ގުޅީގެ އުއްމީދުތަކުގައި ހަގީގީ ކުލަ ޖައްސައިދޭނަން: ރައީސް

ކ. ގުޅީގެ ރައްޔިތުން އެދިފައިވާ މަޝްރޫއުތައް ހުއްޓާނުލައި ކުރިއަށް ގެންގޮސް އެ އުއްމީދުތަކުގައި ހަގީގީ ކުލަ ޖައްސައި ދެއްވާނެ ކަމަށް ރައީސް ޑރ. މުހައްމަދު މުއިއްޒު މިއަދު ވިދާޅުވެއްޖެ އެވެ.

ގުޅި އަށް މިއަދު ހަވީރު ކުރެއްވި ދަތުރުފުޅުގައި މި ރަށު ކައުންސިލާއި އަންހެނުންގެ ތަރައްގީ އަށް މަސައްކަތް ކުރާ ކޮމިޓީއާ ބައްދަލުކުރެއްވުމަށް ފަހު، ރަށު ރައްޔިތުންނާ ބައްދަލުކުރައްވަމުން ރައީސް ވިދާޅުވީ، ގުޅީގެ ރައްޔިތުން އެދޭ ތަރައްގީގެ މަޝްރޫއުތައް ކުރިއަށް ގެންދަވާނެ ކަމަށެވެ.

ރައީސް ވިދާޅުވީ، ގުޅިއަކީ ޖާގައިގެ ދަތިކަން އިންތިހާ އަށް ކުރިމަތިވެފައިވާ ރަށަކަށް ވާތީ ކުރީގެ ރައީސް އިބްރާހިމް މުހައްމަދު ސޯލިހުގެ ވެރިކަމުގެ ފަހުކޮޅު އެ މަޝްރޫއު ބަޔަކާ ހަވާލުކުރި ކަމަށެވެ. އެކަމަކު، އެ އަހަރުގެ ބަޖެޓުގައި އެކަމަށް ބޭނުންވާ ފައިސާ އެކަށީގެންވާ މިންވަރަށް ހިމަނާފައި ނުވާތީ އެ މަޝްރޫއު ކުރިއަށް ގެންދެވިފައި ނުވާ ކަމަށް އެ މަނިކުފާނު ވިދާޅުވި އެވެ.

ކ. ގުޅި އަށް ވަޑައިގެން ރައީސް މުއިއްޒު އެ ރަށު ރައްޔިތުންނާ ބައްދަލުކުރެއްވުން. --ފޮޓޯ: ރައީސް އޮފީސް

އެމްޓީސީސީއާ ހަވާލު ކޮށްގެން ރަށުގެ ބިން ހިއްކުމުގެ މަސައްކަތް ކުރިއަށް ގެންދާއިރު، ރައީސް ވިދާޅުވީ މި ފަހަރު ހުއްޓުމެއް ނެތި ރަށުގެ ބިން ހިއްކައި ހިމާޔަތްކޮށް ނިންމަވާނެ ކަމަށެވެ. އޭގެ ސަބަބުން ރަށަށް ދިމާވެފައިވާ ބޯހިޔާވަހިކަމުގެ މައްސަލައަށް ހައްލެއް ލިބޭނެ ކަމަށް އެ މަނިކުފާނު ވިދާޅުވި އެވެ.

ރައީސް ވިދާޅުވީ ރަށުގެ ބަނދަރުގެ ޖާގައިގެ ދަތިކަން ކުރިމަތިވެގެން ވެސް ކައުންސިލުން ވަނީ ޖާގަ ބޮޑުކޮށްދޭން އެދިފައި ކަމަށެވެ. އެހެންވެ، ގުޅިއަށް ބޭނުންވަނީ އާ ބަނދަރެއްތޯ ނުވަތަ މިހާރު އޮތް ބަނދަރު ބޮޑުކުރާނީތޯ މަޝްވަރާކޮށް، އެކަން ވެސް ކޮށްދެއްވާނެ ކަމަށް އެ މަނިކުފާނު ވިދާޅުވި އެވެ.

ރައިސް މުއިއްޒު ވިދާޅުވިގޮތުގައި، ބަންޑް ވޯލް ޖަހައި، ފަސްއަޅައި ނިންމާފައި ނޫނީ ގުޅީގެ ބިންހިއްކުމުގެ މަޝްރޫއު ވެސް ދެން ނުހުއްޓޭނެ ކަމަށެވެ.

ރައީސް މުއިއްޒު މިއަދު ހަވީރު ގުޅި އަށް ވަޑައިގެން ތުއްތު ކުއްޖަކު އުރާލައްވައިގެން.--- ފޮޓޯ: ރައީސް އޮފީސް

ސްކޫލުގެ ޖާގައިގެ ދަތިކަން ބޮޑުވެގެން ގުޅީގައި ވަނީ އާ އިމާރާތެއް ވެސް އަޅަން ފަށައިފަ އެވެ. އެކަމަކު އެ މަޝްރޫއު ވެސް ހުއްޓިފައި އޮތްއިރު ރައީސް މުއިއްޒު ވިދާޅުވީ އެކަން ވެސް ކޮށްދެއްވާނެ ކަމަށެވެ.

ހާހަކަށް ވުރެ ގިނަ ރައްޔިތުން ދިރިއުޅޭ ގުޅީގައި މިވަގުތު ހުރީ 400 މީހުންގެ ޖާގައިގެ މިސްކިތެކެވެ. އޭގެ ސަބަބުން ހުކުރު ނަމާދުގައި ދަތިތަކާ ވަރަށް ބޮޑަށް ކުރިމަތިވާ ކަމަށް ގުޅީގެ ރައްޔިތުން ބުންޏެވެ. އެހެންވެ، ރައީސް މުއިއްޒު ވަނީ އާ މިސްކިތެއް އަޅުއްވައިދެއްވާނެ ކަމަށް ވެސް ވިދާޅުވެފަ އެވެ.

އެއް ދުވަހުގެ ނިޔަލަށް އެ މަނިކުފާނު މި ކުރައްވާ ދަތުރުފުޅުގައި ސަރުކާރުގެ ބައެއް އިސްވެރިން ވެސް ބައިވެރިވެ ވަޑައިގަތެވެ. މިއީ އަތޮޅުތަކާއި ރަށްތަކާއި ސިޓީތަކުގެ ކައުންސިލުތަކާ ބައްދަލުކުރެއްވުމަށް މިދިޔަ އަހަރު ރައީސް މުއިއްޒު ފައްޓަވައިގެން ކުރިއަށް ގެންދަވާ ސިލްސިލާ ދަތުރުފުޅުތަކުގެ ތެރެއިން މި އަހަރު ކުރައްވާ އެންމެ ފުރަތަމަ ދަތުރުފުޅެވެ.