އެޗްޑީއެފްސީގެ ބޮންޑްގައި އިންވެސްޓްކުރުމުގެ ފުރުސަތު ހުޅުވާލައިފި

ރާއްޖޭގައި އެންމެ ފުޅާ ދާއިރާއެއްގައި ބޯހިޔާވަހިކަމުގެ ދާއިރާ އަށް ހާއްސަކޮށް ފައިނޭންސް ފޯރުކޮށްދިނުމުގެ ހިދުމަތްދޭ ހައުސިން ޑިވެލޮޕްމަންޓް ފައިނޭންސް ކޯޕަރޭޝަން (އެޗްޑީއެފްސީ) އިން މިއަދު މި ވަނީ އެ ކުންފުނިން އަލަށް ވިއްކަން އިއުލާނު ކުރި 100 މިލިޔަން ރުފިޔާގެ ބޮންޑަށް އެދުމުގެ ފުރުސަތު ހުޅުވާފަ އެވެ.

މީގެ ކުރިން، 2013 ވަނަ އަހަރު މިފަދަ ބޮންޑެއް ވިއްކައިގެން އެ ކުންފުނިން 50 މިލިޔަން ރުފިޔާ ހޯދި އެވެ. އެ ބޮންޑު ގަނެގެން އެ ކުންފުންޏަށް އިންވެސްޓްކުރި ފަރާތްތަކަށް އެ ބޮންޑުގެ ފައިދާ އާއި ބޮންޑުގެ އަގަށްވާ ފައިސާ، މިދިޔަ މާޗް މަހުގެ ނިޔަލަށް ވަނީ ބަރާބަރަށް ދައްކައި ހަލާސްކޮށްފަ އެވެ.

އެ ކުންފުނިން މި ފަހަރު ވިއްކަން އިއުލާނު ކޮށްފައި އޮތީ 100 މިލިއަން ރުފިޔާގެ 10،000 ބޮންޑެވެ. އެ ބޮންޑުގެ މުއްދަތަކީ10 އަހަރު ދުވަހެވެ. އަހަރަކު ހަތް ޕަސެންޓްގެ އިންޓަރެސްޓާ އެކު ކޮންމެ އަހަރަކު ދެ ފަހަރު ފައިސާ ދައްކާނެެ ކަމަށް އެ ކުންފުނިން ބުނެ އެވެ. މިއަދުން ފެށިގެން، މި މަހުގެ 24 ވަނަ ދުވަހަށް ބޮންޑް ގަތުމުގެ ފުރުސަތު ހުޅުވިފައި އޮންނާނެ އެވެ.

އެޗްޑީއެފްސީ އުފެދިފައި ވަނީ ދިވެހި ސަރުކާރުގެ 49 ޕަސެންޓް ހިއްސާ އާއި އިންޓަނޭޝަނަލް ފައިނޭންސް ކޯޕަރޭޝަން (އައިއެފްސީ) ގެ 18 ޕަސެންޓް ހިއްސާ އާއި އޭޝިއަން ޑިވެލޮޕްމެންޓް ކޯޕަރޭޝަން (އޭޑީބީ)ގެ 18 ޕަސެންޓް ހިއްސާ އަދި އެޗްޑީއެފްސީ އިންވެސްމެންޓް އިންޑިއާގެ 15 ޕަަސެންޓް ހިއްސާ އާއެކުގަ އެވެ.

އެޗްޑީއެފްސީގެ 14 އަހަރުގެ ތާރީހުގެ ތެރޭގައި ހައުސިން ފައިނޭންސްގެ ގޮތުގައި މިހާތަނަށް ދެ ބިލިޔަނަށް ވުރެ ގިނަ ރުފިޔާ ދޫކޮށްފައިވެ އެވެ. އެ ކުންފުނިން ބުނީ ލޯނުގެ ގޮތުގައި ދޫކުރާ ފައިސާގެ ތެރެއިން ނުލިބި ނުވަތަ ލޯނު ނުދައްކައިގެން މައްސަލަޖެހެނީ އެއް ޕަސެންޓަށް ވުރެ މަދު މީހުންގެ ކަމަށެވެ. މީގެ އިތުރުން އެ ކުންފުނިން 2012 ވަނަ އަހަރުން ފެށިގެން އިސްލާމިކް އުސޫލުން ވެސް ފައިސާ ދޫކުރަން ވަނީ ފަށާފައެވެ.

ތަފާސްހިސާބުތަކުން ދައްކާގޮތުގައި އެ ކުންފުނީގެ ޚިދުމަތްތައް ފުޅާވި ނަމަވެސް ކުންފުނީގެ ހިންގުމުގެ ހަރަދު ހުރީ އެއް ވަރެއްގައި ހިފެހެއްޓިފަ އެވެ.

ރާއްޖޭގެ އެންމެ ފައިދާ ބޮޑު އެއް އިންޑަސްޓްރީ ކަމަށްވާ ހައުސިން ނުވަތަ ރިއަލް އެސްޓޭޓް އިންޑަސްޓްރީގެ އެންމެ މުހިންމު އެއް ދާއިރާގައި ހަރަކާތްތެރިވާ ކުންފުނީގެ ފައިދާ ވެސް އަހަރަކުން އަހަރަކަށް އަންނަނީ އިތުރުވަމުންނެވެ.

މިިދިޔަ އަހަރު އެ ކުންފުނީގެ ފައިދާ އޭގެ ކުރީ އަހަރަށް ވުރެ 12.3 ޕަސެންޓް އިތުރުވި އެވެ. އަދި އެ ކުންފުނީގެ ޕޯޓްފޯލިއޯ ވެސް އަންނަނީ އަހަރަކަށް ވުރެ އަހަރެއް ވަރުގަދަ ވަމުންނެވެ. އެގޮތުން އެ ކުންފުނީގެ ޕޯޓްފޯލިއޯގެ 8.3 ޕަސެންޓް މިދިޔަ އަހަރު ކުރި އެރި އެވެ.

އެޗްޑީއެފްސީ އިން މިދިޔަ އަހަރު އިސްލާމިކް ބޮންޑު (ސުކުކް) ވަނީ ވިއްކައިފަ އެވެ.

އާންމުކޮށް ދިވެހިންނަށް ލިބޭ މިފަދަ އިންވެސްޓްމަންޓުތަކުގެ ފުރުސަތުތައް މަދެވެ. ނަމަވެސް އަނެއްކާ ވެސް މިއަދު މިއޮތީ އިންވެސްޓް ކުރަން ބޭނުންވާ ފަރާތްތަކަށް ރަނުގެ ފުރުސަތެއް ހުޅުވިފަ އެވެ.