އެސްޑީއެފަށް މި އަހަރު 2.2 ބިލިއަން ރުފިޔާ ޖަމާކޮށްފި

ސޮވެރިން ޑިވެލޮޕްމެންޓް ފަންޑް (އެސްޑީއެފް)އަށް މި އަހަރު 2.2 ބިލިއަން ރުފިޔާ ޖަމާކޮށްފި އެވެ.

ފިނޭންސް މިނިސްޓްރީގެ ހިސާބުތަކުން ދައްކާ ގޮތުން މިއީ މިއަހަރުގެ ބަޖެޓުގައި ޖަމާކުރަން ކަނޑައެޅި އަދަދަށް ވުރެ އިތުރު އަދަދެކެވެ. މިއަހަރުގެ ބަޖެޓުގައި އެސްޑީއެފް އަށް ޖަމާކުރުމަސް ކަނޑައަޅާފައި ވަނީ 2.1 ބިލިއަން ރުފިޔާ އެވެ.

އެސްޑީއެފް ފަންޑުން އަންނަ އަހަރުގެ ދަރަނި އަދާ ކުރުމަށް 4.1 ބިލިއަން ރުފިޔާ ބޭނުން ކުރަން ބަޖެޓު ފޮތުގައި ކަނޑައަޅާފައިވެ އެވެ.

އަންނަ އަހަރަށް ލަފާކުރާ ދައުލަތުގެ ބަޖެޓުގައިވާ ގޮތުން، ދަރަނި ދެއްކުމަށް 12.9 ބިލިއަން ރުފިޔާ ހޭދަކުރާ އިރު އިންޓްރެސްޓް ހަރަދުގެ ގޮތުގައި 5.5 ބިލިއަން ރުފިޔާ ހިމަނާފައި ވެ އެވެ. އެހެންވެ، ދަރަނި ދެއްކުމުގެ ޖުމްލަ ހަރަދަށް 18.4 ބިލިއަން ރުފިޔާ ހޭދަވާނެ އެވެ. އެއީ މުޅި ބަޖެޓުގެ 29 ޕަސެންޓެވެ.

ދަރަނި އަދާކުރަން ބޭނުންވާ އެންމެ ބޮޑު ބައެއް ހޯދަނީ ރީފައިނޭންސިން ކޮށްގެންނެވެ. އެގޮތުން ލޯނު މެދުވެރިކޮށް 2.9 ބިލިއަން ހޯދަން ކަނޑައަޅާފައިވެ އެވެ. އަދި ސުކޫކާއި ނުވަތަ ބޮންޑު މެދުވެރިކޮށް 6.9 ބިލިއަން ރުފިޔާ ހޯދާ އިރު މަލްޓިލެޓްރަލް ބަޖެޓް ސަޕޯޓަށް ހަތް ބިލިއަން ރުފިޔާ ހޯދަން ބަޖެޓުގައި ހިމަނާފައިވެ އެވެ. އަދި ރާއްޖޭގެ މާލީ އިދާރާތަކުން 5.1 ބިލިއަން ރުފިޔާ ހޯދަން ވެސް ކަނޑައަޅާފައިވެ އެވެ.

އެސްޑީއެފްގެ ސައިޒު 10.9 ބިލިއަން ރުފިޔާގައި ހުރި އިރު އޭގެ ތެރެއިން 8.3 ބިލިއަން ރުފިޔާ ހުރީ ޑޮމެސްޓިކް ސެކިއުރިޓީ ނުވަތަ ސަރުކާރުގެ ޓީބިލްގައި އިންވެސްޓްކޮށްފަ އެވެ. އެއީ މުޅި ފަންޑުގެ 76 ޕަސެންޓެވެ. ބާކީ ބޭނުން ކުރެވޭ ގޮތަށް މިވަގުތަށް ހުރީ 2.4 ބިލިއަން ރުފިޔާ އެވެ.

އެ ފަންޑަށް ޖަމާކޮށްފައިވާ ފައިސާގެ ތެރެއިން އެއާޕޯޓު ޑިވަލޮޕްމެންޓް ފީގެ ގޮތުގައި 6.5 ބިލިއަން ރުފިޔާ މިހާތަނަށް ޖަމާކޮށްފައިވެ އެވެ.

އަންނަ އަހަރު ވެސް އެ ފަންޑަށް 2.5 ބިލިއަން ރުފިޔާ ޖަމާކުރަން ބަޖެޓުގައި ކަނޑައަޅާފައިވެ އެވެ.