަރެއް ނުވާ ސިޔާސީ ޕާޓީއަކަށް ރައްޔިތުންގެ މަޖިލީހުން ގޮނޑިއެއް ނުލިބުން އެއީ މާ ބޮޑު ކަމެއް ނޫނެވެ. ނަމަވެސް ރާއްޖޭގެ ސިޔާސީ ދާއިރާގައި އެންމެ ތަޖުރިބާކާރު އަދި އަޑު ގަދަ މަޖިލިސް މެންބަރުންތައް އުފެއްދި ދަ ޑިމޮކްރެޓްސް އަށް މަޖިލީހުން އެންމެ ގޮނޑިއެއް ވެސް ކާމިޔާބު ނުކުރެވުމަކީ މީހުން ހީވެސް ނުކުރާ ކަމެކެވެ.

އެ ޕާޓީގައި ހިމެނިވަޑައިގަންނަވަނީ ސިޔާސީ ދާއިރާގައި އާ ބޭފުޅުންތަކެއް ނޫނެވެ. ކުރީގެ ރައީސް އަދި ރައްޔިތުންގެ މަޖިލީހުގެ ރައީސްކަން ކުރެއްވި މުހައްމަދު ނަޝީދާއި އެމްޑީޕީގައި އިސްލާހީ މަސައްކަތުުގައި އުޅުނު އެތައް އިސް ބޭފުޅުންނެއް އެ ޕާޓީގައި އެބަތިއްބެވި އެވެ. މަޖިލީހަށް ވާދަކުރެއްވި ގިނަ މެމްބަރުންގެ ތެރޭގައި ވެސް ތިއްބެވީ ސިޔާސީ ގޮތުން ތަޖުރިބާ ލިބިވަޑައިގެން ތިއްބެވި ބޭފުޅުންނެވެ.

ކުރިމަތިލީ 37 ދާއިރާ އެ ޕާޓީއަށް ކާމިޔާބު ނުކުރެވުނަސް މަޖިލީހުގެ ކުރީގެ ނައިބު ރައީސް ގަލޮޅު އުތުރު ދާއިރާގެ މެންބަރު އީވާ އަބްދުالله އާއި ޑިމޮކްރެޓްސްގެ ރައީސް، ހެންވޭރު ހުޅަނގު ދާއިރާގެ މެމްބަރު ހަސަން ލަތީފާއި މާފަންނު އުތުރު ދާއިރާގެ މެންބަރު އިމްތިޔާޒް ފަހުމީ އަދި މެދު ހެންވޭރު ދާއިރާގެ މެންބަރު އަލީ އާޒިމް ފަދަ ޒަމާނުއްސުރެ ގޮނޑި ދަމަހައްޓަމުން އައި މެންބަރުން ނަތީޖާ ޝީޓުގެ ފުލަށް ދިޔުމަކީ ވަރަށް ބޮޑު ކަމެކެވެ. އަދި އޭގެ ފަހަތުގައި ގިނަ ސަބަބުތަކެއް ހުންނާނެ އެވެ.

މި އިންތިހާބަށް ޑިމޮކްރެޓްސްގެ ލީޑާޝިޕް އެއްކޮށް ކަހަލަ ގޮތަކަށް އެކި ދާއިރާތަކަށް ކުރިމަތިލި އެވެ. އެ މެމްބަރުންނަކީ ނަޒާހަތްތެރި އަދި ޖަވާބުދާރީކުރުވާނެ މަޖިލީހުގައި ތިއްބަވަން ޖެހޭ ބޭފުޅުން ކަމަށް ޕާޓީ އުފެއްދެވުމުގައި އިސްކޮށް އުޅުއްވި ނަޝީދު ކެމްޕޭން ކުރެއްވި އެވެ.

ނަމަވެސް އެ ހުރިހާ މެންބަރުންނަށް ރައްޔިތުން ބޮޑު ތަނުން ނޫނެކޭ ބުނުމުން މިހާރު އެ ޕާޓީގެ މުސްތަގުބަލާ މެދު ވެސް އޮތީ ސުވާލު އުފެދިފަ އެވެ. ދުރުން ބަލާ މީހުންނަށް އެ މަންޒަރު ފެންނަނީ ވަރަށް ބަނަކޮށެވެ.

ޑިމޮކްރެޓްސްގެ އާއްމު މެމްބަރުން ހިތްހަމަނުޖެހުނު އެއް ކަމަކީ، އެ ޕާޓީގެ ކެންޑިޑޭޓުންނަށް ތާއީދުކުޑަވާ ގޮތަށް، މި ސަރުކާރުގެ ކެންޑިޑޭޓުންނަށް އިތުބާރު އުފެދޭ ގޮތަށް ވާހަކަ ދެއްކެވުމެވެ. ކެމްޕޭން ނިންމާލުމުގެ ޖަލްސާގައި މުޅިން ދެއްކެވީ، ނަޝީދާއި ޑިމޮކްރެޓްސްގެ މެމްބަރުންގެ ބައިވެރިވުމާ އެކު އުފެއްދި ސަރުކާރުގެ ގޯސްތަކެވެ.

"ގޮންޖެހުންތައް ގިނަ އިންތިހާބެއް"

ޑިމޮކްރެޓްސްއަށް މި އިންތިހާބުގައި އެހާ ބޮޑު ނާކާމިޔާބީއެއް ލިބުނު ސަބަބާ ގުޅޭ ގޮތުން "މިހާރު" އާ ވާހަކަ ދައްކަވަމުން އެ ޕާޓީގެ ރައީސް ހަސަން ލަތީފް ވިދާޅުވި ގޮތުގައި ޕާޓީގެ މެންބާޝިޕްގެ އަދަދު މަދުވުމުން ކުޑަ ޕާޓީއެއް ގޮތުގައި ސިފަ ކުރެވުނަސް ޕާޓީގެ ވިސްނުމާއި މެންބަރުންގެ ތަޖުރިބާ އަދި ރީޗް ވެސް ކުޑައެއް ނޫނެވެ.

އެހެން ނަމަވެސް މެންބަރުންގެ އަދަދު މަދުވުމުގެ ސަބަބުން ބޭނުންވާ ވަރަށް ސިޔާސީ ހަރަކާތް ނުހިންގޭ ކަމަށާއި ވޯޓު ހޯދުމަކީ އަބަދުވެސް އެ ހަރަކާތްތައް ވަރަށް ފުޅާ ގޮތެއްގައި ހިންގައިގެން ކުރަމުން އަންނަ ކަމެއް ކަމަށް އޭނާ ވިދާޅުވި އެވެ.

ޑިމޮކްރެކްޓްސްގައި 10,000 މެންބަރުން ހަމަ ނުވާތީ ސިޔާސީ ޕާޓީތަކާ ބެހޭ ގާނޫނުގެ ދަށުން އިލެކްޝަންސް ކޮމިޝަނުން އެ ޕާޓީއަކަށް ދައުލަތުގެ ބަޖެޓުން ހަރަދެއް ނުކުރާނެ އެވެ. އެހެންވެ ފަންޑިން ހޯދަން ޖެހޭނީ އެ ޕާޓީ އަށް ތާއީދު ކުރާ އެކި ފަރާތްތަކުންނެވެ.

ހަސަން ވިދާޅުވި ގޮތުގައި އެ ޕާޓީގެ ކެމްޕެއިނަށް ކަވަރޭޖެއް ހޯދަން މީޑިއާތަކުން ޕެކޭޖެއް ހޯދުމާއި ޑިމޮކްރެޓްސް އިން ވާދަ ކުރި ހުރިހާ ދާއިރާއެއްގައި ކެމްޕެއިންތަކާއި ރެލީތައް ބާއްވައި ވަރަށް ފުޅާކޮށް ސިޔާސީ ހަރަކާތް ހިންގާނެ ފައިސާ އާއި ވަސީލަތްތައް ނުލިބުނެވެ. އެއީ ވަރަށް ބޮޑު ގޮންޖެހުމެއް ކަމަށް އޭނާ ވިދާޅުވި އެވެ.

"މުޅި ރާއްޖޭގައި ހަރަކާތްތައް ހިންގޭނެ ވަސީލަތްތައް ނެތުމަކީ އެއީ ދިމާވި އެންމެ ބޮޑު އެއް ގޮންޖެހުން." ހަސަން ވިދާޅުވި އެވެ.

އޭނާ ވިދާޅުވި ގޮތުގައި "ސަރުކާރުން ހަދާހެން" ކޮންމެ ގެއަކަށް ވަދެ ވަޒީފާތައް ދިނުމަކީ ޑިމޮކްރެޓްސް އިން ކުރާނެ ކަމެއް ނޫނެވެ. އޭގެ ބަދަލުގައި އެ ޕާޓީގެ ވިސްނުމަކީ ސިޔާސީ ހަރަކާތް ހިންގުމާއި ހައްގުތަކާއި ގައުމުގެ ބޮޑެތި މައްސަލަތަކުގެ ހައްލުތައް ރައްޔިތުންނަށް ކިޔައިދީ މެނިފެސްޓޯއެއް ތައްޔާރު ކޮށްގެން ރައްޔިތުންނަށް އެ ވިއްކުމެވެ.

މީގެ 16 އަހަރު ކުރިން ސިޔާސީ މަސައްކަތްތައް ރާއްޖޭގައި ފަށައިގަތް އިރު ވެސް ރައްޔިތުންނަށް ވެގެންދާ ގޮތް ރަނގަޅަށް ކިޔައިދީ ގައުމު ހަމަ މަގަށް އެޅުވުނީ އެ ގޮތަށް މަސައްކަތް ކޮށްގެން ކަމަށް އޭނާ ވިދާޅުވި އެވެ.

ހަސަން ވިދާޅުވި ގޮތުގައި މެންބަރުންނާއި ވަސީލަތްތައް މަދުވިޔަސް އެ ޕާޓީގައި ތިބި މެންބަރުންނާއި ކެންޑިޑޭޓުންގެ ފަރާތުން ފެނިގެން ދިޔައީ އާދަޔާ ހިލާފަށް އެ ކަމަށް ޝައުގުވެރިވެ ވަރަށް ރަނގަޅު މަސައްކަތްތަކެއް ކުރި ތަނެވެ. އެ ދާއިރާއެއްގައި ބެނާތައް ހަރުކުރުމާއި ދޮރުން ދޮރަށް ހިންގުމާއި ކެމްޕެއިންގެ ގިނަ މަސައްކަތްތައް ވަރަށް ހިތްވަރާއެކު މެންބަރުން ކުރެއްވި ކަމަށް އޭނާ ވިދާޅުވި އެވެ.

"އަޅުގަނޑުމެން ދަސްކޮށްފައި ހުރި ސްޓައިލްގެ ކެމްޕެއިނެއް ކުރިން އެކަމަކު ވަސީލަތްތައް ނެތީމަ އޭގެ ސްކޭލް ކުޑައީ." އޭނާ ވިދާޅުވި އެވެ.

"ވީހާވެސް ގިނަ ގޮނޑި ކާމިޔާބު ކުރުމަކީ ވަރަށް މުހިންމު ކަމެއް. އެހެން ނަމަވެސް މި ފަހަރު އަޅުގަނޑުމެންނަށް މި އޮތީ އެ ނަތީޖާ ވަރަށް ނުރަނގަޅުކޮށް ލިބިފައި." އޭނާ ވިދާޅުވި އެވެ.

އެމްޑީޕީ/ޑިމޮކްރެޓްސް ވަކިވެގަތުމުން ގެއްލުން؟

ޑިމޮކްރެޓްސްގެ "އަސްލު ލީޑަރު" ރައީސް މުހައްމަދު ނަޝީދާއި އެ ޕާޓީގެ ކުރީ ސަފުގައި އަދި ޕާޓީގެ ހުރިހާ ގުނަވަނެއްގައި މިވަގުތު ތިއްބެވީ ކުރީގެ "އެމްޑީޕީ ފިކުރު" ގެ މެންބަރުންނެވެ. އޭގެ އިތުރުން ޑިމޮކްރެޓްސްގައި ތިބި ކަމަށް އިލެކްޝަންސްގެ ދަފްތަރުން ދައްކާ 4000 އަށް ވުރެ ގިނަ މެންބަރުންގެ ބޮޑު ބަޔަކީ ވެސް މީގެ އަހަރެއްހާ ދުވަސް ކުރިން އެމްޑީޕީ މެންބަރުންނަށް ވުން ވަރަށް ގާތެވެ.

އެ ހުރިހާ މެންބަރުން އެމްޑީޕީ ދޫކޮށް އާ ފިކުރެއް ދިރުވަން ޖެހުނީ އެމްޑީޕީން އެ ޕާޓީގެ އަސްލު އުސޫލުތައް ދޫކޮށްލުމުން ކަމަށް ބުނެ އެވެ.

އެހެން ނަމަވެސް އެއް ފިކުރެގެ ބޮޑު ޕާޓީ ދެބައި ވުމުގެ އަސަރު މިދިޔަ ދެ އިންތިހާބުގެ ނަތީޖާ އަށް ބަލައިލުމުން ވަރަށް ސާފުކޮށް ފެންނަން އެބަހުއްޓެވެ.

މިދިޔަ ރިޔާސީ އިންތިހާބުގައި އަދި މަޖިލިސް އިންތިހާބުގައި ވެސް އެމްޑީޕީން އަބަދުވެސް މެޖޯރިޓީ ހޯދަމުން އައި ގިނަ ދާއިރާތަކެއް އޮތީ ވަރަށް ބޮޑަށް ޕީއެންސީ އަށް އެނބުރިފަ އެވެ. އަދި ނަތީޖާތަކުން ދައްކާ ގޮތުގައި ޑިމޮކްރެޓްސް ނުވަތަ އެމްޑީޕީ އަށް ލިބެން އޮތް ވޯޓުތައް ދެ ބަޔަށް އޮންނަނީ ބެހިފަ އެވެ.

މިސާލަކަށް މެދު ހެންވޭރު ދާއިރާ އަބަދުވެސް ނަގަމުން އަންނަ އާޒިމް އަށް މި އިންތިހާބުގައި ލިބިވަޑައިގަތީ 249 ވޯޓެވެ. އަދި ކުރިން އޭނާ އަށް ތާއީދު ކުރި ގިނަ ބަޔަކު ހިމެނޭ އެމްޑީޕީ ކެންޑިޑޭޓު އިބްރާހިމް ޖަލީލް (އިބޫ ޖަލީލް) އަށް ލިބިވައިގަތީ 540 ވޯޓެވެ. އެ ވޯޓު ދެބައި ނުވި ނަމަ އެ ދާއިރާ މި ފަހަރު ކާމިޔާބު ކުރި ޕީއެންސީ ކެންޑިޑޭޓު ހުސެއިން ނާސިހު އަށް ވުރެ ގިނަ ވޯޓު އެއް ޕާޓީއަކަށް ހޯދޭނެ އެވެ.

އެމްޑީޕީން ކޮންޓްރޯލް ކުރި ވަރަށް ގިނަ ދާއިރާތަކުން ވެސް ހަމަ މި ނާތީޖާ ފެންނަން އެބައޮތެވެ.

އެކަމާ ގުޅޭ ގޮތުން "މިހާރު" އާ ވާހަކަ ދައްކަވަމުން އުނގޫފާރު ދާއިރާގެ މެންބަރު މުހައްމަދު ވަހީދު (ވައްޑޭ) ވިދާޅުވީ މިދިޔަ ރިޔާސީ އިންތިހާބުގައި ވެސް ރައީސް ޑރ. މުހައްމަދު މުއިއްޒު އަށް ވެރިކަމަށް އާދެވުނީ އެމްޑީޕީ ބައިބައި ވެފައި އޮތުމުގެ ސަބަބުންނެވެ.

އަދ މި މަޖިލިސް އިންތިހާބުގައި ވެސް އޭގެ އަސަރު ވަރަށް ބޮޑަށް ކުރާނެ ކަމަށް އޭނާ ވިދާޅުވި އެވެ. އަދި ނުރޫޅި ޕާޓީ ބަދަހިކޮށް އެމްޑީޕީ އޮތް ނަމަ އެއީ ރާއްޖޭގައި ސިޔާސީ ގޮތުން ބަލިކަށި ކޮށްލެވޭނެ ބައެއް ނޫން ކަމަށް އޭނާ ވިދާޅުވި އެވެ.

"އަޅުގަނޑުމެން އުފާ ކުރާ ކަމެއް ނޫން މިއީ. އެކަމަކު ރަނގަޅު ނޫން ކަންތައްތައް ހިނގާތީ އަޅުގަނޑުމެން ނުކުންނަން ޖެހުނީ." ވައްޑޭ ވިދާޅުވި އެވެ.

އެހެން ނަމަވެސް "މިހާރު" އާ ވާހަކަ ދައްކަވަމުން މާފަންނު މެދު ދާއިރާގެ މެންބަރު އިބްރާހިމް ރަޝީދު (ބޮންޑޭ) ވިދާޅުވި ގޮތުގައި އެމްޑީޕީގެ ސަޕޯޓަރުންނާއި ޑިމޮކްރެޓްސް ތެރޭގައި ވެސް ރައީސް އިބްރާހިމް މުހައްމަދު ސޯލިހަށް އަލުން ބާރުތަކެއް ލިބޭ ގޮތަށް ކަންކަން ނުދިޔުމަށްޓަކައި ސަރުކާރަށް ވޯޓުލި ފަރާތްތަކެއް އެބަ ތިއްބެވެ.

އެމްޑީޕީން ގެންދިޔައީ ސީދާ މިހާރު އޮތް ސަރުކާރު އަޒުލު ކުރުމުގެ ވާހަކަ ދައްކައިގެން ކެމްޕެއިން ކުރަމުން ކަމަށާއި އެކަން ވިޔަ ނުދޭން އެތައް ބަޔަކު މަސައްކަތް ކުރި ކަމަށް އޭނާ ވިދާޅުވި އެވެ.

"އިބޫ ނޫން ގޮތެއް ހޯދަން ސަރުކާރަށް މަސައްކަތް ކޮށްދިން ތަން ފެނުން ކެމްޕެއިން ޖަގަހަ ތަކުގައި ތިބެގެން." އޭނާ ވިދާޅުވި އެވެ.

އެހެން ނަމަވެސް މިހާރު އެމްޑީޕީގެ ލީޑާޝިޕްގައި އޮތީ އެމްޑީޕީ އުފަން ކުރުވި އެ ފިކުރުގެ ބައެއް ނޫން ކަން ރައްޔިތުންނަށް އެނގިއްޖެ ކަމަށް ބޮންޑޭ ވިދާޅުވި އެވެ. އެހެންވެ އެ ޕާޓީ ރޫޅާލުމުގެ ރޫހު އަދިވެސް ވަރަށް ބޮޑަށް އެބައޮތް ކަމަށް އޭނާ ވިދާޅުވި އެވެ.

އެކަމާ ގުޅޭ ގޮތުން ހަސަން އާ ސުވާލު ކުރުމުން އޭނާ ވިދާޅުވި ގޮތުގައި އެމްޑީޕީ އާ ވަކިވުމަކީ އެ ޕާޓީ އަށް ވޯޓު މަދުވާން މެދުވެރިވި ސަބަބަކަށް ވުން އެކަށީގެންވާ ކަމަށާއި ހަމަ އެގޮތަށް އެމްޑީޕީ މިހާރު ބަދަލުވެފައި އޮތް ގޮތުން އެ ޕާޓީން ވަކިވެ އާ ފިކުރެއްގައި މަސައްކަތް ކުރަން އުޅުމަކީ އެ ޕާޓީ އަށް ވޯޓުތަކެއް ލިބެން ވެސް މެދުވެރިވި ވަރަށް ބޮޑު ސަބަބެކެވެ.

އެމްޑީޕީން މިހާރު އަމަލު ކުރަމުން އެ ގެންދާ އުސޫލުތަކާ މެދު ވަރަށް ބޮޑަށް ހިތްހަމަ ނުޖެހޭ އެތައް ބަޔަކު ތިބި ކަމަށް ހަސަން ވިދާޅުވި އެވެ. ސީދާ އޭގެ ސަބަބުން ގެއްލުން ވާނީ ކިހާ ވަރަކަށްތޯ އެނގޭނީ ރަނގަޅު ދިރާސާތަކެއް ހަދައިގެން ކަމަށް އޭނާ ވިދާޅުވި އެވެ.

އެހެން ނަމަވެސް ކުރިޔަށް އޮތްތަނުގައި ވެސް އެ ޕާޓީން މަޝްވަރާގެ އުސޫލުން ކަންކަން ރަނގަޅު ކުރުމުގެ މަސައްކަތްތައް ކުރަމުން ގެންދާނެ ކަމަށް ހަސަން ވިދާޅުވި އެވެ.

"އަޅުގަނޑުމެންނަކީ ސިޔާސީ ޕާޓީތަކާ ވާހަކަ ދައްކާ ބައެއް މަޝްވަރާތައް ހުރިހާ ޕާޓީއަކާ ވެސް އަބަދވެސް ހިނގާނެ އެކި ޕާޓީއާ އެކީ ހިނގަނީ. އެ މަޝްވަރާތައް ކުރަމުން ގެންދާނެ." އޭނާ ވިދާޅުވި އެވެ.

"ބަދަލެއް ގެންނަން ޖެހޭ. ކުރިމަގު އޮތީ އުޖާލާކޮށް"

ރާއްޖޭގެ ސިޔާސީ މަސްރަހަށް މިހާރު މިދާ ގޮތާ މެދު ކަންބޮޑުވުން ފާޅު ކުރައްވައި ވައްޑޭ ވިދާޅުވި ގޮތުގައި މަޖިލީހަކީ ރައްޔިތުންގެ އެންމެ ބޮޑު ބާރެވެ. އެހެން ނަމަވެސް މިހާރު އެއީ ރައްޔިތުންގެ މަޖިލީހެއްތޯ ނުވަތަ ސަރުކާރުގެ މަޖިލީހެއްތޯ ވަކި ނުވާ ހިސާބަށް ގޮސްފައިވާ ކަމަށް އޭނާ ވިދާޅުވި އެވެ.

ގާނޫނުއަސާސީ އާއި ގާނޫނުތައް ބުނާ ގޮތުން އިންތިހާބުތަކުގައި ހަމަހަމަ ކަމާއެކު ވާދަ ކުރުމުގެ ފުރުސަތު ހުރިހާ ކެންޑިޑޭޓުންނަށް ވެސް ލިބެން ޖެހޭ އިރު އެއް ފަރާތުން ކެންޑިޑޭޓުން ނުކުންނަނީ މިނެއް ނެތި ސަރުކާރުގެ ވަޒީފާތަކާއި ބޯހިޔާވެހިކަމާއި ރަށުގެ ތަރައްގީ އާއި އިދާރީ އިހުތިސާސްތައް ބަދަލު ކުރުމާއި އާސަންދަ އާއި އެންސްޕާގެ ބޭނުން ހިފަމުން ކަމަށް އޭނާ ވިދާޅުވި އެވެ.

"މިހާރު އާދައިގެ މީހަކަށް ދައުލަތާ ވާދަ ކުރުމަކީ ކެރި ކުޅަދާނެ ވާނެ ވަރުގެ ކަމެއް ނޫން،" ވައްޑޭ ވިދާޅުވި އެވެ.

ހަސަން ވެސް ވިދާޅުވި ގޮތުގައި އެގްޒެކެޓިވް ބާރުތަކާއި ރައްޔިތުންގެ މަޖިލީހުގެ ބާރަކީ ކޮބައިކަން ވޯޓުލާ ފަރާތްތަކަށް ވަރަށް ރަނގަޅަށް ކިޔައިދޭން އެބަ ޖެހެ އެވެ. އަދި ގާނޫނުއަސާސީގައި އޮތީ ކޮން ވާހަކަތަކެއްތޯ އާއި ބާރުތައް ބެހިފައި އޮންނަ ގޮތާއި މި ނިޒާމު ރަނގަޅަށް ހިންގުމުން ރައްޔިތުންނަށް ވާނެ ފައިދާތައް ވިސްނައިދޭން ޖެހޭ ކަމަށް އޭނާ ވިދާޅުވި އެވެ.

ޑިމޮކްރެޓްސް އިން ކުރިޔަށް އޮތް ތަނުގައި އެންމެ ބޮޑަށް ކުރަމުން އަންނާނީ އެ މަސައްކަތް ކަމަށް އޭނާ ވިދާޅުވި އެވެ.

"އެއީ ކުޑަ މަސައްކަތެއް ނޫން، މުހިންމު މަސައްކަތެއް، އެހެން ޕާޓީއަކުން ނުކުރާ މަސައްކަތެއް،" ހަސަން ވިދާޅުވި އެވެ.

"އަޅުގަނޑަށް ފެންނަނީ ވަރަށް އުޖާލާކޮށް އެ މަސައްކަތް ކުރަން މި އޮތީ. އެ މަސައްކަތުން އަޅުގަނޑުމެންނަށް މުޅި ރާއްޖެ އަނބުރާ ލެވޭނެ. ނުރަނގަޅު ސަގާފަތްތައް ދުއްވާލެވޭނެ. އަޅުގަނޑުމެންގެ ތެރޭގައި ހުނަރުވެރި އަދި އެކްސްޕީރިއަންސް ޕޮލިޓީޝަނުންނާއި ޓެކްނިކަލް ބޭފުޅުން އެބަތިބި." އޭނާ ވިދާޅުވި އެވެ.

އެ މަސައްކަތް ފެށުމާ ހަމައަށް، ރައްޔިތުން މި އިންތިހާބުގައި އެ ޕާޓީ އަށް އިތުބާރު ނުކުރީ އެވެ. ފާރަވެރި މަޖިލީހަކަށް، ކުރާނެ ކަމަށް އާއްމުކުރި އެޖެންޑާ އަށް ތާއީދު ނުދިނީ އެވެ. ހަސަން ވިދާޅުވި ގޮތަށް ރައްޔިތުންނަށް ގަބޫލުކުރެވޭ ބަދަލެއް، ޕާޓީން ދައްކައި އަލުން އިތުބާރު އުފައްދަން ޖެހެ އެވެ.