ހައުސިން ފައިނޭންސް މަޝްރޫއުތަކަށް ބޭނުންވާ ފައިސާ ހޯދަން ހައުސިން ޑިވެލޮޕްމަންޓް ފައިނޭންސް ކޯޕަރޭޝަން (އެޗްޑީއެފްސީ) އިން 100 މިލިއަން ރުފިޔާގެ 10،000 ބޮންޑު ވިއްކަން އިއުލާންކޮށްފި އެވެ.
ގެދޮރު ގަތުމަށާއި އިމާރާތްކުރުމަށް އަދި މަރާމާތުކުރަން ބޭނުންވާ ފަރާތްތަކަށް ލޯނު ދޫކުރާ ކުންފުނިން ބޮންޑެއް ވިއްކަން ހަމަޖައްސާފައި ވަނީ 10،000ރ.ގެ ރޭޓުންނެވެ. އެގޮތުން ބޮންޑު ވިއްކަން ފަށަނީ އަންނަ މަހުގެ ތިންވަނަ ދުވަހުން ފެށިގެން 24ގެ ނިޔަލަށެވެ.
އެޗްޑީއެފްސީން ނެރުނު އިއުލާނެއްގައި ބުނެފައި ވަނީ އެ ބޮންޑު ދޫކުރަނީ ދިހަ އަހަރު ދުވަހުގެ މުއްދަތަށް، އަހަރަކު ހަތް ޕަސެންޓްގެ އިންޓަރެސްޓާ އެކުގަ އެވެ. އެގޮތުން އަހަރަކު ދެ ފަހަރު އިންޓަރެސްޓް ލިބޭނެ ކަމަށް އެ ކުންފުނިން ބުނެ އެވެ.
އެޗްޑީއެފްސީން ވަނީ 2012 ވަނަ އަހަރު 150 މިލިއަން ރުފިޔާގެ ބޮންޑެއް ވިއްކައިގެން 50 މިލިއަން ރުފިޔާ ހޯދައިފަ އެވެ.
އެ ކުންފުނީގެ އިސް އޮފިޝަލަކު މިއަދު ވިދާޅުވީ ކުރިން ބޮންޑު ގަތް ފަރާތްތަކަށް އެ ބޮންޑުގެ ފައިސާ މިދިޔަ މާޗް މަހު އަނބުރާ ދައްކައި ހަލާސްކޮށްފައިވާ ކަމަށެވެ.
އެ ކުންފުނިން އަންނަނީ ރާއްޖޭގައި ރިއަލްއެސްޓޭޓްގެ ވިޔަފާރިކުރާ ކުންފުނިތަކަށް ފައިނޭންސް ކޮށްދެމުންނެވެ.