ހަމްދާ ޕޯޑިއަމްގައި ކިޔައި ނުދިން ހުރިހާ ވާހަކައެއް

ފާތުމަތު ހަމްދާ މުހައްމަދު ރާއްޖޭގައި 'އަނގަމަތީ' ނަމަކަށް ބަދަލުކޮށްލި 'ޑިމޮކްރެޓްސްގެ ހަރުގޭ ސްޕީޗް' ގެ ވާހަކަ އަދި އިހަށް ބާއްވަމާ ހިނގާށެވެ. އަހަންނަށް ގަބޫލުކުރަން ދަތިވީ އޭނާ އަށް އަދި އެންމެ 22 އަހަރޭ ބުނީމަ އެވެ. މިހާ ހަގު އުމުރެއްގައި މިހާ ބޮޑު ނުފޫޒެއް އުފައްދައިދޭ ވަރުގެ ޝަހުސިއްޔަތެއް މި ނޫކަށިފުރައިގެ ޒުވާނާ އުފަންކުރުވީ ކިހިނަކުން ހެއްޔެވެ؟ ފަރިތަ ދުލަކުން ވިރުވައި އަޅަމުން ދާއިރު އޭނާއާ އެއްވަރަކަށް ފިޔަވަޅު ނަގަމުން އެދާ ކޮންފިޑެންސާއި ކެރިޒްމާ އާއި އެނާޖީ އަކީ ކޮންތާކުން އުފަންވެގެން އައި ބާރުތަކެއްތޯ އެވެ؟

ހަގީގަތަކީ، އެންމެނަށް ވުރެ ދެ ތިން ފިޔަވަޅު ކުރީގައި އުޅޭށޭ ބުނެ އޭނާގެ އަތުގައި ހިފައި ދަމަމުން ގެންދާ ޝައުގުވެރިކަމެވެ.

"އަހަންނަކަށް ވެސް ގަބޫލެއް ނުކުރެވޭ އަހަރެންނަށް 22 އަހަރު ކަމެއް. މަންމަ ކައިރީގައި ބުނަން ދޮގުނަހަދާ ބުނާށޭ ބާތު ސެޓިފިކެޓް ފޯޖުކޮށްފައޭ މި އޮތީ،" ހީގެންފައި ހަމްދާ ބުނެލި އެވެ.

ގދ. ރަތަފަންދޫ އާއި ގދ. ތިނަދޫގައި އުޅެ ބޮޑުވި ހަމްދާ މީގެ ދެ އަހަރު ކުރިން 'ވައިރަލްކޮށްލި' ހަރުގޭގެ ސްޕީޗަކީ އޭނާ ގޮސް ޕޯޑިއަމެއް ކައިރީގައި ހުއްޓި، އޭނާގެ ކިބައިގައިވީ ވާހަކަ ދެއްކުމުގެ ހުނަރުން އާންމުން ހައިރާންކޮށްލި ފުރަތަމަ ދުވަހެއް ނޫނެވެ. ސިންގަލް ޕޭރެންޓަކާ އެކު އުޅެބޮޑުވި ހަމްދާގެ ކޮންމެ ދުވަހަކީ ވެސް އޭނާގެ ވަށައިގެންވީހާ ބަޔަކު ހައިރާންކޮށް އަންތަރީސްކުރަމުން ގެންދިޔަ ދަތުރެކެވެ. އެކަމަކު އެންމެ ފުރަތަމަ ވަށް ބުރެއްގަ އެވެ.

ގޭތެރޭގައި އޭނާ އަކީ ބެލެނިވެރިއެކެވެ. ސްކޫލްގައި ޕްރިފެކްޓެކެވެ. ކެޕްޓަނެކެވެ. ނުވަތަ އަބަދުވެސް ކޮންމެވެސް ހަރަކާތެއްގައި އެންމެ އިސްކޮށް އުޅުނު އެންމެ މޮޅު ދަރިވަރެވެ. އެންމެ ވަރުގަދަ ލީޑަރެކެވެ. އަދި ސެކަންޑްރީ ގްރޭޑުގެ ކިޔެވުން ފެށުމުގެ ކުރިން އޯލެވެލް ހަދައި ރަށުގެ އެހެން ކުދިންނަށް ޓިއުޝަން ދެމުން އޭނާ އޭރު ގެންދިޔައީ ފުދޭވަރެއްގެ ރަނގަޅު އާމްދަނީއެއް ވެސް ހޯދަމުންނެވެ. ރަށުގެ އެ ތޮށިގަނޑު ފަޅާލާފައި ނުކުންނާނެ ގޮތަކާ މެދު ވިސްނައި ފިކުރުކޮށް އޭނާގެ އެ ދަތުރަށް ފައިސާ ވެސް އެއްކުރަމުންނެވެ. ހަމްދާގެ ހިޔާލުގައިވީ ސިޔާސީ ޕޯޑިއަމެއް ނޫނެވެ.

"ސެކަންޑްރީ ސްކޫލްގައި ކިޔަވަން އުޅުނުއިރު އަޅުގަނޑު ހީކުރީ ކިޔަވައި ނިމިގެން އަޅުގަނޑު ވާނީ ޕްރޮފެޝަނަލް އެތުލީޓަކަށޭ. އެކަމަކު ގްރޭޑް 10 ނިންމާލާފައި އަޅުގަނޑު މާލެ އަށް ބަދަލުވީ ބިކޯޒް އައި ޑްރެމްޓް އޮފް ބިގާ ތިންގްސް. އަދި ރަށުގައި އުޅެގެން އެ ހުވަފެންތައް ހަގީގަތަކަށް ހަދަން އުނދަގޫވާނެތީވެ،" އޭނާ ރަށުން ފުރައިގެން އައީ ސްކޫލްގެ ކިޔެވުން ނިމުނު ދުވަހުގެ ފަހު ދުވަހު އެވެ.

ޓީވީއެމްގެ ސްކްރީން ޓެސްޓެއް އޭރު އޭނާ އަށް ކަށަވަރުވެއްޖެ އެވެ.

"ޕްރެޒެންޓިން އަށް ޝައުގުވެރިވާވަރު ބޮޑުކަމުން ރަށުގައި އުޅުނުއިރު ވެސް އަޅުގަނޑު ޓީވީއެމް އަށް އަބަދުހެން ގުޅައިގެން އެ މީހުންނަށް ޔަގީންކޮށްދޭން މަސައްކަތްކުރީ އަޅުގަނޑުގެ އެ ސްކިލް އެބަހުރިކަން. ސްކޫލްގައި އުޅުނުއިރު ވެސް އަޅުގަނޑު އެންމެ ޝައުގުވެރިވިކަމާ އެކު ދަސްކުރި އެއްކަމަކީ ވާހަކަ ދެއްކުމާއި ހުށަހަޅައިދިނުން،" ހަމްދީ ކިޔައިދިނެވެ.

ހަމްދާގެ ކިބައިގައިވީ އެ ހުނަރު ފެނި، ޓީވީން ސޮނިވެއްޓި ވަގުތުން ވަގުތަށް އެމީހުން އޭނާ 'ހަޔާކޮށްފި' އެވެ. އެއީ 16 އަހަރުގެ ހަމްދާ އެވެ. އޭނާ އުޅުނީ ހަމަ އަސްލަށް ވެސް އުމުރަށް ވުރެ މާ ގާބިލު އަދި މާ ބާރު ދުވެއްޔެއްގަ އެވެ.

އެކަމަކު މި އިންޓަވިއުގެ ސުވާލުތަކާ އަރައި ހަމަވުމުގެ ކުރިން ހަމްދާ ދެން ކިޔައިދިނީ ވަރަށް ޝައުގުވެރިވި ވާހަކަ އެކެވެ.

"މީހުންނަށް ހީވެދާނެ އަޅުގަނޑު ވާހަކަ ދައްކާއިރު ހަމްދާ ވަރަށް ކޮންފިޑެންޓްކޮށޭ ވާހަކަ ދައްކަނީ. އެކަމަކު އަޅުގަނޑު އެހާ ކޮންފިޑެންޓެއް ނޫން. އައި އޭމް ނާވަސް އެވްރިޓައިމް. ފިނިވެ ތުރުތުރުލާ ހަމަ. އެކަމަކު އަޅުގަނޑަށް ދަސްވެފައި ހުރި ކަމަކީ އެ ހާސްކަމުގެ ތެރޭގައި ވެސް ކުރިއަށް ދާން. އެ ހާސްކަމާ ކުރިމަތިލާން،" މަންމައާ އެކު ރަށުގައި އެކަނި ހޭދަކުރި ދުވަސްތައް ނަގައިދިން ފިލާވަޅުތަކަކީ މިހާރު މި ފެންނަ ހަމްދާގެ އުފެދުން ކަމަށް އޭނާ ސިފަކޮށްލި އެވެ.

"ސްޓޭޖަކަށް އަރައި ވާހަކަ ދެއްކި ކޮންމެ ފަހަރަކީ ބިރުގަނެ ހާސްވި ތަޖުރިބާއެއް. ހަމަ ވަރަށް ބިރުގަނޭ. އެކަމަކު ބިރުން ފިލަން ދާނެ މީހެއް ނޫން އަޅުގަނޑަކީ"

"ސަބަބަކީ އަޅުގަނޑު އުޅެ ބޮޑުވި މާހައުލާއި ތަޖުރިބާ އަޅުގަނޑަށް ދަސްކޮށްދިނީ ދިރިއުޅުމުގައި ދިމާވާ ކަންކަމާ ކުރިމަތިނުލައި ރެކި ސަލާމަތްވާކަށް ނޫން. އެ ތަޖުރިބާ އަޅުގަނޑަށް ދަސްކޮށް ދިނީ ކުރިމަތިވި ކޮންމެ ކަމަކާ ކުރިމަތިލައި އޭގެ ތެރެއިން ކުރިއަށް ދާން."

ހަމްދާގެ މި އިންޓަވިއު އަކީ އެއްގޮތަކަށް ވެސް ސިޔާސީ ފްރީ ޕީއާރެއް ނޫނެވެ. ސިޔާސީ ވާހަކަތަކެއް ވެސް ނޫނެވެ. އެކަމަކު އޭނާގެ ޒުވާންފުރައިގެ ހަލަބޮލިވި މި ދިރިއުޅުމަށް އޭނާ ހޯދި ތަސައްލީ އެވެ.

ހަމްދާ: ވަރަށް އުފާވެއްޖެ ތި ސުވާލުކުރީތީ. ނަފުސާނީ ގޮތުން އެވަރުގެ ހާލަތަކަށް އަޅުގަނޑު ގޮސްދާނެ ކަމަށް ހީކޮށްގެން ތި ސުވާލުކުރި މީހަކާ ދިމައެއް ނުވޭ އޭރަކު. ނަފުސާނީ ގޮތުން މީހަކަށް ކޮށްފާނެ އަސަރަކަށް ހަމަ އެއްވެސް ބެލުމެއް ނެތި ހިތަށް އެރި އެއްޗެއް މީހުން ކިޔަމުން ދިޔައީ.

ތެދުތެދަށް ބުނަނީ ނަމަ އަޅުގަނޑަކަށް ހަމަ އެއްވެސް ވަރަކަށް އެނގިފައެއް ނެތް އޯވަނައިޓަކުން އަޅުގަނޑު އެގޮތަށް ވައިރަލް ވެދާނެ ކަމަކަށް. އެ ސްޕީޗް ދީފައި ޖެހިގެން އައި ދުވަހު ހެނދުނު ހޭލިއިރު އަޅުގަނޑުގެ ފޯނު އޮތީ ނޮޓިފިކޭޝަންތަނުން ފުރިފައި. ދުވަހަކުވެސް ހަޔާތުގައި ނުކުރާ ތަޖުރިބާއެއް އެއީ.

އެކަމަކު ކުޑައިރު އަޅުގަނޑު ހިތަށް އަބަދުވެސް އެރީ މަޝްހޫރު މީހަކަށް ވީމަ ހާދަ ސަޅިވާނެއޭ ލައިފް. އަހަރެން ވެސް މަޝްހޫރުވެއްޖެ ނަމަ އެކަން ވާނީ ވަރަށް ސަޅި ކަމަކަށޭ. އެކަމަކު ގެއިން ނުކުތީމަ ކުއްލިއަކަށް މި އިހުސާސުވަނީ މިހާރު އެންމެނަށް އަޅުގަނޑުގެ ނަން އެބަ އެނގެއޭ. އެންމެނަށް އަޅުގަނޑު މިއީ ކާކުކަން އެބަ އެނގެއޭ. އެންމެން އަޅުގަނޑާ ދިމާލަށް ގޮވަނީއޭ. ދެން ކުއްލިއަކަށް އިހުސާސުވީ މިއީ އެއްގޮތަކަށް ވެސް ސަޅި ކަމެއް ނޫނޭ. އޭރު ހީވަނީ ބިއްލޫރި ޖެހި ގެއެއްގައި ދިރިއުޅެމުން ދިޔަހެން، އެންމެނަށް ފެންނާނެހެން. އެހިސާބުން އެ ހުރިހާ އިހުސާސެއް ބޮއްސުންލާންފެށީ.

އެ މަޝްހޫރުކަމާއި ފުރައްސާރަ އާއި މީހުން ކިޔާ އެއްޗެއްސާ ކުރިމަތިލާންވީ ގޮތެއް ވެސް ނޭނގުނު. އަދި އެކަމުން ސަލާމަތްވާން ކުރަންވީ ކީއް ކަމެއް ވެސް ނޭނގޭ އޭރަކު. އަނެއްކޮޅުން އޭރު އަޅުގަނޑު ދިރިއުޅެމުން ދިޔައީ އެކަނިމާއެކަނި މާލޭގައި. އެހެންވީމަ އެންމެންގެ ތެރޭގައި އުޅެއުޅެފައި ގެއަށް ގޮސް ވަނީމަ ވެސް އަޅުގަނޑަށް ހިތްވަރުދީ ވާހަކަ ދައްކައި ހަދާނެ މީހަކު ނެތް. މީހުން ކިޔަމުން ދިޔަ އެއްޗިއްސާ ކުރިމަތިލާނެ ގޮތެއް ނޭނގި އެކަނިވެފައި ހުރީ ގޭގައި. އަދި ކަންކަމަށް ފަސްޖެހެން ފެށީ.

އެހެންވީމަ އެ ހުރިހާ ކަމެއް އެންމެ ފުރަތަމަވީ މުޅިން އައު ތަޖުރިބާއަކަށް. ހަފުތާއެއް ވަންދެން އަޅުގަނޑު އޮތިން ގެއިން ނުނިކުމެ. ކޮޓަރީގެ ކަނެއްގައި އޮތިން މީހަކާ ވާހަކަ ދައްކަން ބޭނުންނުވެފައި. އަޅުގަނޑަކީ އާންމުކޮށް މީހުންނާ ވާހަކަ ދައްކަން ފޯރި ހުންނަ، މީހަކު ގުޅިޔަސް ފަސޭހައިން ފޯނު ނަގާ މީހެއް. އެކަމަކު އެ ދުވަސްކޮޅު މީހަކު ގުޅިޔަސް ފޯނު ވަގުތުން ކަނޑާލެވެނީ. ވާހަކަ ދައްކަން ވެސް ބޭނުން ނުވަނީ. ކިޔަވަން އުޅުނު ސެމިސްޓާއިން ވެސް ބްރޭކެއް ނެގީ. އައި ތޯޓް އައި ހޭޑް އިނަފް އޮފް އިޓް އިން ވަން ނައިޓް.

ދެން އެކަމަކު، މަޑުމަޑުން ގޮސް އެންމެފަހުން މި ލައިފްސްޓައިލަށް ހޭނިއްޖެ. ހަން ބޯ މީހަކަށް އަޅުގަނޑު ބަދަލުވާން ޖެހުނީ. ސަބަބަކީ އަޅުގަނޑަށް އެނގޭ އަޅުގަނޑަކަށް ދޫދެވެން ނެތްކަން. އަޅުގަނޑަށް އެނގޭ އަޅުގަނޑު ޖެހޭނީ ކުރިއަށް ދާން ކަން. އެހެންވީމަ ރޯނެ ވަރަކަށް ރޮއެރޮއެފައި ހަފުތާއެއްހާ ދުވަސް ފަހުން ނުކުމެ ކުރިމަތިލީ އެ ހުރިހާ ކަމަކާ."

ހަމްދާ: ވަރަށް ގިނަ ރައްޓެހިން ގެއްލިގެން ދިޔަ ތަޖުރިބާއެއް އެއީ. އެއީ އަޅުގަނޑުގެ މޫނުމަތީގައި ހަގީގަތް އައިސް އެތި ފަހަރެއް އަޅުވާލި ތަޖުރިބާއެއް. އަޅުގަނޑަށް އެންމެ މީހުން ބޭނުންވި ހާލަތުގައި އަޅުގަނޑު ދޫކޮށްލާނީ ހަގީގީ ރައްޓެހިންނެއް ނޫންތާ. އެންމެފަހުން އެކުގައި ތިބީ ދެތިން ރައްޓެހިން. އެހެންވީމަ އެއީ އަޅުގަނޑު އުފާކުރާ ތަޖުރިބާއެއް ވެސް މެ. ސަބަބަކީ ޖެނުއިން މީހުން ވަކިކޮށް ދެނެގަނެވުނު ތަޖުރިބާއަކަށްވީމަ. އެހެންވީމަ އަޅުގަނޑު ހަމަ އެއްވެސް ދެރައެއް ނުވޭ އެ ދުވަހު އެ ޕޯޑިއަމްއަށް އަރައި ވާހަކަ ދެއްކުނީތީއެއް މިއަދަކު. އެއީ ހޭލައްވާލި ތަޖުރިބާއެއް.

އަޅުގަނޑު އެންމެފަހުން ނަފުސާނީ ތަޖުރިބާކާރެއްގެ އެހީ ވެސް ހޯދިން. ސަބަބަކީ އަޅުގަނޑު ދަންނަ މީހަކާ ގޮސް އެ ހުރިހާ ވާހަކައެއް ދައްކަނާނެ ހިތްވަރެއް ވެސް ނެތުނީ. އެމީހުން އަޅުގަނޑާ މެދު ދެކޭނީ ކިހިނެއް ކަމެއް ވެސް ނޭނގޭތީ. އެހެންވީމަ އަޅުގަނޑު ޖަޖުނުކުރާނެ މީހަކާ ގޮސް ވާހަކަ ދައްކަން ބޭނުންވީ އެންމެފަހުން، މީހަކު ހަމަ ކޮންމެ އެއްޗެކޭ ކިޔަސް ހިތަށް އެކައްޗެއް ވެސް ނާރާ ހިސާބަކަށް އަޅުގަނޑު ގެންގޮސްދިނީ ތެރަޕީ. އެހެންވީމަ މިހާރަކު ބަޔަކު އެއްޗެހިތަކެއް ކިޔައިގެން އަޅުގަނޑަށް ވާނެ އުނދަގުލެއް ނެތް. އަޅުގަނޑު ވާނީ އުފާ. އަޅުގަނޑުގެ ހަންވީ ބޯ.

އެހެންވީމަ މިގޮތަށް ކުރިއަށް ދާން ބޭނުންވާ ކޮންމެ ޒުވާނަކަށް އަޅުގަނޑު ބުނެލާނީ ސްޓޭ ޓްރޫ ޓް ޔުއާ ރޫޓްސްއޭ. އަމިއްލަ ނަފުސަށް ހަމަ ކޮންމެ ދުވަހަކުވެސް ހަނދާންކޮށްދޭށޭ ކީއްވެގެންކަން ތިމަންނަ މިކަމެއް މިކުރަނީ. މިކަމެއް ކުރަން ޖެހެނީ. އަދި މިކަން ހާސިލުކުރަންވީ. އެއީ އަޅުގަނޑަށް އަޅުގަނޑުގެ މަންމަ ނަގައިދިން ފިލާވަޅަކީ ވެސް.

ހަމްދާ: އަޅުގަނޑުގެ މިޒާޖަކީ ވަރަށް ބޮޑަށް މިޔަރެއްގެ މިޒާޖު. އައި އޭމް އަ ޝާކް ޓޫ. އެހެންވީމަ މިޔަރުތަކަކާ އެކު ފަތަން ޖެހުނަސް އަޅުގަނޑަކަށް ހަމަ އެއްވެސް މައްސަލައެއް ނެތް. އެ ޗެލެންޖަކާ ވަރަށް ލޯބިން ކުރިމަތިލާނުން.

އެކަމަކު ފުރަތަމަ ފަށައިގެން އައިއިރު ހުރި ގޮންޖެހުންތައް ފެނުނީމަ، ހިތަށް އަރާ މިއީ ވަރަށް އުނދަގޫ ކަމެކޭ. އެކަމަކު އެގޮތަށް ދިމާވާ ގޮންޖެހުންތަކާއި ހުރަސްތަކަކަށް ބިރުން އަޅުގަނޑެއް ފަހަތަކަށް ނުޖެހޭނަން. އަޅުގަނޑު ބޭނުންވާނީ އެ ކަމަކާ ކުރިމަތިލާން.

އެ ދުވަހު އަޅުގަނޑު އެ ޕޯޑިއަމް އަށް އަރައި އެ ސްޕީޗް ދިނީމަ ވަރަށް ގިނަ މީހުންނަށް ހީވެފައި އޮތީ އަޅުގަނޑު މިއީ އޯވަނައިޓެއްގެ ސެންސޭޝަނެކޭ. އެކަމަކު އެއީ އަޅުގަނޑު ވަރަށް ބޮޑަށް ތައްޔާރުވެގެން ކުރި ކަމެއް. އެއީ އެންމެ ރެއަކުން، ހަމަ ކުއްލިއަކަށް އައި ހިޔާލަކާ ހެދި ގޮސް ކޮށްލި ކަމެއް ނޫން. އެއީ ދުރާލާ ރާވައިގެން ކުރި ކަމެއް.

ހަމްދާ: ޒުވާނުން މި ނިސްބަތް ވަނީ ބާކީކޮށް އެކަހެރިކޮށްލާ ހިސާބަކަށް ސިޔާސީ ގޮތުން ބަލާއިރު. ސިޔާސީ ވެރިންނަކީ އެމީހުންނަށް ފައިދާވާނެ ބަޔަކު ގޮވައިގެން އުޅޭނެ މީހުން. އެހެންވީމަ އަޅުގަނޑުމެން ޒުވާނުންނަށް ރަނގަޅު ގޮތްތައް، ރަނގަޅު ސިޔާސަތުތައް ފަހިވާން އެދޭ ނަމަ އަޅުގަނޑުމެން ޒުވާނުން އެބަޖެހޭ ސިޔާސީ މައިދާނުގައި އިސްކޮށް، ހަލުވިކޮށް މަސައްކަތްކޮށްގެން އެ ފުރުސަތު ފަހިކުރަން. އެއީ އަޅުގަނޑު ވިއްކާ ހިޔާލަކީ. އަޅުގަނޑުމެން ސިޔާސީ މައިދާނުގައި އެކްޓިވް ނުވެ ޒުވާނުންނަކަށް ސިޔާސީ މައިދާނުން ޖާގަ ކަށަވަރެއް ނުވާނެއޭ. އެހެންވީމަ ޒުވާނުން ގިނައިން ސިޔާސީ މައިދާނުގައި ކުރީ ސަފަށް އަރަންވީ."

ހަމްދާ: މީގެ ދެ އަހަރު ކުރިން އަޅުގަނޑުގައި ގައިގައި ހުންނާނެ 85 ކިލޯ. އޭރު އަޅުގަނޑުގެ ސްކިން ވެސް ވަރަށް ސަކަރާތް. އެކްނީ އާއި ސްކާރިންގެ މައްސަލަ ވެސް ވަރަށް ގޯސްކޮށް ހުރީ. ދެން ފިޓްޒޯން އަށް ދާން ފެށީ ޕާސަނަލް ޓްރެއިނަރެއް ނަގައިގެން. އެ ޖާނީގައި 55 ކިލޯ އަށް އަޅުގަނޑުގެ ބަރުދަން ދަށްވި.

އެ ބަދަލުތަކުގެ ތެރޭގައި އުޅެގެން ފިޓްނެސް އަށް ވަރަށް ބޮޑަށް ލޯ ހުޅުވި ހޭލުންތެރިވެގެން ދިޔަ. ކެއިންބުއިމުގެ މުހިންމުކަން ވެސް ފާހަގަވެގެންދިޔަ. ހުރިހާ ކަމެއް އެ ދުވަސްކޮޅު ރަނގަޅުވެގެން ދިޔައީ އެ ފިޓްނެސް ޖާނީއާ އެކު.

ސްކިންކެއާގެ ވާހަކަ ދައްކާ ނަމަ ދޮގުނަހަދާ ބުނެވޭނީ މާ ބޮޑު ނުވަތަ ކޮމްޕްލިކޭޓެޑް ސްކިންކެއާ ރޫޓީންއެއް ނުގެންގުޅެމޭ އަޅުގަނޑު. އެކަމަކު މަހަކު އެއް ފަހަރު ނުވަތަ މަހެއް ދެ މަހެއް ވަރު ކޮށްލާފައި ގޮސް ސެލޫނަކުން ޕްރޮފެޝަނަލް ކްލެންސިންއެއް ނަގާފާނަން. އެވެސް އެކަމަކު އެހެން ޚަރަދުތައްކޮށް ނިމިގެން ކުރާ ކަމެއް.

ދެން ސިޔާސީ ޕޯޑިއަމްތަކުން ފެންނަން ފެށިއިރު ވެސް މިއީ ހަމަ އަޅުގަނޑުގެ ސްޓައިލް. މިގޮތަށް ބުރުގާ އަޅައިގެން ސްޓައިލްވާތާ ތިން އަހަރު ވެދާނެ. މެދުއުމުރުން މަތީގެ މީހުން އައިސް ބުނާނެ ދަރިފުޅާއޭ ވަރަށް ކަމުދެއޭ. ދައްކާ ވާހަކަތައް ވެސް ވަރަށް ކަމުދެއޭ. ވަރަށް ލޯބިވާ ޒާތަކަށް އުޅޭ ކުއްޖެކޭ ތިއީ. އެކަމަކު އަދި އިތުރަށް މީހުން ލޯބިވާނެއޭ ބުރުގާ އަޅާ ގޮތް ރަނގަޅުކޮށްލަނިކޮށް.

ހަމްދާ: ޕާލަމެންޓްރީ އިލެކްޝަން ތެރޭގައި ދޯ އެހެން ބުނެވުނީ. ހަމަ އަސްލު ވެސް ތި ސުވާލަށް ޖަވާބު ދޭން ބޭނުންތަ؟ އެކަމަކު ކުޑަކޮށް ތި ސުވާލާ ގުޅިގެން މައުލޫމާތުކޮޅެއް ދީފާނަން.

އެ ބުނާ ޖަވާހިރަކީ އަޅުގަނޑުގެ ލޯބިވެރިޔާ. އެ ނޫން އެހެން އެއްވެސް މާނައެއް އެޔަކު ނެތް. އެކަމަކު މިދިޔަ ހަތަރު ވަރަކަށް އަހަރަކީ އަޅުގަނޑު އަޅުގަނޑުގެ އަމިއްލަ ޒާތީ ދިރިއުޅުމަށް މާ ބޮޑު ޝައުގުވެރިކަމެއް، ސަމާލުކަމެއް ނުދީ އުޅުނު އަހަރުތަކެއް. އެކަނި އުޅުނީ، އަމިއްލަ މީހާ ޑިސްކަވާކޮށް، ދަސްކޮށް، ލަވިން މައި ސެލްފް ސޯ މަޗް.

އެއަށް ފަހު އަޅުގަނޑާ ބައްދަލުވީ މި ބުނާ ކުއްޖަކާ މިދިޔަ ރިއާސީ އިންތިހާބުގެ ތެރޭގައި އުޅެނިކޮށް ފުވައްމުލަކުން. އޭނާއާ ބައްދަލުވި ތަޖުރިބާ އަކީ ވަރަށް ޔިން ޔޭންގް ސިޗުއޭޝަނެއް. ސަބަބަކީ އަހަރެމެން ދެ މީހުންނަކީ މިޒާޖުގައި ވަރަށް ތަފާތު ދެ މީހުން އެކަމަކު ދެ މީހުންގެ ވެސް ގޯލަކީ އެކައްޗެއް. އެ ގޯލަށް ދެ މީހުން ވާސިލުވާނެ ގޮތް ވެސް ތަފާތު. ކަޅާއި ހުދުހާ ތަފާތަސް އޭނަ އަކީ ލައިފް ޕާޓްނަރެއްގެ ގޮތުގައި އަޅުގަނޑު ބަލާ މީހާއާ ބައްދަލުވާ މީހެއް. އެހެންވީމަ ޖަވާހިރެކޭ ބުނީ. ހަމަ އަސްލަށް ވެސް ގެއްލިފަ އިން ޖަވާހިރެއް އޭނަ އަކީ.