ވޯލްޑް ޗެމްޕިއަންޝިޕުން ޝާހީން އާއި އަޒްނީނަށް ރަން މެޑަލް

ރާއްޖޭގައި އިއްޔެ ފެށި ދުނިޔޭގެ ބޮޑީބިލްޑިން ފިޒީކް ސްޕޯޓްސް ޗެމްޕިއަންޝިޕްގައި ރާއްޖޭގެ އަޒްނީން ރަޝާދާއި ޝާހީން އިބްރާހިމް ދީދީ ރަން މެޑަލް ހޯދައިފި އެވެ.

އެ މުބާރާތުން، އަޒްނީން ރަން މެޑަލް މި ހޯދީ ވިދިވިދިގެން ތިންވަނަ ފަހަރަށެވެ. ސްޕޯޓްސް ފީޒީކް އަޕްޓް 170 ސެންޓްމީޓަރުގެ ކެޓަގަރީ އަށް ހާއްސަ އަޒްނީން ވޯލްޑް ޗެމްޕިއަންޝިޕުން ފުރަތަމަ ފަހަރަށް ރަން މެޑަލް ހޯދީ 2022 ގައި ތައިލެންޑްގައި ބޭއްވި މުބާރާތުގަ އެވެ. އޭގެ ފަހުން މިދިޔަ އަހަރު ދެކުނު ކޮރެއާގައި ބޭއްވި މުބާރާތުން ވެސް އޭނާ ރަން މެޑަލް ހޯދި އެވެ.

އަޒުނީނަކީ، ރާއްޖޭގައި ބޭއްވި އިންޓަނޭޝަނަލް ކުޅިވަރު މުބާރާތެއްގައި ރަން މެޑަލް ހޯދި ދިވެހި ފުރަތަމަ އެތުލީޓެވެ. ޖުލައި 2022 ގައި ކ. މާފުށީގައި ބޭއްވި އޭޝިއަން ޗެމްޕިއަންޝިޕުގައި އޭނާ ވަނީ ރަން މެޑަލް ހޯދައިފަ އެވެ.

ޔޫސުފް އަޔާން ރިޒްވީ: އޭނާ ވަނީ ރިހި މެޑަލް ހޯދާފަ

ބޮޑީބިލްޑިންގެ ސުޕަ ކެޓަގަރީއެއް ކަމަށްވާ، 55 ކިލޯގެ އިވެންޓުން، ރާއްޖޭގެ ޝާހީން އިބްރާހިމް ދީދީ ވަނީ ރަން މެޑަލް ހޯދައިފަ އެވެ. އެއީ ބޮޑީބިލްޑިންގެ 55 ކިލޯގެ ކެޓަގަރީން ދިވެއްސަކު ރަން މެޑަލް ހޯދި ފުރަތަމަ ފަހަރެވެ. އެޔާ އެކު އޭނާ ވަނީ މިސްޓަ ވޯލްޑްގެ އިވެންޓަށް ކޮލިފައި ވެފަ އެވެ.

ބޮޑީބިލްޑިންގެ ސުޕަ ކެޓަގަރީގެ އެހެން އިވެއްޓެއް ކަމަށްވާ، 75 ކިލޯގެ ކެޓަގަރީން ރާއްޖޭގެ ޖޫނިއާ އޯޕަން ޗެމްޕިއަން، ޔޫސުފް އަޔާން ރިޒްވީ ވަނީ ރިހި މެޑަލް ހޯދައިފަ އެވެ.

އައްޑޫގެ ކެނެރީފް ރިސޯޓްގައި ކުރިއަށްދާ މުބާރާތް ފެށުމަށް ރޭ ބޭއްވި އިވެންޓްގައި ނިވާކަން ކުޑަ ހެދުމުގައި ޕާފޯމް ކުރުމުން އާންމުންގެ ގިނަ ބަޔަކު ވަނީ ބޮޑީބިލްޑިން އޯސޯސިއޭޝަނަށް ފާޑުކިޔުން އޮއްސާލައިފަ އެވެ. އެކަމާ ގުޅިގެން އެ އެސޯސިއޭޝަނުން ވަނީ އާންމުންގެ ކިބައިން މައާފަށް އެދޭ ކަމަށް ބުނެ ބަޔާނެއް ނެރެފަ އެވެ.