ދިވެއްސަކު ފުރަތަމަ ފަހަރަށް މިސް ޔުނިވާސްގައި ބައިވެރިވެއްޖެ

ރީތީގެ މުބާރާތް، މިސް ޔުނިވާސްގައި ދިވެއްސަކު ފުރަތަމަ ފަހަރަށް ބައިވެރިވެއްޖެ އެވެ.

މި އަހަރުގެ މިސް ޔުނިވާސް މުބާރާތުގައި ރާއްޖެ ތަމްސީލްކުރަނީ 21 އަހަރުގެ މޮޑެލް، މަރިޔަމް ޝައިނާ ނަސީމެވެ.

މި އަހަރުގެ މިސް ޔުނިވާސް މުބާރާތް ބާއްވަނީ އަންނަ މަހު 14 އިން 16 އަށް މެކްސިކޯގަ އެވެ.

އިންޑިއާގައި ހުންނަ މެކްސިކޯގެ އެމްބަސީން މިއަދު އެކްސްގައި ކުރި ޕޯސްޓެއްގައި ބުނީ މި އަހަރުގެ މިސް ޔުނިވާސްގައި ވާދަކުރާ ޝައިނާ އަށް، މި މުބާރާތުގައި ވާދަކުރުމަށް މެކްސިކޯ އަށް ދިއުމަށް ވިސާ ހަމަޖައްސާދީފައިވާ ކަމަށެވެ.

މިއީ ދިވެއްސަކު މި މުބާރާތުގައި ވާދަކުރާ ފުރަތަމަ ފަހަރުކަން ފާހަގަކޮށް، އެ އެމްބަސީން ވެސް ވަނީ ޝައިނާ އަށް ކާމިޔާބީއަށް އެދިފަ އެވެ.

މިސް ޔުނިވާސް މުބާރާތުގައި ޝައިނާ ބައިވެރިވީ ރާއްޖޭގެ އިވެންޓް މެނޭޖުމަންޓް ކުންފުނި "ހީ އެންޑް ޝީ މޯލްޑިވްސް"ގެ ފަރާތުން ފަހިކޮށްދިން ފުރުސަތެއްގަ އެވެ. ހީ އެންޑް ޝީއަކީ އިންޓަނޭޝަނަލް ބިއުޓީ ޕެޖެންޓް ފްރެންޗައިޒް "ޓޮޕް މޮޑެލް" ވެސް ރާއްޖެއަށް ތައާރަފުކުރި ކުންފުންޏެވެ.

ޝައިނާ އަކީ "ޓޮޕް މޮޑެލް މޯލްޑިވްސް 2022" ކާމިޔާބުކުރި މޮޑެލް އެވެ. ޝައިނާ ވަނީ މިދިޔަ އަހަރު މިސްރުގައި ބޭއްވި "ވޯލްޑް ޓޮޕް މޮޑެލް"ގައި ވެސް ބައިވެރިވެ، ގަދަ 15 ގައި ހިމެނިފަ އެވެ. އެއީ އެ މުބާރާތުގެ ގަދަ 15 ގައި ރާއްޖެ ހިމެނުނު ވެސް ފުރަތަމަ ފަހަރެވެ. އަދި އެ މުބާރާތުގައި "ނިއު ފޭސް"ގެ އެވޯޑު ވެސް ޝައިނާ ހޯދި އެވެ.

ހީ އެންޑް ޝީގެ އޮފިޝަލަކު "މިހާރު" އަށް ވިދާޅުވީ މިސް ޔުނިވާސްގައި ވާދަކުރުމުގެ ފުރުސަތު ފަހިކޮށްދިނީ އެ މުބާރާތުގެ ފްރެންޗައިޒް ރައިޓްސް ހޯލްޑްކުރާ ރޮމޭނިއާގެ ކުންފުންޏެއްގެ ފަރާތުން ކަމަށެވެ.

"ޝައިނާ އަކީ ވޯލްޑް ޓޮޕް މޮޑެލްގައި ޓޮޕް 15 އަށް ފުރަތަމަ ފަހަރަށް އެރި ދިވެހި މޮޑެލް. އެހެންވެ، މިފަހަރުގެ މިސް ޔުނިވާސްއަށް ޝައިނާ ފޮނުވަން ނިންމީ،" އޮފިޝަލް ވިދާޅުވި އެވެ.

"މީއީ ރާއްޖެއަށް ލިބޭ ވަރަށް ބޮޑު ފުރުސަތެއް، ދުނިޔޭގެ ބޮޑު މުބާރާތެއްގައި ރާއްޖެ ތަމްސީލު މި ވަނީ. މިސް ޔުނިވާސްގައި ރާއްޖޭގެ ކުއްޖެއް ވާދަކުރުމަކީ އަޅުގަނޑުމެން ވެސް ދެކުނު ހުވަފެނެއް. އަދި މި ފުރުސަތު ވާނެ ޝައިނާއަށް ވެސް މި ދާއިރާއިން ކުރިއަށް ދިއުމަށް ލިބޭ ވަރަށް ރަނގަޅު، ވަރަށް ގިނަ އޮޕޮޗިއުނިޓީސް ފަހިކޮށްދޭ ކަމަކަށް."

މި މުބާރާތުގައި ވާދަކުރުމަށް ހީ އެންޑް ޝީގެ ޓީމަކާ އެކު ޝައިނާ މިހާރު ހުރީ މެކްސިކޯގައި ކަމަށް ވެސް އޮފިޝަލް ވިދާޅުވި އެވެ.

މިސް ޔުނިވާސް މުބާރާތުގައި މި އަހަރު 130 ގައުމަކުން ބައިވެރިވެ އެވެ. މިއީ، މި މުބާރާތް ބާއްވާ 73 ވަނަ އަހަރެވެ.

މި އަހަރުގެ މިސް ޔުނިވާސްގައި އަލަށް ބައިވެރިވާ ގައުމުތަކުގެ ތެރޭގައި ބެލަރުސް، އެރިތުރިއާ، ގިނިއާ، އީރާން، މަކާއު، މޮލްޑޯވާ، ނޯތު މެކެޑޯނާ، ސޯމާލިއާ، ޔޫއޭއީ އަދި އުޒުބެކިސްތާން ވެސް ހިމެނެ އެވެ.