ފަސިންޖަރަކު ނަޖިސް އުނގުޅުމުން މަތިންދާބޯޓު ޖައްސައިފި

ފާތުމަތު އަނީސާ، މިހާރު

08 ޖެނުއަރީ 2018 - 06:36

އެމެރިކާގެ ޗިކާގޯއިން ހޮންގްކޮންގަށް ދަތުރުކުރި މަތިންދާބޯޓަކުން ދަތުރުކުރި ފަސިންޖަރަކު އެބޯޓުގެ ދެ ފާޚާނާގެ ބިތުގައި ބޮޑުކަމުދާ ނަޖިސް އުނގުޅުމުން ބޯޓު އަނބުރާލާފައި ޖައްސަން ޖެހިފައިވާ ކަމަށް އެއާޕޯޓް އޮފިޝަލަކު ބުނެފި އެވެ.

ޔުނައިޓެޑް ފްލައިޓް 895 ދަތުރުފެށީ ޗިކާގޯ އިންނެވެ. މިދިޔަ ބުރާސްފަތި ދުވަހުގެ ރޭ ހިނގި މި ހާދިސާގައި ދަތުރުގެ ވަކި ހިސާބަކުން ބޯޓު ޑައިޑައިވާޓް ކުރިއިރު ބޯޓު އޮތީ ދާންވީ މަންޒިލާ 5000 މޭލު ދުރުގަ އެވެ. ބޯޓު އަނބުރާލާފައި ގޮސް އެންކަރެޖަށް ޖެއްސީ ފަސިންޖަރު ބޮޑުކަމުދިޔަ ނަޖިސްތައް ބޯޓުގެ އެތަން މިތަނުގައި ހާކަމުން ދާތީ ކަމަށް އިންޓަނޭޝަނަލް އެއާޕޯޓް ޕޮލިސް ޓެޑް ސްޓީވަންސް ސީބީއެސް ނިއުސް އަށް ވިދާޅުވި އެވެ.

އެއާޕޯޓު ފުލުހުން ބުނީ އެމީހާ ބޮޑުކަމު ގޮސްފައި އެ ނަޖިސްތައް ބޯޓުގެ ފާޚާނާގައި ހޭކުމަށްފަހު ލައިގެން ހުރި ގަމީސް ބާލާފައި އެ ގަމީސް ވެސް ފާޚާނާ ތަށި ތެރެއަށް ކޮއްޕި ކަމަށެވެ.

މަތިންދާބޯޓު އަނބުރާ ޖެއްސިއިރު އެ މީހާ ފްލައިޓް ކުރޫން ބުނާގޮތް ހަދައިގެން ސީޓުގައި ވަނީ އިށީނދެފަ އެވެ.

މިކަން ކުރި މީހާއާ ދެކޮޅަށް މިހާތަނަށް އެއްވެސް ދައުވާއެއް އުފުލާފައެއް ނުވެ އެވެ. ނަމަވެސް ބޯޓު ޖެއްސުމާއެކު އެ މީހާ ވަނީ ކައިރީގައި ހުރި ހޮސްޕިޓަލަށް ގެންގޮސް ނަފްސާނީ މައްސަލައެއް ހުރިތޯ ޗެކް ކުރަން ފަށާފަ އެވެ. އެމީހާއާ އެއާޕޯޓުން ހަވާލުވީ އެފްބީއައި އެޖެންޓުންނާއި އެއާޕޯޓު ޕޮލިސް އެވެ. އެމީހުން ވަނީ އެމީހާ އެކަން ކުރި މަގްސަދެއް ސާފުކުރަން ސުވާލުތައް ކޮށްފަ އެވެ.

އެއާޕޯޓް ފުލުހުންނާއި އެފްބީއައި އިން ވެސް މި މައްސަލަ ތަހުގީގުކުރަމުން އަންނަ ކަމަށް ބުންޏެވެ.

ނަޖިސްކުރި ބޯޓު ސާފުކޮށް އަލުން ދަތުރަށް ފެށުނީ ޖެހިގެން އައި ދުވަހު އެވެ.