މާދަމާ އަކީ ބޮޑު ދުވަހެއް! އެކަމަކު އިންސާނަކަށް މިކަން ވާނެތަ؟

އިންސާނަކަށް މެރަތަންއެއް ދެ ގަޑި އިރަށް ވުރެ ބާރަށް ޖެހިދާނެ ކަމާ މެދު، ދުވުމުގެ ތަޖުރިބާކާރުންނާއި ސައިންސްވެރިންގެ މެދުގައި އޮތީ ސުވާލެއް އުފެދިފަ އެވެ. އެކަމަކު މި ވަގުތު އެ ބޮޑު ވަރުގަދަ ޗެލެންޖް ކާމިޔާބުކުރެވޭ ނަމަ އެ ހުނަރާއި ހިތްވަރު ހުރީ އެންމެ ދުވުންތެރިއެއްގެ އެވެ: އެލިއޫޑް ކިޕްޗޯޖް އެވެ.

މާދަމާ، އޮސްޓްރިއާގެ ވެރިރަށް ވިއެނާގެ ހާއްސަ ސަރަހައްދެއްގައި އޭނާ އެ ނުކުންނަނީ، ދުވުމުގައި މިހާތަނަށް އިންސާނުންނަށް ހާސިލްނުވެ އޮތް ހަމައެކަނި މަންޒިލް ފަތަހަކުރާށެވެ. މިއީ ދެ ގަޑިއަރަށް ވުރެ އަވަހަށް މެރަތަންއެއް ޖަހަން ކިޕްޗޯޖް ނުކުންނަ ދެ ވަނަ ފަހަރެވެ.

މީގެ ދެ އަހަރު ކުރިން 2017 ގައި، ނައިކްގެ ފަރާތުން ހިންގި "ބްރޭކިން ޓޫ" ޕްރޮޖެކްޓްގައި، އޭނާއަށް އެ ލަނޑުދަނޑި ހާސިލްނުވީ އެންމެ 25 ސިކުންތު ލަސްވެގެންނެވެ. އިޓަލީގެ މޮންޒާގައި އޮންނަ ކާރު ރޭސް ޖަހާ ޓްރެކެއްގައި އެފަހަރު މެރަތަންގެ ރާސްތާ ކަނޑައްތުކުރެވުނީ ދެ ގަޑި 25 ސިކުންތުންނެވެ.

އެކަމަކު މިއީ މިހާތަނަށް 42 ކިލޯމީޓަރުގެ ދުވުން އިންސާނަކު ފުރިހަމަ ކުރި އެންމެ އަވަސް ވަގުތެވެ.

އެ ދުވަހުގެ ރޭހަށް ފަހު، ކިޕްޗޯޖް، 34، މައުނަވީ ގޮތަކަށް ބުނީ، "ދުނިޔެ އެ އޮތީ އެންމެ 25 ސިކުންތު ދުރުމިނުގައި" ކަމަށެވެ.

މާދަމާ އަކީ، އޭނާގެ "އެ ދުނިޔެ" ހާސިލްކުރަން، ދިގު ދުވުމުގައި މިވަގުތު ލިބެން ތިބި އެންމެ މޮޅު ދުވުންތެރިންގެ 41 ބައިވެރިންނާ އެކު، ނުކުންނަ ދުވަހެވެ.

އިނިއޮސް 1:59 ޗެލެންޖް

މި ފަހަރުގެ މަޝްރޫއުގެ ބައިވެރިޔަކީ ކެމިކަލްގެ ބާވަތްތަކަށް ހާއްސަ އިނގިރޭސި ބޮޑު ކުންފުންޏެއް ކަމަށް ވާ އިނިއޮސް އެވެ. މީގެ ތިން މަސް ކުރިން ފެށިގެން އިނިއޮސް 1:59 ޗެލެންޖްގެ ޓީމުން އަންނަނީ އެކި ދާއިރާތަކުން ތައްޔާރުވަމުންނެވެ.

ދުވުން ބާއްވަން ފުރަތަމަ ކަނޑައެޅީ ލަންޑަން އެވެ. އެކަމަކު ރޭސް އޮންނަ ދުވަސްވަރުގެ ފިނިހޫނުމިނާއި، ވައިގެ ތެތްކަމުގެ ނިސްބަތް ފަދަ މުހިންމު އެތައް ކަމެއް، އިންސާނަކު ލައްވާ އެވަރުގެ ދުވުމެއް ދުއްވާ އިރު ބަލަން ޖެހެ އެވެ. އެހެންކަމުން އިނިއޮސްގެ ތަޖުރިބާކާރުންނަށް ފެނުނު އެންމެ ރަނގަޅު ތަނަކަށް ވީ ވިއެނާގެ ޕްރެޓާ އެވެ. މިއީ ވަށައިގެން ފެހިކަން ބޮޑު، މަގު އެއްވަރަށް އޮންނަ މަޝްހޫރު ޕާކެކެވެ.

ކިޕްޗޯޖްގެ ތައްޔާރީތައް އޮތީ، އޭނާގެ އުފަން ގައުމު ކެންޔާގައި، އާންމުކޮށް ކޮންމެ ރޭހަކަށް ވެސް އޭނާ ދުވާ ކޭމްޕްގަ އެވެ. އޭނާއާ އެކު ކެންޔާގެ މޮޅު ގިނަ ދުވުންތެރިންތަކެއް ބައިވެރިވި އެވެ. އަދި ދުނިޔޭގެ އެކި ހިސާބުތަކުން، ދިގު ދިވުމުގެ އެތައް ތަރިންނެއް އެންމެ ފަހު ވަގުތު ވެސް ވަނީ، އޭނާއަށް އެހީތެރިވާން ނިންމައިފަ އެވެ. އެހެންކަމުން، މާދަމާ، އެކި ދުރުމިންތަކުން ބަދަލުވާ ގޮތަށް، ކިޕްޗޯޖްއާ އެކު 41 ދުވުންތެރިން ދުވާނެ އެވެ.

މެރެތަންގައި މިހާރު ވެސް ދުނިޔޭގެ ރެކޯޑް އޮތް (ދެ ގަޑި، 1 މިނިޓް 39 ސިކުންތު) ކިޕްޗޯޖް ގަބޫލުކުރާ ގޮތުގައި މުޅި ރޭސް އޭނާ އެކަނި ފުރިހަމަ ކުރިޔަސް، ދެ ގަޑި އިރަށް ވުރެ އަވަހަށް 42 ކިލޯމީޓަރު ދުވެ ނިންމާލުމަކީ، މުޅި ޓީމުގެ މަސައްކަތެވެ. އެހެންކަމުން އޭނާ، އެހެން ދުވުންތެރިންނާ މެދު ބުނީ "ތާރީޚު ބަދަލުކޮށްލުމުގައި ތިއިން ކޮންމެ ބައިވެރިއެއްގެ ވެސް ހިއްސާ އޮންނާނެ" ކަމަށެވެ.

"އިނިއޮސް 1:59 ޗެލެންޖަށް އަހަރެން މިހިރީ ތައްޔާރުވެގެން. ދުނިޔެއަށް ދައްކަން ބޭނުންވަނީ، އެއްވެސް އިންސާނެއްގެ ގާބިލްކަމަށް ހުރަހެއް ނެތްކަން،" ތަމްރީންތަކަށް ފަހު މި މަހު 8 ގައި ވިއެނާއަށް އައުމަށް ފަހު ކިޕްޗޯޖް ބުންޏެވެ.

މި ޗެލެންޖް އިއުލާންކުރި އިރު ވެސް އޭނާ ބުނެލީ ހަމަ އެވާހަކަ އެވެ.

"އިންސާނުންނަށް މިވެނި ކަމެއް ނުކުރެވޭނެއޭ ބުނާ ބުނުން ބަދަލުކޮށްލަން އަހަރެން ބޭނުންވަނީ،" ކިޕްޗޯޖް ބުންޏެވެ.

"އަމިއްލަ ނަފުސަށް އިތުބާރު އޮތް ނަމަ ހުރަސް ނުކުރެވޭނެ އޮޅިގަނޑެއް އިންސާނަކަށް ނޯންނާނެ. ކުރާ ކަމެއްގައި ބޭނުންވަނީ ހިތްވަރު، އިތުބާރު."

- 100 މީޓަރު: 17:08 ސިކުންތު

- 200 މީޓަރު: 34:17 ސިކުންތު

- 400 މީޓަރު: 1 މިނިޓް 8 ސިކުންތު

- 800 މީޓަރު: 2 މިނިޓް 16 ސިކުންތު

- 1500 މީޓަރު: 4 މިނިޓް 16 ސިކުންތު

- 5000 މީޓަރު: 14 މިނިޓް 13 ސިކުންތު

- 10،000 މީޓަރު: 28 މިނިޓް 26 ސިކުންތު

- ހާފް މެރަތަން: 59 މިނިޓް 59 ސިކުންތު

މާދަމާގެ ދުވުން ކާމިޔާބުވިޔަސް އެއީ މެރެތަންގެ ދުނިޔޭގެ ރެކޯޑު ކަމަކަށް ނުވާނެ އެވެ. މެރަތަންގެ ރެކޯޑެއްގެ ގޮތުގައި، ދުނިޔޭގެ އެތުލެޓިކްސްގެ މައި އިދާރާ އައިޑަބަލްއޭއެފުން ބަލާ މިންގަނޑުތަކާ ހިލާފު އެތައް ކަމެއް އިނިއޮސް ޗެލެންޖްގައި ހިމެނެ އެވެ. އޭގެ ތެރޭގައި މުޅި ރޭހުގައި ޕޭސްމޭކަރުން ބޭނުންކުރުމާއި، ހަށިގަނޑަށް ބޭނުންވާ މާއްދާތައް ހިމެނޭ ބުއިންތައް ދޭން ވެސް، އަސްލު ރޭސްތަކާ ހިލާފު އުސޫލުތަކެއް ގެންގުޅުމާއި، ސްޕީޑް ކޮންޓްރޯލްކުރަން ހާއްސަ ކާރު ބޭނުން ކުރުން ފަދަ ކަންކަމެވެ.

ނައިކްގެ "ބްރޭކިން ޓޫ" ނާކާމިޔާބުވީ ކީއްވެ؟

ބައިވަރު ސަބަބުތައް އެބަ ހުއްޓެވެ. އެފަހަރުގެ ހަމައެކަނި ފޯކަސް އަކީ ކިޕްޗޯޖެއް ނޫނެވެ. އޭނާއާ އެކު މަޝްހޫރު އެހެން ދެ ދުވުންތެރިން ކަމަށް ވާ ޒާސެނޭ ޓާޑެސީ އާއި ލެލީސާ ދެސީސާ ވެސް ނައިކްގެ ޕްރޮޖެކްޓްގައި ބޭނުންކުރި އެވެ. އަދި އެ މީހުންގެ ދުވުން ވަކި ސްޕީޑެއްގައި ބަހައްޓަން 30 ޕޭސްމޭކަރުން ވެސް ބައިވެރިވި އެވެ.

އެކަމަކު އަނެއް ދެ ދުވުންތެރިންނަށް ކިޕްޗޯޖާ އެކު ހިފަހައްޓައެއް ނުލެވުނެވެ.

މޮންޒާގެ ފިނިހޫނުމިން، އެފަދަ ދުވުމަކަށް އެންމެ އެކަށީގެންވާ ވަރަށް ވުރެ މައްޗެވެ. ވައިގެ ތެތްކަމުގެ އެވްރެޖް ނިސްބަތް ވެސް ހުރީ، އެ ދުވުމުގައި، ހަށިގަނޑަށް ނުކުތާ ވަރެއްގަ އެވެ.

މުޅި މަޝްރޫއުގެ އެކި ކަންކަމާ ބެހޭ ގޮތުން ލިއުނު ލިއުންތެރިޔާ އެޑް ސީޒާގެ އެއް މަޒުމޫނުގައިވެ އެވެ:

"ވިހި މެއިލްއާ ޖެހެންދެން، އޭނާ ދުވަމުން ދިޔައީ އެ ސްޕީޑްގަ އެވެ. ދެ ގަޑިއިރަށް ވުރެ އަވަހަށް ދުވެވިދާނެ ކަމަށް ޓްރެކްގައި ބަލަން ތިބި މީހުންނަށް ޔަގީންވި އެވެ. އެކަމަކު ދެން ފެނުނީ ގުދުރަތުގެ އުސޫލާއި އިންސާނާގެ ހަށިގަނޑާ ގުޅޭ ހަމަތައް، އޭގެ އަސްލު މަގަށް އެޅުނު ތަނެވެ. ފުރަތަމަ މެއިލްތަކުގައި ދުވެލި ބާރު މިނުގެ ވަރުގަދަކަން އޭނާގެ ހަށިގަނޑަށް އަނިޔާއަކަށް ވި އެވެ. އޭނާގެ މަސްތަކުގައި ލެކްޓިކް ގިނަވެ، ފުރާލި އެވެ. އަވަނެއް ފަދައިން އޭނާގެ ހަށިގަނޑުގެ އެތެރެ އަނދަން ފެށި އެވެ. އެހާ ހިސާބުން މެއިލްއެއް ކަނޑައްތު ކުރަމުން އައި ސްޕީޑް، ސިކުންތަކުން ލަސްވި އެވެ."

އެކަމަކު އެ ހާލަތުގައި ވެސް، ކިޕްޗޯޖުގެ ވަގުތަކީ އިންސާނަކަށް މިހާތަނަށް ހޯދުނު އެންމެ ބޮޑު ކާމިޔާބީ އެވެ.

ރޭހަށް ހާއްސަ ކާރު

މެރަތަންގެ 42 ކިލޯމީޓަރު އެއް ސްޕީޑެއްގައި ބަހައްޓަން ކިޕްޗޯޖަށް އެހީތެރިވާނީ ހަމައެކަނި، ދިގު ދުވުމުގައި ދުނިޔެއިން ހޮވާލެވޭނެ އެންމެ ވަރުގަދަ 41 ދުވުންތެރިންނެއް ނޫނެވެ. އޭނާގެ އެންމެ ކުރީގައި އޮންނާނީ އެކަމަށް ހާއްސަކޮށްފައިވާ ކާރެކެވެ. އެ ކާރުން ފެހި ކުލައިގެ ރޮނގުތަކަކުން ބިންމަތި އަލިކޮށްދެ އެވެ. ޕޭސްމޭކަރުންނާއި އޭނާ ދުވާނީ އެ ރޮނގާ އެއް ވަރަށެވެ.

"މެރަތަންއެއް، އެއް ސްޕީޑެއްގައި ދުވުމަކީ ކިހާ އުނދަގޫ ކަމެއްކަން އެނގޭނީ އެގޮތަށް ދުވާ މީހަކަށް،" އިނިއޮސް ޗެލެންޖުގެ ޕާފޮމެންސް ޓީމް މެނޭޖަރު ޕީޓާ ވިންޓް ބުންޏެވެ.

"ދުނިޔޭގެ އެންމެ މޮޅު މެރަތަން ދުވުންތެރިން އެގޮތަށް ސްޕީޑް ހިފެހެއްޓިޔަސް، ދެ ގަޑިއިރަށް ވުރެ އަވަހަށް ނިންމަންޏާ އެއް ސްޕީޑެއްގައި މުޅި ރޭސް ހިފަހައްޓަން އެބަ ބޭނުންވޭ އާދަޔާ ހިލާފު ބަރާބަރުކަމެއް."

އެންމެ ޒަމާނީ އާލާތްތައް ހަރުކޮށްފައިވާ ކާރުގެ ސްޕީޑް، ކިޕްޗޯޖް ދުވަން ޖެހޭ ބާރު މިނުގައި ބަހައްޓާފައި ހުންނަ އިރު، އޭގެ އަޑުން ވެސް ދުވުންތެރިންނަށް އުނދަގޫ ނުވާނެ ގޮތް ވަނީ ހަދައިފަ އެވެ.

އެކަމަކު 100 ޕަސެންޓް ފުރިހަމައަށް ކާރުގެ ސްޕީޑް ބެހެއްޓުމަކީ އުނދަގޫ ކަމެކެވެ. އެކަމަށް ހައްލެއް ހޯދަން، އިންޖިނިއަރުން ވަރަށް މަސައްކަތްކުރި އެވެ. ވިއެނާގެ ދުވާ ސަރަހައްދުގައި ހެދި ޓެސްޓްތަކުން އެނގުނީ، ރޭސް ނިމޭ އިރު އެންމެ ބޮޑު ތަފާތެއް ވެސް ވިޔަސް ހުންނާނީ ސިކުންތަކަށް ވުރެ އަވަސް/ލަސް ނުވާނެ ގޮތަކަށް ކަމެވެ.

ޓެސްޓްތައް ހެދިއިރު މެރަތަންގެ ރާސްތާ ދެ ގަޑިއިރުން ކަނޑައްތުކުރުމުގައި ގޯހެއްގެ ގޮތުގައި ހަމައެކަނި ފާހަގަކުރެވެނީ އެންމެ މީޓަރަކަށް ވުރެ ވެސް ކުޑަ ތަންކޮޅެއްގެ ފަރަގެވެ. އެއީ 0.02 ސިކުންތެވެ. އެކަމަކު މިއީ ވިންޓް އުއްމީދުކުރި ވަރަށް ވުރެ ފަސް ގުނަ، ބަރާބަރު މިންވަރެކެވެ. އެހެންކަމުން ހާއްސަ ކާރު އޭގެ ޒިންމާ، ވަރަށް ފުރިހަމައަށް ނަގާނެ ކަމުގެ ޔަގީންކަން އެބަ އޮތެވެ.

ފުރަތަމަ ބޭނުންކުރާ ކާރަށް އެއްވެސް މައްސަލައެއް ޖެހިއްޖެ ނަމަ، ދެ ވަނަ ކާރެއް ވެސް، ހުރިހާ އާލާތަކާ އެކު އޮތީ ތައްޔާރަށެވެ. މި ދެ ކާރުގައި، ހަމައެކަނި އަލިން މަގު ދައްކައިދޭނީ ކިޕްޗޯޖް އެކަންޏަކަށް ނޫނެވެ. އޭނާގެ ސްޕީޑް ހިފަހައްޓަން އޭނާއާ އެކު ދުވާ ޕޭސްމޭކަރުން، ތިބެން ޖެހޭ ތަންތަން ވެސް، ފެހި ކުލައިގެ އަލިން ދައްކައިދޭނެ އެވެ.

ޕޭސްމޭކަރުން ދުވާނީ، ކިޕްޗޯޖްގެ ސްޕީޑަށް ވައިން ވެސް ހުރަހެއް ނޭޅޭނެ ގޮތަށް، ހާއްސަ އެތުރުމެއްގައި ތިބެގެންނެވެ.

މި ރޭސް ޔޫޓިއުބުން ވެސް ވަގުތުން ދައްކާނެ އެވެ. މިހާރު ބެލެވޭ ގޮތުގައި ރޭސް އޮންނާނީ ރާއްޖޭގެ ގަޑިން ހެނދުނު 9 އާއި 12 އާ ދެމެދުގެ ވަގުތެއްގަ އެވެ.