ފުލުހުން ނުކުމެ، މަޖިލީހުގެ އިދާރާ ހިމެނޭ ސަރަހައްދު އަލުން ބަންދުކޮށްފި

ރައްޔިތުންގެ މަޖިލީހުގެ އިދިކޮޅު 12 މެމްބަރެއްގެ ގޮނޑި ނުގެއްލޭ ކަން ސުޕްރީމް ކޯޓުން މިދިޔަ ހަފުތާގައި ނެރުނު ހުކުމުން ކަށަވަރުވާ ކަމަށް ބުނެ، މެމްބަރުން މިއަދުގެ ޖަލްސާ އަށް ވަޑައިގަތުމަށް ނިންމަވާފައި ވަނިކޮށް، ރައްޔިތުންގެ މަޖިލިހުގެ އިދާރާ ހިމެނޭ ސަރަހައްދު ބަންދުކޮށް ފުލުހުން ދެންމެ އަލުން ހަރަކާތްތެރިވާން ފަށައިފި އެވެ.

މަޖިލިހަށް ވަދެވެން އޮންނަ މަގުތަކަށް ނުވަދެވޭ ގޮތަށް ބެރިކޭޑު ޖަހައި ބަންދުކޮށްފައި މިވަނީ، ގޮނޑި ގެއްލިއްޖެ ކަމަށް އިލެކްޝަންސް ކޮމިޝަނުން ކަނޑައަޅާފައިވާ 12 މެމްބަރުން، މިއަދުގެ ޖަލްސާ ގައި ބައިވެރިވެވަޑައިގަންނަވާނެ ކަން އިއުލާންކޮށްފައި ވަނިކޮށެވެ.

ފުލުހުން މިއަދު ހެނދުނު މަޖިލިސް ކުރާގޭ ސަރަހައްދުގައި ހަރަކާތްތެރިވަނީ. - ފޮޓޯ: ހުސެއިން ވަހީދު/ މިހާރު

ފުލުހުން މަޖިލިހަށް ވަދެވެން ހުރި ހުރިހާ މަގުތަކެއް އެންމެ ފުރަތަމަ ބަންދު ކުރީ މިއަދު ހެނދުނު 9 ޖަހަން އުޅެނިކޮށެވެ. އެކަމަކު، އެ ސަރަހައްދުގައި ބައިގަޑިއިރެއްހާ އިރު، ތިބުމަށް ފަހު ފުލުހުން ވަނީ އެ ސަރަހައްދު ދޫކޮށް ގޮސްފަ އެވެ. ފުލުހުން އަލުން ނިކުމެ، މަގުތައް ބަންދު ކުރީ 12:30 ހާއިރު އެވެ. މަޖިލިހުގެ ޖަލްސާ ފެށުމަށް ހަމަޖެހިފައިވަނީ މެންދުރު ފަހު 1 ޖަހާއިރު އެވެ.

އިދިކޮޅު 12 މެމްބަރަކު، މަޖިލީހަށް ވެންނެވުމަށް ނިންމެވީ އެ މެމްބަރުންގެ ގޮނޑި ނުގެއްލޭ ކަން ސުޕްރީމް ކޯޓުން މިދިޔަ ހަފުތާގައި ނެރުނު އަމުރުން ކަށަވަރުވާ ކަމަށް ބުނެ އެވެ. ޖަލްސާތަކުގައި ބައިވެރިވާން އެ މެމްބަރުންނަށް މިހާރު އެއްވެސް ހުރަހެއް ނެތް ކަމަށް މެމްބަރުން ގަބޫލު ކުރައްވަ އެވެ.

މެމްބަރުން ވިދާޅުވި ގޮތުގައި 12 މެމްބަރުން މަޖިލީހަށް ވެންނެވުމަށް އެއްވެސް މުއައްސަސާއަކަށް ހުރަސް އެޅުމުގެ ހައިސިއްޔަތެއް ނޯންނާނެ އެވެ. ސުޕްރީމް ކޯޓުގެ ހުކުމުން އެކަން ސާފުކޮށްދީފައިވާތީ މެމްބަރުންނަށް ހުރަސް އަޅާ ފަރާތްތަކާ މެދު ގާނޫނީ ފިޔަވަޅު އަޅާނެ ކަމަށް އެ މެމްބަރުން ދަނީ އިންޒާރު ދެއްވަމުންނެވެ.

މަޖިލީހަށް އިންތިޚާބުވި ޕާޓީން ވަކިވާ ނުވަތަ ވަކިކުރާ މެމްބަރުންގެ ގޮނޑި ގެއްލޭ ގޮތަށް ސުޕްރީމް ކޯޓުން މިދިޔަ އަހަރުގެ ޖުލައި މަހު ކުރި ހުކުމުގެ ދަށުން 12 މެމްބަރެއްގެ ގޮނޑި ގެއްލިފައިވާ ކަމަށް އިލެކްޝަންސް ކޮމިޝަނުން ކަނޑައެޅި އެވެ. އެކަމަކު މިދިޔަ ފެބްރުއަރީ 1ގައި ސުޕްރީމް ކޯޓުން ނެރުނު އަމުރުގައި ކަނޑައަޅާފައިވަނީ އެ ހުކުމުގެ ދަށުން އެއްވެސް މެމްބަރެއްގެ ގޮނޑި ނުގެއްލޭ ކަމަށެވެ.

ފެބްރުއަރީ 1 ގެ އެ އަމުރުގައި 12 މެމްބަރުންނާ ގުޅޭ ގޮތުން އޮތް އެ ބައި ސުޕްރީމް ކޯޓުން މިދިޔަ ހަފުތާގައި ވަނީ ބާތިލުކޮށްފަ އެވެ. ނަމަވެސް އިލެކްޝަންސްގެ ނިންމުމާ ގުޅިގެން އެ 12 މެންބަރުން ވަކިވަކިން ހުށަހަޅާފައިވާ މައްސަލަތަކުގައި އެ ކޯޓުން ގޮތެއް ނިންމަން ޖެހޭ ކަމަށް އެ ހުކުމުގައިވެ އެވެ.

12 memberun ge gondi aa gulhey gothun Feburuary 1gai SC in nimmi nimmun baathil koffi

The most trusted news source in the Maldives

Mihaaru

އެގޮތުން، ހަތަރު މެމްބަރެއް ސުޕްރީމް ކޯޓަށް ހުށަހެޅުއްވި މައްސަލަ ނިމިފައިވާ ކަމާއި ބާކީ ތިއްބެވި އަށް މެމްބަރުންގެ މައްސަލަ ކޯޓުގައި ރަޖިސްޓްރީކޮށްފައި އޮތްކަން ހުކުމުގައި ފާހަގަ ކުރި އެވެ.

ރައްޔިތުންގެ މަޖިލީހުގެ ގޮނޑި ގެއްލުނު ކަމަށް އިލެކްޝަންސް ކޮމިޝަނުން ކަނޑައެޅި މެމްބަރުންނަކީ ދަނގެތީ ދާއިރާގެ އިލްހާމް އަހްމަދާއި މައްޗަންގޮޅީ ދެކުނު ދާއިރާގެ އަބްދުﷲ ސިނާނާއި ދިއްދޫ ދާއިރާގެ އަބްދުއްލަތީފް މުހައްމަދާއި ހަނިމާދޫ ދާއިރާގެ ހުސައިން ޝަހުދީ އާއި އިހަވަންދޫ ދާއިރާގެ މުހައްމަދު އަބްދުﷲ (މުހައްމާ) އާއި ތިނަދޫ އުތުރު ދާއިރާގެ ސައުދުﷲ ހިލްމީ އާއި ތިނަދޫ ދެކުނު ދާއިރާގެ އަބްދުﷲ އަހްމަދާއި ތިމަރަފުށީ ދާއިރާގެ މުހައްމަދު މުސްތޮފާ އާއި ފުވައްމުލަކު އުތުރު ދާއިރާގެ އަލީ ޝާހުގެ އިތުރުން ތުލުސްދޫ ދާއިރާގެ މުހައްމަދު ވަހީދު (ވައްޑެ) އާއި ވިލިނގިލީ ދާއިރާގެ ސައުދު ހުސައިންގެ އިތުރުން މަޑުއްވަރީ ދާއިރާގެ މުހައްމަދު އަމީތެވެ.

Majilis ah vannan mihaaru huraheh neiy: 12 memberun

The most trusted news source in the Maldives

Mihaaru