ޓީރެކްސް ހުއްޓުވައި ކިންގްސް ގައުމީ ތަށި އުފުލާލައިފި

އެންމެ ފަހުގެ ޗެމްޕިއަން ޓީރެކްސް ބާސްކެޓްބޯލް ކްލަބް 87-79 އިން ބަލިކޮށް ކިންގްސް ބާސްކެޓްބޯލް ކްލަބުން 37 ވަަނަ ގައުމީ ބާސްކެޓްބޯޅަ މުބާރާތުގެ ޗެމްޕިއަންކަން ހޯދައިފި އެވެ.

މި އަހަރުގެ އެމްބީއޭ ޗެމްޕިއަންޝިޕާއި ގައުމީ ލީގުގެ ޗެމްޕިއަންކަން ޓީރެކްސް އިން ހޯދީ ކިންގްސްގެ މައްޗަށް ކުރި ހޯދައިގެންނެވެ. ޓީރެކްސް އިން މިދިޔަ އަހަރުގެ ގައުމީ މުބާރާތް ކާމިޔާބުކުރީ ވެސް ކިންގްސް ބަލިކޮށްފަ އެވެ. އޭގެ ބަދަލު ހިފައި ކިންގްސް އިން ވަނީ މިރޭ ފައިނަލުގައި ޓީރެކްސް ބަލިކޮށް ގައުމީ ޗެމްޕިއަންކަން ހޯދީ އެވެ.

މިރޭގެ މެޗަށް ނުކުތްއިރު ޓީރެކްސް އަށް ދިމާވި އެންމެ ބޮޑު މައްސަލަ އަކީ އެންމެ ފަހުން ކުޅުނު މެޗުގައި ހުސެއިން ހަލީމް (ޗިކަނޭ)ގެ ފަޔަށް ލިބުނު އަނިޔާއެއްގެ ސަބަބުން މިރޭ ކުޅެވޭ ގޮތް ނުވުމެވެ. އަދި މި މެޗަށް ނުކުތްްއިރު ކިންގްސް އަށް އޮތް އެންމެ ބޮޑު ހިތްހަމަ ޖެހުމަކަށްވީ ޓީރެކްސްއާ އެކު އެންމެ ފަހުން ކުޅުނު ދެ މެޗުގައި ސަސްޕެންޝަނުގެ ސަބަބުން ނުކުޅެވުނު ރިޝްފާން ރަޝީދަށް މި މެޗުގައި ކުޅެވުމެވެ. ކިންގްސް މޮޅުވުމުގައި އޭނާ ވަނީ މުހިއްމު ދައުރެއް އަދާކޮށްދީފަ އެވެ. އޭނާ މި މެޗުގައި 17 ޕޮއިންޓް އެއްކުރި އެވެ.

ޒުވާނުންގެ މަރުކަޒު އެތެރެ ކޯޓުގައި މިރޭ ކުޅުނު މެޗުގެ ފުރަތަމަ ކުއާޓަރު ފަށައިގެން ކިންގްސް އިން ދިޔައީ ލީޑު ދަމަހައްޓަމުންނެވެ. މި މެޗުގައި ކިންގްސް މޮޅުވުމުގެ އެންމެ ބޮޑު ކްރެޑިޓެއް ހައްގުވަނީ އެ ޓީމުގެ އެމެރިކާ ކުޅުންތެރިއާ މައިކް ފޭ އަށެވެ. އޭނާ ވަނީ ތިން ޕޮއިންޓަށް ޓާގެޓްކޮށް ފޮނުވާލި ގިނަ ބޯޅަތައް ކާމިޔާބުކޮށްފަ އެވެ.

ސޯޅަ ޕޮއިންޓުގެ ލީޑަކާ އެކު ކިންގްސް އިން ފުރަތަމަ ކުއާޓަރު ނިންމާލިއިރު، ދެ ވަނަ ކުއާޓަރު ފަށައިގެން ކިންގްސް އިން ޕޮއިންޓެއް ހޯދިޔަނުދީ ޓީރެކްސް އިން ވަނީ އެ ޓީމާ އެއް ޕޮއިންޓާ ގާތަށް ޖެހިލައިފަ އެވެ. އެކަމަކު މުހިއްމު ވަގުތުގައި ކިންގްސްގެ ކެޕްޓަން މުހައްމަދު ޒިލާލް (ޒިލާ) ދެއްކި ތަފާތާ އެކު ކިންގްސް އިން އަނެއްކާ ލީޑުފުޅާކުރި އެވެ. ދެ ވަނަ ކުއާޓަރު ނިމުނުއިރު ކިންގްސް ކުރީގައި އޮތީ 44-33 އިންނެވެ.

ތިން ވަނަ ކުއާޓަރު ފެށިގެން ޓީރެކްސް އިން ރަނގަޅަށް ކުޅެމުންދަނިކޮށް މައްސަލަ ދިމާވީ އެ ޓީމުގެ އެންމެ މުހިއްމު އެއް ކުޅުންތެރިއާ އަހުމަދު ޒަބީރު (ޒަބީ)ގެ ފަލަމަސްގަނޑަށް އަނިޔާވުމުންނެވެ. ކިންގްސް އިން ވަނީ ތިން ވަނަ ސެޓުގައި މައިކް އާއި އަހުމަދު ފިރާޝް (ފިރާ) ދެއްކި މޮޅު ކުޅުމާ އެކު މި ކުއާޓަރު ނިންމާލިއިރު، ޕޮއިންޓުގެ ފަރަގު ބޮޑުކޮށްފަ އެވެ.

ފަހު ކުއާޓަރުގައި ޓީރެކްސްގެ ތަޖުރިބާކާރު ކުޅުންތެރިން މެޗު އެ ޓީމު ކޮޅަށް އަނބުރާލަން މަސައްކަތްކުރި ނަމަވެސް އެކަން ކާމިޔާބުވާގޮތެއްނުވި އެވެ. އެންމެ ބޮޑު މައްސަލަ އަކަށް ޓީރެކްސް އަށް ދިމާވީ ބިދޭސީ ކުޅުންތެރިއާ އާމިން ޖޭޒްވިން އަށް ތަފާތު ނުދެއްކުމެވެ. އަނެއްކޮޅުން ކިންގްސްގެ މައިކް އާއި ރިޝްފާން ފެނުނީ އާދަޔާހިލާފު ރޫހެއްގައި ކުޅުނުތަނެވެ. އެ ދެ ކުޅުންތެރިންގެ އެޓޭކްތަކާ އެކު ކިންގްސް އިން ފެށި ފޯމުގައި އޮވެގެން މެޗު ކާމިޔާބުކުރީ 87-79 އިންނެވެ.

ފައިނަލް މެޗުގެ މޮޅު ކުޅުންތެރިއާގެ މަގާމާއި މުބާރާތުގެ މޮޅު ކުޅުންތެރިއަކަށް ހޮވުނީ ރޭގެ މެޗުގައި 29 ޕޮއިންޓް އެއްކުރި މައިކް އަށެވެ. މުބާރާތުގެ އެންމެ އުއްމީދީ ކުޅުންތެރިއަކީ ސްޓިންގާސް ބާސްކެޓްބޯލް ކްލަބްގެ މުހައްމަދު ސަަބީހު ތައުފީގް އެވެ.

މިއަދު ހަވީރު ކުޅުނު ގައުމީ މުބާރާތުގެ އަންހެން ޑިވިޝަނުގެ ޗެމްޕިއަންކަން ހޯދީ ގައުމީ ލީގު ވެސް ކާމިޔާބުކުރި ސައިކްލޯން ބާސްކެޓްބޯލް ކްލަބް އެވެ. ފައިނަލުގައި ޖިބިއްލީ ސްޕޯޓްސް ކްލަބާ ވާދަކޮށް ސައިކްލޯން މޮޅުވީ 49-33 އިންނެވެ.

ފައިނަލުގެ މޮޅު ކުޅުންތެރިއަކަށް ސައިކްލޯންގެ ބިދޭސީ ކުޅުންތެރިއާ ޔެލީނާ ހޮވުނުއިރު، މުބާރާތުގެ މޮޅު ކުޅުންތެރިއަކީ ޖިބިއްލީގެ ފާތިމަތު ރިޝްމާ އެވެ. އަދި އެންމެ އުއްމީދީ ކުޅުންތެރިއަކީ ސައިކްލޯންގެ ރާއިފާ އިބްރާހިމް އެވެ.

ތިން ޓީމު ވާދަކުރި ގައުމީ ލީގާއި މުބާރާތުގެ ޗެމްޕިއަންކަން ސައިކްލޯން އިން ހޯދި ސައްތަ އިން ސައްތަ ރެކޯޑަކާ އެކު ހުރިހާ މެޗަކުން މޮޅުވެގެންނެވެ. ސައިކްލޯނަށް މި ފަހަރުގެ ގައުމީ މުބާރާތް ލިބުމުން އެ ޓީމު ވަނީ ޖެހިޖެހިގެން ތިން މުބާރާތް ހަމަކޮށް މުބާރާތުގެ ތަށި މިލްކުކޮށްފަ އެވެ. މި އަހަރުގެ އެމްބީއޭ ޗެމްޕިއަންޝިޕްގެ އަންހެން ޑިވިޝަން ވެސް ކާމިޔާބު ކުރީ ސައިކްލޯން އިންނެވެ. އެ ޓީމުން އަހަރު ނިންމާލީ ތިން ތަށި ހަމަކޮށް ފުރިހަމަ ކާމިޔާބީއަކާ އެކު އެވެ.