ބޮލީވުޑްގެ ހަބަރުތައް ކުރުކޮށް

މި މަހުގެ 28 ގައި ރިލީޒް ކުރާ ފިލްމު "ސިމްބާ" ގެ ފުރަތަމަ ލަވަ ދައްކާލައިފަ އެވެ.

މި ލަވައަކީ ކުރިން ވަރަށް މަޝްހޫރުވި ލަވައެއް ކަމަށްވާ "އާކް މާރޭ"ގެ އާ ވާޝެނެކެވެ. ލަވަ ކިޔާފައި ވަނީ މިކާ ސިންގް އާއި ނޭހާ ކައްކަރުގެ އިތުރުން ކުމާރު ސާނޫ އެވެ. "އާކް މާރޭ" އަކީ 1996 ގައި ރިލީޒް ކުރި ފިލްމު "ތޭރޭ މޭރޭ ސަޕްނޭ" ގެ ލަވައެކެވެ.

ނަމަވެސް "ސިމްބާ" ގައި ހިމެނޭ މި ލަވައިގެ އާ ވާޝަނަށް ވަނީ ޒަމާނީ ބައެއް ބަދަލުތައް ގެނެސްފަ އެވެ. ލަވައިން ފެނިގެން ދަނީ މި ފިލްމުގެ ލީޑް ދެ ތަރިން ކަމަށްވާ ރަންވީރު ސިންގް އާއި ސާރާ އަލީ ހާނެވެ. އަދި މި ލަވައިން ޑައިރެކްޓަރު ރޯހިތު ޝެޓީގެ "ގޯލްމާލް" ފްރެންޗައިޒްގެ ކާސްޓުންގެ ތެރޭގައި ހިމެނޭ އަރުޝަދު ވަރުސީ، ތުޝާރު ކަޕޫރު، ޝްރެޔަސް ތަލްޕަޅޭ އަދި ކުނާލް ކޭމޫ ވެސް ފެނިގެން ދެ އެވެ.

"ސިމްބާ" ގެ "އާކް މާރޭ" ލަވައިގެ ހާއްސަ އެއް ކަމަކީ މި ފިލްމުގެ ކޯ-ޕްރޮޑިއުސަރު ކަރަން ޖޯހަރުގެ ފެނިލުމެއް ވެސް ހިމެނޭތީ އެވެ.

މި އަހަރުގެ އެންމެ އުންމީދީ ފިލްމުތަކުގެ ތެރޭގައި ހިމެނޭ "ސިމްބާ" އަކީ ކައިވެންޏަށް ފަހު، ރަންވީރު ފެނިގެން ދާނެ ފުރަތަމަ ފިލްމެވެ. މީގައި އޭނާ ކުޅެފައި ވަނީ ފުލުހެއްގެ ރޯލެވެ.

"މަރްޖާވާ" ގެ ޝޫޓިން ފަށައިފި

މި އަހަރުގެ އެންމެ ކާމިޔާބު އެއް ފިލްމު ކަމަށްވާ ޖޯން އަބްރަހަމްގެ "ސަތިޔަމޭވް ޖަޔަތޭ" ގެނެސް ދިން ޑައިރެކްޓަރު މިލަޕް މިލަން ޒަވޭރީގެ އާ ފިލްމު "މަރްޖާވާ" ގެ ޝޫޓިން ފަށައިފި އެވެ.

ބުޝަން ކުމާރުގެ ޓީ ސީރީޒާއި ނިކިލް އަދުވާނީގެ އެއްމޭ އެންޓަޓައިންމަންޓް ގުޅިގެން ގެނެސްދޭ މި ފިލްމުގެ ތަރިންނަކީ ސިދާތު މަލްއުތުރާ، ރަކުލް ޕްރީތު ސިންގް، ރިތޭޝް ދޭޝްމުކް އަދި އަންނަ އަހަރު ރިލީޒް ކުރާ ފިލްމު "ސްޓޫޑަންޓް އޮފް ދި އިޔާ 2" އިން ބޮލީވުޑަށް ތައާރަފު ކުރާ ބަތަލާ ތާރާ ސުތާރިއާ އެވެ.

"މަރްޖާވާ" ސިނަމާތަކަށް އަންނާނީ އޮކްޓޯބަރު، 2، 2019 ގަ އެވެ. މި ފިލްމުވެގެން ދާނީ 2014 ގައި ރިލީޒް ކުރި "އޭކް ވިލަން" އަށް ފަހު ސިދާތާއި ރިތޭޝް އެކުގައި ފެނިގެންދާ ފުރަތަމަ ފިލްމަށެވެ.

"ސޯންޗިޅިޔާ" ގެ ޓީޒާ ދައްކާލައިފި

ދެހާސް ސޯޅައިގެ އެންމެ ކާމިޔާބު ފިލްމުތަކުގެ ތެރޭގައި ހިމެނޭ "އުޅުތާ ޕަންޖާބް" ގެ ޑައިރެކްޓަރު އަބީޝެކް ޗޯބޭގެ އާ ފިލްމު "ސޯންޗިޅިޔާ" ގެ ޓީޒާ ޓްރެއިލާ ދައްކާލައިފި އެވެ.

މި ފިލްމުގައި ލީޑް ރޯލް ކުޅެފައި ވަނީ ބޫމީ ޕެޑްނޭކަރު އާއި ހުކުރު ދުވަހު ސިނަމާތަކުގައި ދައްކަން ފެށި ފިލްމު "ކެދަރުނާތު" ގެ ބަތަލު ސުޝާންތު ސިންގް ރާޖްޕޫތު އެވެ. "ސޯންޗިޅިޔާ" އަކީ ސުޝާންތާއި ބޫމީގެ ޖޯޑު ސްކްރީނުން ފެނިގެން ދާނެ ފުރަތަމަ ފިލްމެވެ.

މި ކްރައިމް ތުރިލާގެ އިތުރު ކާސްޓުންގެ ތެރޭގައި މަނޯޖް ބަޖްޕާއީ ރަންވީރު ޝޯރޭ، އަޝުތޯޝް ރާނާ އަދި މުހައްމަދު ޒީޝާން އައްޔޫބް ހިމެނެ އެވެ.

ރޯނީ ސްކްރޫވާލާ ޕްރޮޑިއުސްކޮށްފައިވާ "ސޯންޗިޅިޔާ" ރިލީޒް ކުރާނީ އަންނަ ފެބްރުއަރީ މަހުގެ 8 ގަ އެވެ.

"ޖަބަރިޔާ ޖޯޅީ" މެއި މަހު

ޕަރިނީތީ ޗޯޕްޅާ އާއި ސިދާތު މަލްއުތުރާ އެކީގައި ކުޅޭ ދެވަނަ ފިލްމު "ޖަބަރިއާ ޖޯޅީ" އަންނަ އަހަރުގެ މެއި މަހު ރިލީޒް ކުރާ ގޮތަށް ނިންމައިފި އެވެ.

އެކްތާ ކަޕޫރްގެ ބަލާޖީން ޕްރޮޑިއުސް ކުރާ މި ފިލްމު ސިނަމާތަކުގައި ދައްކަން ފަށާނީ މެއި މަހުގެ 17 ވަނަ ދުވަހު އެވެ. މި ފިލްމަކީ ފްރަޝާންތު ޑައިރެކްޓް ކުރާ ފިލްމެކެވެ. ޕަރިނީތީ އާއި ސިދާތު އެކީގައި ކުޅުނު ފުރަތަމަ ފިލްމަކީ 2014 ގައި ރިލީޒް ކުރި "ހަސީ ތޯ ޕަސީ" އެވެ.

ރަޖްނީކާންތާ އެކު ނަވާޒުއްދީން

އިންޑިއާގެ ދެކުނުގެ މަޝްހޫރު އެކްޓަރު ރަޖްނީކާންތު މި ފަހުން ކުޅޭ ހުރިހާ ފިލްމުތަކެއްގައިހެން ބޮލީވުޑް ތަރިން ހިމަނަމުން އަންނަ އިރު، އަނެއްކާ ވެސް އޭނާގެ ފިލްމަކުން ބޮލީވުޑްގެ ހުނަރުވެރި އެކްޓަރަކަށް ފުރުސަތު ދީފި އެވެ.

މިހާރު ޝޫޓިން ކުރިއަށްދާ ތަމަޅަ ފިލްމު "ޕެއްޓާ" ގެ ނުބައިބައި ރޯލުން ފެނިގެން ދާނީ ބޮލީވުޑްގެ އެންމެ ވަރުގަދަ އެކްޓަރުންގެ ތެރޭގައި މިހާރު ގުނައިލެވޭ ނަވާޒުއްދީން ސިއްދީގީ އެވެ. އޭނާ މި ފިލްމުގައި ފެނިގެން ދާނީ ސިންގާރު ސިންގް ކިޔާ ކެރެކްޓާއަކުންނެވެ، އަދި އޭނާގެ ފަސްޓް ލުކް މިހާރު ވަނީ ދައްކާލައިފަ އެވެ.

އަންނަ ޖެނުއަރީ މަހުގެ 11 ވަނަ ދުވަހު ރިލީޒް ކުރަން ނިންމާފައިވާ "ޕެއްޓާ" އަކީ ކާތިކް ސުބްރާޖް ޑައިރެކްޓް ކުރާ އެކްޝަން ތުރިލާއެކެވެ. މި ފިލްމުގައި ރަޖްނީކާންތާ އެކު ބަތަލާއިންގެ ރޯލުން ފެނިގެން ދާނީ ސިމްރަން ބައްގާ އާއި ތުރިޝާ އެވެ.

ރަޖްނީކާންތުގެ އެންމެ ފަހުގެ ފިލްމަކީ އަކްޝޭ ކުމާރު ވެސް މުހިއްމު ރޯލެއް ކުޅެ، މިހާރު ސިނަމާތަކުގައި ދައްކަމުން އަންނަ "2.0" އެވެ. މިދިޔަ ޖޫންގައި ރިލީޒް ކުރި ރަޖްނީކާންތުގެ "ކާލާ" ގައި ބޮލީވުޑްގެ ތަރިން ކަމަށްވާ ނާނާ ޕަޓޭކަރް އާއި ހުމާ ގްރޭޝީ ވެސް މުހިއްމު ރޯލްތަކެއް ކުޅެފައިވެ އެވެ.