ދެ ފާޓާ ކުލަ އާއި ދެ ދަޅު ދަވާދުން ތިން ލައްކަ ރުފިޔާ

ކަލަ ބޭންކުން ދެ ފާޓާ ކުލަ އާއި ދެ ދަޅު ދަވާދު ގަނެގެން މީހަކަށް ތިން ލައްކަ ރުފިޔާގެ ފައިސާގެ އިނާމެއް ލިބިއްޖެ އެވެ.

ރޯދަ މަހާ ދިމާކޮށް ކަލަ ބޭންކް އަދި އޭސް ހާޑްވެއާ ގުޅިގެން ހިންގި "ޝޮޕް އެންޑް ސޭވް" ޕްރޮމޯޝަންގެ ގުރުއަތު ނަގާފައިވަނީ މިދިޔަ މަހު އެވެ. އެ ޕްރޮމޯޝަންގެ ނަސީބުވެރިއަކަށް ހޮވިފައިވަނީ ހުސެއިން ރަޝީދެވެ.

ވަޑާމުގެ މަސައްކަތް ކުރަމުން އަންނަ ރަޝީދު ބުނީ، އޭނާ ކަލަ ބޭންކުން ވިޔަފާރި ކުރީ ސީދާ އިނާމު ހޯދާކަށް ނޫނެވެ. ނަމަވެސް އުއްމީދުނުކޮށް ހުއްޓައި އެފަދަ ބޮޑު އިނާމެއް ލިބުމުން ވަރަށް އުފާވާ ކަމަށް އޭނާ ބުންޏެވެ.

އެ ފައިސާއިން އޭނާ ކުރާނެ ވަކި ކަމެއް އަދި ނުނިންމަ އެވެ.

ދެ ފިހާރަ ގުޅިގެން ހިންގި އެ ޕްރޮމޯޝަންގައި 300ރ. އަށް ވުރެ މަތިން ކުރި ކޮންމެ ވިޔަފާރިއަކަށް ކޫޕަނެއް ދީފައި ވެ އެވެ.

އޭނާއަށް އެ ފައިސާގެ އިނާމު ހަވާލުކޮށްދިނީ، ރޯދަ މަހާ ދިމާކޮށް ހިންގި އެހެން ޕްރޮމޯޝަންތަކުގެ ވެސް ނަސީބުވެރިންނަށް އިނާމު ދިނުމަށް ސޯލްޓް ރެސްޓޯރެންޓުގައި މިއަދު ބޭއްވި ރަސްމިއްޔާތުގަ އެވެ.

ފޭސްބުކްގައި އޭސް ހާޑްވެއާ އިން ހިންގި "ލައިކް އެންޑް ކޮމެންޓް" މުބާރާތުގެ ނަސީބުވެރިއަކަށް ހޮވުނީ ޝިޒްނީ ހަލީމެވެ. އޭނާ އަށް ލިބުނީ ދެ މީހަކާއެކު މެލޭޝިޔާއަށް ދިއުމުގެ ދެކޮޅު ޓިކެޓެވެ.

ރޯދަ މަހު އޭސް ހާޑްވެއާ އިން ވިޔަފާރިކޮށްގެން ހޯދާފައިވާ ތަކެތި ބޭނުންކޮށްގެން ކައްކައި ކާ މޭޒުގެ ފޮޓޯއެއް އަޕްލޯޑްކޮށްގެން އެންމެ ގިނަ ލައިކްސް ހޯދާފައިވާ ފާތިމަތު ހުލައިލާ އަށް ވަނީ ރައިސް ކުކަރެއް ދީފަ އެވެ.

މޭކްއޯވާ ވިތް އޭސް ފޮޓޯ މުބާރާތުގައި ބައިވެރިވެ އެންމެ ގިނަ ލައިކްސް ހޯދާފައިވަނީ ސަމިއްޔާ މުހައްމަދެވެ. އޭނާއަށް ވަނީ 2،999ރ. ގެ އަގުހުރި ބާބަކިއު ގްރިލް އެއް ދީފަ އެވެ.

އެ ރަސްމިއްޔާތުގައި ވާހަކަދައްކަވަމުން ކޯ-ލޯޑް މޯލްޑިވްސްގެ ޖެނެރަލް މެނޭޖަރު ޓްރޭޑް މުހައްމަދު ހާނީ ވިދާޅުވީ ރޯދަ މަހާ ދިމާކޮށް ހިންގި ޕްރޮމޯޝަނަށް ކަސްޓަމަރުންގެ ފަރާތުން ވަރަށް ރަނގަޅު ތަރުހީބެއް ލިބުނެވެ. އެ ޕްރޮމޯޝަން މެދުވެރިކޮށް ކޮލިޓީ ރަނގަޅު މުދާ، ހެޔޮ އަގެއްގައި ފޯރުކޮށްދެވިފައިވާ ކަން ވެސް އޭނާ ފާހަގަކުރެއްވި އެވެ.

އޭސް ހާޑްވެއާ އާއި ކަލާ ބޭންކަކީ ކޯ- ލޯޑް މޯލްޑިވްސްގެ ދަށުން ހިންގާ ދެ ފިހާރަ އެވެ. އަދި އޭސް ހާޑްވެއާ އަކީ، އޭސް އިންޓަނޭޝަނަލްގެ ފްރެންޗައިސް އެގްރިމެންޓެއްގެ ދަށުން ސާކް ރީޖަންގައި ހުޅުވި ފުރަތަމަ އެ ބްރޭންޑްގެ ފިހާރަ އެވެ.