ރާއްޖޭގެ މަޝްހޫރު ބޮޑުބެރު ބޭންޑް ހަބޭސް އިން ރޯދަ ހަދިޔާއެއްގެ ގޮތުގައި އެ ބޭންޑްގެ ފުރަތަމަ މަދަހަ ވީޑިއޯ ސީޑީ "ޒަމާން" އަންނަ ހުކުރު ދުވަހު ނެރެން ނިންމައިފި އެވެ.
އެ ބޭންޑްގެ ވެރިޔާ އަލީ ޝިފާއު މިއަދު ބުނީ އަމިއްލަ ރާގުގެ ހަތް މަދަހަ ހިމެނޭ މަދަހަ ވީޑިއޯ ސީޑީ ރަސްމީކޮށް ނެރޭނީ އަންނަ ހުކުރު ދުވަހު ޓީވީއެމްގެ "ހޭޔަންބޯ" ޕްރޮގްރާމްގައި ކަމަށެވެ.
މި ސީޑީގައި ހިމެނޭ މަދަހަތައް ކިޔާފައި ވަނީ ދާދި ފަހުން ނިންމައިލި މޯލްޑިވިއަން އައިޑޮލް ސީޒަން ދޭކުން ފެނިގެން ދިޔަ އިބްރާހީމް ވަހީދު (ބޮޑު ބެ) އާއި އަހުމަދު ސައްޔާހާއި އައިޑޮލްގެ ސީޒަން އެކަކުން ވިދާލި މުއައްޒިންގެ އިތުރުން އިބްރާހީމް މަމްދޫހް (މަންޑޭ) އާއި ހަސަން ތޮލާގާއި ޝާރިމް، ނަސްރު އަދި ހުސައިން (ސެން) އެވެ.
އެއްވެސް މިޔުޒިކަކާ ނުލައި، ކިޔުންތެރިންގެ ހަމައެކަނި އަޑާ އެކު ކިޔާފައިވާ މަދަހަތަކުގެ ރެކޯޑިން އާއި މިކްސިން ހަދައި، މަދަހަތަކުގެ ވީޑިއޯ ވެސް ހަދާފައި ވަނީ ހަބޭސް ސްޓޫޑިއޯއިންނެވެ.
މަދަހަތަކުގެ ވީޑިއޯ ޑައިރެކްޓްކޮށްފައި ވަނީ ހަބޭސްގެ މެނޭޖަ މާކެޓިން އަލީ މަމްދޫދެހެވެ.
އައްޔަ ބުނީ މި އަހަރު ރޯދައާ ދިމާކޮށް ނެރޭ "ޒަމާން" މަދަހަ ސީޑީ އަށް ފަހު، ހަބޭސް ބޮޑުބެރު ބޭންޑުން ކޮންމެ އަހަރެއްގެ ރޯދަ މަހަށް ހާއްސަކޮށްގެން ރޯދަ ހަދިޔާއެއްގެ ގޮތުގައި މަދަހަ ސީޑީއެއް ނެރޭނެ ކަމަށެވެ.
"ޒަމާން" މަދަހަ ސީޑީ ނެރުމަށް ފަހު، ބޭނުންވާ ކޮންމެ މީހަކަށް ހިލޭ ލިބޭނެ އެވެ.