ނައިޖީރިއާގައި 300 އަށްވުރެ ގިނަ ދަރިވަރުންނާއި ޓީޗަރުން ރަހީނުކޮށްފި

އެފްރިކާގެ އެންމެ ބޮޑު އާބާދީ އޮންނަ ނައިޖީރިއާގައި ހަތިޔާރު އެޅި ބަޔަކު ކްރިސްޓިއަން ސްކޫލަކަށް ވަދެ 300 އަށް ވުރެ ގިނަ ދަރިވަރުންނާއި ޓީޗަރުން މިއަދު ރަހީނުކޮށްފި އެވެ.

ނައިޖީރީގައި މިފަދަ އަމަލުތައް ގިނަވެ ސަލާމަތީ ކަންކަމާ މެދު ވަރަށް ބޮޑަށް ސުވާލު އުފެދިފައި އޮއްވައި މިއަދު ރަހީނުކުރީ އެ ގައުމުގެ މެދުތެރޭގައި އޮންނަ ނައިޖާ ސްޓޭޓްގައި ހުންނަ ސްކޫލެއްގެ ދަރިވަރުންނާއި ޓީޗަރުންނެވެ. އަދި މިދިޔަ ހޯމަ ދުވަހު ވެސް ސްކޫލަކުން 25 އަންހެން ދަރިވަރުން ރަހީނުކުރި އެވެ.

މިއީ ދަރިވަރުން ރަހީނުކުރުމުގެ ހާދިސާތައް ގިނަ ނައިޖީރިއާގައި ހިންގި މިފަދަ އެންމެ ބޮޑު އެއް ހާދިސާ އެވެ.

ކްރިސްޓިއަން އެސޯސިއޭޝަން އޮފް ނައިޖީރިއާ (ސީއޭއެން) އިން ފުރަތަމަ ބުނީ 227 ދަރިވަރުންނާއި ޓީޗަރުން ރަހީނުކޮށްފައިވާ ކަމަށެވެ. ނަމަވެސް އަދަދުތައް ކަށަވަރުކުރުމަށް ފަހު ބުނީ 303 ދަރިވަރުންނާއި 12 ޓީޗަރުން ރަހީނުކޮށްފައިވާ ކަމަށެވެ. މިއީ މުޅި ސްކޫލްގެ ގާތްގަނޑަކަށް ދެ ބައިކުޅަ އެއްބަ އެވެ.

މުޅި ސްކޫލްގެ އާބާދީ އަކީ 629 އެވެ.

ނައިޖާ ސްޓޭޓްގެ ގަވަރުނަރު މުހައްމަދު އުމަރު ބާގޯ ނޫސްވެރިންގެ ބައްދަލުވުމެއްގައި ވިދާޅުވީ، އިންޓެލިޖެންސް ޑިޕާޓްމެންޓާއި ފުލުހުން، ރަހީނުކުރި އަދަދު ކަށަވަރުކުރުމުގެ މަސައްކަތް ކުރަމުން އަންނަ ކަމަށެވެ.

އެ ސްޓޭޓްގެ ސަރުކާރުން ކުރިން ވެސް ވަނީ ރަހީނުކުރުމުގެ ހާދިސާއަކާ ގުޅިގެން ހުރިހާ ސްކޫލެއް ބަންދުކުރުމަށް އަމުރުކޮށްފަ އެވެ. އަދި މައި ސަރުކާރުގެ އެޑިއުކޭޝަން މިނިސްޓްރީން ވެސް ވަނީ 47 ސެކަންޑަރީ ބޯޑިން ސްކޫލެއް ބަންދުކުރުމަށް އަންގައިފަ އެވެ.

ނައިޖީރީއާގެ ރައީސް ބޯލާ ޓިނޫބޫ ވަނީ މި ހާދިސާއާ އެކު، ޖޮހަނަސްބާގްގައި މިހާރު ކުރިއަށްދާ ޖީ20 ސަމިޓުން ވެސް ވަކިވެ ވަޑައިގެން ބައިނަލްއަގުވާމީ ބައްދަލުވުންތައް ކެންސަލް ކުރައްވައިފަ އެވެ.

ނައިޖީރިއާގެ ކްރިސްޓިއަނުންނާ ދެކޮޅަށް ހިންގާ މިފަދަ އަމަލުތައް ހުއްޓުވަން އެމެރިކާގެ ޑިފެންސް ސެކްރެޓަރީ ޕީޓް ހެގްސެތު ވަނީ ނައިޖީރިއާގެ ނޭޝަނަލް ސެކިއުރިޓީ އެޑްވައިޒަރު ނޫހޫ ރިބާޑޫއާ އެކު ބޭއްވި މަޝްވަރާތަކުގައި ގޮވާލައްވާފައި ކަމަށް ޕެންޓަގަން އިން ނެރުނު ބަޔާނެއްގައި ބުނެފައިވެ އެވެ.

މީގެ 10 ވަރަކަށް އަހަރު ކުރިން ބޯކޯ ހަރާމްގެ ހަނގުރާމަވެރިން 300 އަށް ވުރެ ގިނަ އަންހެން ކުދިން ރަހީނު ކުރި ހާދިސާގެ ބިރުވެރިކަން ނައިޖީރިއާގައި އަދިވެސް އެބަ އޮތެވެ. އެފަހަރު ރަހީނުކުރި ބައެއް ކުދިން އަދިވެސް ނުފެނެ އެވެ. -- އޭއެފްޕީ