އެސްއެމްއީ ބޭންކުގެ ލޯނުތައް އަނބުރާ ދައްކާ މުއްދަތު މި އަހަރުގެ ނިޔަލަށް އިތުރުކޮށްފި

އެސްއެމްއީ ބޭންކު- ލޯނު ދެއްކުމުގެ މުއްދަތު މިއަހަރުގެ ނިޔަލަށް ވަނީ އިތުރުކޮށްދީފައި--

އިދުހާމް ނައީމް، މިހާރު

27 އޯގަސްޓް 2020 - 10:50

އެސްއެމްއީ ޑިވެލޮޕްމެންޓް ފައިނޭންސް ކޯޕަރޭޝަން (އެސްޑީއެފްސީ) ގެ ލޯނުތައް އަނބުރާ ދައްކާ މުއްދަތު މި އަހަރުގެ ނިޔަލަށް އިތުރުކޮށްފި އެވެ.

އެސްޑީއެފްސީން މިގޮތަށް ނިންމީ ކޮވިޑް-19އާ ގުޅިގެން ލޯނުތައް އަނބުރާ ދައްކަން ދިން މޮރިޓޯރިއަމްގެ މުއްދަތު އަންނަ މަހަށް ހަމަވާތީ އެވެ.

ކޮވިޑް-19އާ ގުޅިގެން ގިނަ ބައެއްގެ އާމްދަނީ އަށް ނޭދެވޭ އަސަރު ކޮށްފައިވާތީ، ބޭންކުތަކުން ވަނީ އެ ތަންތަނުން ނަގާފައިވާ ލޯނުތައް ދެއްކުން ހަ މަސް ދުވަހަށް ފަސްކޮށްދީފަ އެވެ. އެކަމަކު، އަދިވެސް ހާލަތު ރަނގަޅު ނުވާތީ މި އަހަރުގެ ނިޔަލަށް އެ ލޯނުތައް ފަސްކޮށްދޭން ނިންމީ ކަމަށް އެސްއެމްއީ ބޭންކުގެ މެނޭޖިން ޑިރެކްޓަރު އަހުމަދު ޒީނާދު ވިދާޅުވި އެވެ.

އެސްއެމްއީ ބޭންކުން ނަގާފައިވާ ލޯނުތައް އަނބުރާ ދައްކާ މުއްދަތު އިތުރު ކުރަން ނިންމިޔަސް އެ މުއްދަތު ދޭނީ އެ ބޭންކުން ކުރިން ލޯނު ނެގި ކަސްޓަމަރުންނަށް އެކަންޏެވެ. ރިލީފް ސްކީމް ދަށުން ނަގާ ލޯނުތައް ލުއި ކުރުމާ ގުޅޭގޮތުން އަދި މަޝްވަރާ ނުކުރާ ކަމަށް ޒީނާދު ވިދާޅުވި އެވެ.

"ރިލީފް ސްކީމްގެ ދަށުން ދޫކުރި ލޯނުތަކުގެ މުއްދަތު އެހެން ނޫނަސް ހަމަވާނީ މި އަހަރުގެ ނިޔަލަށް. އެހެންވީމާ އެ ލޯނުތަކާ ގުޅޭ މަޝްވަރާއެއް އަދި ނުކުރޭ. މި ވަގުތަށް މުއްދަތު އިތުރު މިކުރީ މޮރިޓޯރިއަމް މުއްދަތު އިތުރު ކުރި ލޯނުތަކަށް،" ޒީނާދު ވިދާޅުވި އެވެ.

Thank you @SDFC_mv for the decision to extend the moratorium on all loans till end of the year for all those who wish to do so. I hope bigger banks will follow suit in this unprecedented situation and bring heart to banking.
— Fayyaz Ismail (@faya_i) August 27, 2020

މިނިސްޓަރު ފައްޔާޒުގެ ޓުވީޓް

އެސްއެމްއީ ބޭންކުގެ މި ނިންމުމަށް އިކޮނޮމިކް މިނިސްޓަރު ފައްޔާޒު އިސްމާއިލް މިއަދު ޝުކުރު އަދާކުރެއްވި އެވެ. އެހެން ބޭންކުތަކުން ވެސް އެ ނިންމުން ނަމޫނާއެއްގެ ގޮތުގައި ނަގާނެ ކަމަށް އުއްމީދު ކުރައްވާ ކަމަށް އޭނާ ވިދާޅުވި އެވެ.