21 މެއި 2024 - 20:58
މިފްކޯގެ ސީއީއޯ އަދި މެނޭޖިން ޑިރެކްޓަރު ކަމުގައި ހުންނެވި އަހުމަދު ސަމާހު ރަޝީދު އެ މަގާމުން މިއަދު ވަކިކޮށްފި އެވެ.
ކުންފުނިތަކަށް ވެރިން އައްޔަންކުރުމުގެ ބާރު ލިބިގެންވާ ޕްރައިވަޓައިޒޭޝަން އެންޑް ކޯޕަރޭޝަން ބޯޑު (ޕީސީބީ)އިން މިރޭ ބުނީ، ސީއީއޯ ކަމުންނާއި ކުންފުނީގެ ބޯޑުން ސަމާހު ވަކި ކޮށްފައިވާ ކަމަށެވެ.
ނަމަވެސް އޭނާ ވަކި ކުރީ ކޮން ސަބަބަކާ ގުޅިގެން ކަމެއް ޕީސީބީން ނުބުނެ އެވެ.
ޕީސީބީއަށް ހުށަހެޅި ޝަކުވާތަކާ ގުޅިގެން ސަމާހު ވަނީ މީގެ ކުރިން ސަސްޕެންޑު ކޮށްފަ އެވެ. އޭނާ ސަސްޕެންޝަނުން ވީއްލިފައިވަނީ މިދިޔަ މަހު އެވެ.
އޭނާ ސަސްޕެންޑް ކުރުމުގެ ކުރިން 12 ނުކުތާއެއް ހިމެނޭ ސިޓީއެއް ޕީސީބީން މިފްކޯ އަށް ފޮނުވި އެވެ. ޕީސީބީގެ ނައިބު މުހައްމަދު ފިރާޒް މަޖިލިސް ކޮމިޓީގައި އޭރު ވިދާޅުވި ގޮތުގައި، އޭގެ ތެރޭގައި ނުވަ ވަރަކަށް ހުލާސާ މައްސަލަ ހުރި ކަމަށާއި ތަފާތު ފަސް ތުހުމަތެއް ސަމާހުގެ މައްޗަށް ކުރެވުނެވެ.
އޭގެ ތެރޭގައި އިންތިހާބު ތެރޭގައި ސިޔާސީ ބޭނުމަށް މިފްކޯގެ އިމާރާތް ބޭނުން ކުރުމާއި ގިފްޓް ހެމްޕާތައް ދިން މައްސަލަ އާއި ދަތުރުތަކުގައި 1.3 މިލިއަން ހަރަދު ކުރުމާއި އާއިލީ ބޭފުޅުންނަށް ވަޒީފާތައް ދޭ މައްސަލަ ހިމެނޭ ކަމަށް ވެސް އޭނާ ވިދާޅުވި އެވެ.
ޕީސީބީން އޭރު ބުނީ ސަމާހު ސަސްޕެންޑުކުރީ އެ މައްސަލައިގައި ފިޔަވަޅު އެޅުމުގެ ގޮތުން ނޫން ކަމަށާއި އެއީ އެއްވެސް ނުފޫޒެއް ނެތި އެކަންކަން ފުރިހަމަ އަށް ތަހުގީގު ކުރުމަށްޓަކައި އިދާރީ ގޮތުން ވަގުތީ ގޮތުން އެކަހެރި ކުރަން ނިންމި ނިންމުމެއް ކަމަށް ބުނެފަ އެވެ.
- ކުންފުނީގެ މުދަލާއި ވަސީލަތްތައް އަމިއްލަ ބޭނުމުގަ އާއި ސިޔާސީ ބޭނުންތަކަށް ބޭނުންކުރުން.
- ކުންފުނީގެ ދާއިމީ މުވައްޒަފުން ނުހައްގުން ވަޒީފާގެ މަސްއޫލިއްޔަތުން ދުރުކުރުމާއި ވަޒީފާގެ ބިރު ދެއްކުމާއި ދާއިމީ މަގާމުތަކުގައި ތިބި މުވައްޒަފުން ވަޒީފާއާ ބެހޭ ގާނޫނާ ހިލާފަށް ސަބަބެއް ނެތި މަގާމާއި މުސާރަ ދަށްކުރުން އަދި އެހެން ޑިޕާޓްމަންޓްތަކާއި ރަށްތަކަށް ބަދަލުކުރުން.
- ކުންފުނީގެ މުވައްޒަފުން ނެގުމާއި ގުޅޭގޮތުން ހަދާފައިވާ ޕޮލިސީތަކާއި މުސާރައިގެ އޮނިގަނޑާއި ހިލާފަށް ސީއީއޯގެ އާއިލީ ގުޅުން ހުރި ފަރާތްތަކަށް ރައްޓެހިންނަށް ބަޖެޓުގައި ހިމަނާފައިނެތް ނަމަވެސް ވަޒީފާ ދިނުން.
- ގަވަނަންސް އުސޫލުތަކާ ހިލާފަށް ހެޑް ހަންޓްކުރުމުގެ ނަމުގައި މުވައްޒަފުންގެ ގަވާއިދާ ހިލާފަށް އެއްވެސް އާންމުކޮށް އިއުލާނުކުރުމަކާ ނުލާ މީހުން ވަޒީފާއަށް ނެގުން.
- ޕީސީގެ ހުއްދަ ހޯދުމަކާ ނުލާ ކުންފުނީގެ މަގާމުތައް އުފައްދައި އެ މަގާމުތަކަށް މީހުންލުން.
- އެކަށީގެންވާ ތައުލިމާއި ތަޖުރިބާ ނެތް މީހުން އުސޫލުން ބޭރުން ޑިޕާޓްމަންޓުތަކުގެ ވެރިންނަށް ލުން.
- ސީއީއޯ ރަސްމީ ދަތުރުތަކުގައި ދާއިރު ކުންފުނީގައި ހެދިފައިވާ ޑެލިގޭޝަން މެޓްރިކްސްއާ ހިލާފަށް ކަމާ ނުބެހޭ މުވައްޒަފުންނާ ކުންފުނި ހިންގުން ހަވާލުކުރުން. އަދި ކަމާ ނުބެހޭ މުވައްޒަފުން ދަތުރުތަކުގައި ގެންދިއުން.
- ކުންފުނީގައި އޮޓް ބިޑް ކޮމިޓީ ބަދަލުކޮށް ބެސްޓް ޕްރެކްޓިސްއާ ހިލާފަށް ގާތް މީހުން ކޮމިޓީއަށް ލުން.
- ކުންފުނީގެ މުވަައްޒަފުން ނޫން ފަރާތްތަކަށް ކުންފުނީގެ ސެކިއުރުޓީ ޕްރޮސީޖާ އާއި ހިލާފަށް ކުންފުނީގެ ތަންތަނަށް ވަދެ، ނުކުމެ އުޅުމުގެ ފުރުސަތު ހުޅުވާލާފައި ބޭއްވުމާއި އެކްސެސް ލިބުން.
- ރަސްމީ ބޭނުންތަކުގައި ނޫން ގޮތަށް ސީއީއޯގެ އާއިލާ މީހުން އޮފީހަށް ގެނައުން.
- ކުންފުނީގެ މާލީ ހާލަތު ހުރި ގޮތް ނުބަލާ، ސީއީއޯ ރާއްޖެއިން ބޭރަށް ދިއުމާއި ދަތުރުކުރާއިރު ބިޒްނަސް ކްލާސް ބޭނުންކުރުމާއި މަސައްކަތާ ނުގުޅޭ މުވައްޒަފުން ދަތުރު ގެންދިއުން.
- ކުންފުނީގެ އިންޓާނަލް އޮޑިޓް ޑިޕާޓްމަންޓް އުވާލާނެ ކަމުގެ ބިރު ދެއްކުމާއި އިންޓާނަލް އޮޑިޓްގެ މަސައްކަތްތައް މިނިވަންކަމާ އެކު ކުރިއަށް ގެންދަން ހުރަސް އެޅުން.
އެކަމަކު ސަމާހް ވަނީ މި ތުހުމަތުތައް ދޮގުކުރައްވައިފަ އެވެ. ޕީސީބީން މައްސަލަ ބެލުމަށް ފަހު ސަސްޕެންޝަން އުވާލުމުން އޭނާ ވަޒީފާއަށް ވެސް ނުކުންނެވި އެވެ.
Copyright © 2025 Mihaaru · Terms and Conditions · Privacy Policy
ކޮމެންޓްތައް
މިޒްނާާ
23 May 2024
އިސްމަގާމްތަކުގަ ތިބެގެން މިކަހަލަ ކަންކަން ކުރީމާ ފިޔަވަޅު އެޅުން އެއީ ވެރިޔާގެ މައްޗަށް ލާޒިމްކަމެއް. މީގެންވެސް އެގެނީ ރައީސް މުއިއްޒަކީ ރައްޔިތުންގެ މުދަލަށް ބަލާނެ ވެރިޔެއްކަން.
އަލްސަންް
23 May 2024
ފުރަތަމަ ދުވަހުވެސް ރައީސްވަނީ ކޮރަޕްޝަންއަށް ޖާގައެއް ނުދޭނެވާހަކަ އަންގަވާފައި. އެހެންކަމުން ރައީސް އެ ބަހުގެ ހިފެހެއްޓުމަކީ ރައީސްއަށް އޮތް އިތުބާރު އިތުރަށް ބޮޑުވެގެންދާނެ ކަމަކަށް.
މާޖިދާާ
23 May 2024
ރައީސް މުއިއްޒުގެ ޒައާމަތުގައި މިކަހަލަ ކަންކަމަށް އޯކޭއެއްނުވާނެ. ފެނަކަ ސައީދު އޭރު ފެނަކަ ދަވާލި އިރު އެކަކަށް އެއްވެސް އެއްޗެކޭ ބުނަން ނުކެރުނު. މި ސަރުކާރު އެހެން އަނގަބަންދުވެފަ ނުހުންނާނެ.
މަސްލަހަތު
22 May 2024
މުސާރަ ދޭގޮތަށްބާ
މަހްޒޫމް އަލީ
22 May 2024
މިހެންވެ ބުނަނީ މިސަރުކާރުން ކޮރަޕްޝަންއަށް ނޫނެކޭ ބުޑުތަނުން ނޫނެކޭ ބުނާނެޔޭ!
އާސިމް ރިޒާ
22 May 2024
މިސަރުކާރުން މިދިޔަ ސަރުކާރުހެން މަހްލޫފް ސަރުކާރު ބޭޒާރު ކުރާނެޔޭ ބުނީމަ މައްސަލައެއް އަބުރާ ނުގެންދާނެ. ފިޔަވަޅު އެޅުމުގައި މިސަރުކާރުން ނަމޫނާ ދައްކާ މަންޒަރު މިފެންނަނީ. މިހާރު 4 ޑެޕިއުޓީންވެސް ތިބީ ސަސްޕެންޑްކޮށްފަ.
މުހައްމަދު މަފާޒް
22 May 2024
މިސަރުކާރުން ކުންފުންޔެއްގެ އެމްޑީއަކަސް ގޯސްކަމެއް ކޮށްފިނަމަ ފިޔަވަޅު އަޅާނެ. އެކަން ފެނިގެން މިދިޔައީ.
ސިފަތުﷲ ހަސީބް
22 May 2024
މިދިޔަ ސަރުކާރު އޮތީ މަހްލޫފްއަށް ފިޔަވަޅު އަޅަންވެސް ނުކެރިފަ.
އަކްމަލް އަލީ
22 May 2024
ބަރާބަރު. މިހެން ވާން ޖެހޭނެ. ކުއްކުރާ ކޮންމެ މީހަކަށް ހައްގު އަދަބު ދޭންވާނެ. އެ ވަރިހަމަ ކިތަންމެ ނުފޫޒް ގަދަ މީހަކަސް.
ހަލީމަތު
22 May 2024
ހައްގު އަދަބުދޭތަން ފެންނާނެ ބަލަންހުރޭ.
އައުޒަމް އަލީ
22 May 2024
މިއީ އަހަރުމެން ބޭނުންވަ ޒީރޯ ޓޮލެރެންސްއަކީ. ސަރުކާރުގެ ވަރުގަދަ ފިޔަވަޅެއް މިއީ