ފޮރިން މިނިސްޓްރީން ހިފެހެއްޓި މައުލޫމާތު ދީފި؛ ތިބީ ސިޔާސީ 129 މުވައްޒަފުން

ފޮރިން މިނިސްޓްރީގައި ތިއްބެވި ސިޔާސީ މުވައްޒަފުންގެ އަދަދު ނުދީ ހިފެހެއްޓުމަށް ފަހު، އެންމެ ފަހުން އެ މައުލޫމާތު ހާމަކޮށްފި އެވެ.

އެ މިނިސްޓްރީން ދިން މައުލޫމާތުގައިވާ ގޮތުން، ގާނޫނުއަސާސީން ރައީސުލްޖުމްހޫރިއްޔާއަށް ލިބިވަޑައިގަންނަވާ އިހްތިޔާރުގެ ދަށުން ފޮރިން މިނިސްޓްރީއަށް އައްޔަންކޮށްފައިވާ ސިޔާސީ މުވައްޒަފުންގެ އަދަދު 129 އަށް އަރަ އެވެ.

މައުލޫމާތު ހޯދައި ލިބިގަތުމުގެ ގާނޫނުގެ ދަށުން "މިހާރު" އިން ހޯދަން އެދުނު މައުލޫމާތަށް ފޮރިން މިނިސްޓްރީން ދިން ޖަވާބުގައިވާ ގޮތުން މިދިޔަ އޮކްޓޯބަރު މަހުގެ ނިޔަލަށް އެ މިނިސްޓްރީގައި ތިބި ޖުމްލަ މުވައްޒަފުންގެ އަދަދަކީ 269 އެވެ. އެއީ ރާއްޖޭން ބޭރުގައި ހުރި އެމްބަސީތަކުގައި ތިބި މުވައްޒަފުން ހިމެނޭ ގޮތަށެވެ.

މީގެ ތެރެއިން ސިޔާސީ މަގާމުތަކުގައި ތިބި މުވައްޒަފުންގެ އަދަދަކީ 129 އެވެ. ފޮރިން ސާވިސްގެ މުވައްޒަފުންގެ ގޮތުގައި ތިބީ އަދި 140 މީހެކެވެ.

ފޮރިން މިނިސްޓްރީން ހާމަކުރި ތަފާސްހިސާބުތައް ދައްކާ ގޮތުން މިދިޔަ ސަރުކާރުގައި ފޮރިން މިނިސްޓްރީގައި ތިބި ސިޔާސީ މުވައްޒަފުންގެ އަދަދަށް ވުރެ މި ސަރުކާރުގެ ފުރަތަމަ އަހަރު ތެރޭ ތިބި ސިޔާސީ މުވައްޒަފުންގެ އަދަދު އިތުރެވެ.

މިދިޔަ ސަރުކާރު ނިމުނުއިރު ފޮރިން މިނިސްޓްރީގައި ތިބީ 253 މުވައްޒަފުންނެވެ. އޭގެ ތެރެއިން 116 މުވައްޒަފުންނަކީ ސިޔާސީ މުވައްޒަފުން އަދި 137 މުވައްޒަފުންނަކީ ފޮރިން ސާވިސްގެ މުވައްޒަފުން ކަމަށް ފޮރިން މިނިސްޓްރީން ދިން ޖަވާބުގައި ބުނެފައިވެ އެވެ.

ފޮރިން މިނިސްޓްރީގެ ސިޔާސީ މުވައްޒަފުންގެ އަދަދު މިދިޔަ ހުކުރު ދުވަހު ހާމަކުރީ އެ އަދަދު ހާމަނުކޮށް އެ މިނިސްޓްރީން ގިނަ ދުވަސްތަކެއް ވަންދެން ތިބުމަށް ފަހު އެވެ. މައުލޫމާތު ހޯދައި ލިބިގަތުމުގެ ގާނޫނުގެ ދަށުން "މިހާރު" އިން ހޯދަން އެދުނު މައުލޫމާތު ފޮރިން މިނިސްޓްރީން ނުދިނުމުން އެ މައްސަލަ އިންފޮމޭޝަން ކޮމިޝަނަރުގެ އޮފީހަށް ހުށަހެޅި އެވެ.

Commissioner engevumun ves Foreign ministry ge siyaasee muvazzafunnge adhadhu haama eh nukuri

The most trusted news source in the Maldives

Mihaaru

މައުލޫމާތު ނުދިނުމުން އިންފޮމޭޝަން ކޮމިޝަނަރުގެ އޮފީހުން ވަނީ އެއީ ހިފެހެއްޓޭނެ މައުލޫމާތެއް ނޫން ކަމަށް ކަނޑައަޅައި، ފަސް ދުވަސް ތެރޭގައި މައުލޫމާތު ހާމަކުރަން އަމުރު ކުރައްވައިފަ އެވެ. ނަމަވެސް، އެ މުއްދަތު ހަމަވެގެން ދިޔައިރު ވެސް މިނިސްޓްރީން މައުލޫމާތެއް ނުދެ އެވެ.

އޭގެ ފަހުން ދެވަނަ ފަހަރަކަށް ވެސް، މައުލޫމާތު ހޯދަން އެދި ގާނޫނުގެ ދަށުން ހުށަހެޅުމުން، މުއްދަތު ހަމަވި އިރު ވެސް މައުލޫމާތެއް ނުދެ އެވެ. މި މައްސަލަ ވެސް އިންފޮމޭޝަން ކޮމިޝަނަރުގެ އޮފީހަށް މިހާރު ހުށަހަޅާފައި ވާއިރު ސިޔާސީ މުވައްޒަފުންގެ އަދަދު މިދިޔަ ހުކުރު ދުވަހު ފޮރިން މިނިސްޓްރީ ހާމަކޮށްފައިވަނީ މި މައްސަލައިގެ ޖަވާބެއްގެ ގޮތުގަ އެވެ.

އެނގިފައިވާ ގޮތުގައި ހުކުރު ދުވަހެއްގައި ފޮރިން މިނިސްޓްރީން މައުލޫމާތު ދޭން ނިންމީ މުވައްޒަފުންގެ އަދަދުގެ މައުލޫމާތު ނުދީ ހިފަހައްޓާފައިވާ ކަން "މިހާރު" އިން މިދިޔަ ބުރާސްފަތި ދުވަހު ރިޕޯޓްކުރުމާ އެކު އެ މައުލޫމާތު ހާމަކުރަން ރައީސް ޑރ. މުހައްމަދު މުއިއްޒު އެންގެވުމުންނެވެ.