ލޮޓަސް ގަސްތަކުން ފުރިފައިވާ މާކިޅިއަށް ދޫންޏެއް ޖައްސާފައި: މިއީ މިހާރު ހިމާޔަތްކޮށްފައިވާ ތަނެއް-- ފޮޓޯ: ޓްވިޓާ
22 ސެޕްޓެމްބަރ 2020 - 17:25
9 comments
ތިމާވެށި ރައްކާތެރިކޮށް ދެެމެހެއްޓުމާ ބެހޭ ގާނޫނުގެ ދަށުން، އައްޑޫގެ ހަތަރު ސަރަހައްދެއް ހިމާޔަތްކޮށްފި އެވެ.
އެންވަޔަރަމެންޓް މިނިސްޓްރީން މިއަދު އާއްމު ކުރި އިއުލާނެއްގައި ބުނީ އައްޑޫގެ ކުޑަ ކަނޑު ސަރަހައްދާއި މާކިޅި އާއި ފެހެލެ ކިޅި ސަރަހައްދާއި މާފިށި ކިޅި ސަރަަހައްދާއި މަތިކިޅި ސަރަހައްދު، މިއަދުން ފެށިގެން ހިމާޔަތްކޮށްފައިވާ ކަމަށެވެ.
ހިމާޔަތްކުރި ތަންތަނުގައި ހިމެނޭ ކުޑަކަނޑު ސަރަހައްދަކީ ގަލާއި މުރަކަ ގިނަ، އަދި އެކި މަހުގެ ބާވަތްތަކާއި ދިރުންތައް ގިނަ، ގުދުރަތީގޮތުން މުއްސަނދިތަނެކެވެ. ނެތިދިޔުމުގެ ބިރު ހީވެފައިވާ ވެލަ އާއި ވައިފިޔަ މަޑި އަދި ކޯމަސް މި ސަރަހައްދުގައި ގިނަ އެވެ. ކުޑަކަނޑު ސަރަހައްދު ހިމާޔަތް ކުރުމުގެ އެއް ބޭނުމަކީ ވެސް މި ދިރުންތަކަށް ރައްކާތެރިކަން ހޯދައިދިނުމެވެ.
މާކިޅި އާއި ފެހެލި ކިޅި އަކީ ހިތަދޫ އިރުދެކުނު ފަރާތުގައި އޮންނަ ޗަސްބިމުގައި ހެދިފައިވާ ދެ ކުޅި އެވެ. ރަށަށް ވެހޭ ފެން، މި ސަރަހައްދަށް ފަސޭހަ ކަމާއެކު ހިނދިގެން ދިޔުމުގެ ސަބަބުން މިއީ ރަށުގައި ފެންބޮޑުވުމުގެ ފުރުސަތު ކުޑަކޮށްދޭ ދެ ތަނެވެ. އަދި މި ތަން، ދަނޑުވެރިކަމަށް ވެސް ބައެއް މީހުން ބޭނުން ކުރެ އެވެ. ނީލޯފަރު ނުވަތަ ލޮޓަސް ގިނައިން ފެންނަ މި ކުޅިތަކަކީ މޫސުމީ ދޫންޏާއި ހިމާޔަތްކޮށްފައިވާ ދޫނިތަކުގެ ގެ އެވެ.
ހުޅުދޫ ދެކުނު ފަރާތުކޮޅުގައި އޮންނަ ޗަސްބިންކުޅި، މާފިށި ކިޅި އަކީ ވެސް ވިއްސާރައިގައި ރަށަށް ރައްކާތެރިކަން ގެނެސްދޭ ތަނެކެވެ. ކުރެއްްޖާއި ހިރުނދައި ދިއްގާ އަދި ބޯކަށިކޭލާއި މިދިލި ގަސް މިތަނުގައި ގިނައިން ހުންނައިރު، ގިނަ އަދަދެއްގެ ދޫނި ވެސް މި ކުޅިން ފެނެ އެވެ.
ހިމާޔަތްކޮށްފައިވާ ކުޑަކަނޑުން މުރަކަ އާއި ގާ ނެގުމާއި މަސް ހިފުމަކީ މަނާ ކަމެކެވެ. އަދި ކުޅިތަކުން، ދޫނި ހިފުމާއި އެ ދިރުންތަކަށް ގެއްލުން ދިނުމާއި ކުނި އެޅުމަކީ މަނާ ކަމެކެވެ.
މި ތަންތަން ބެލެހެއްޓުމުގައި ދެން އަމަލު ކުރާނީ، އިއުލާނުގައިވާ ގޮތުން، ގުދުރަތީ ނުވަތަ ތަބީއީގޮތުގައި ރައްކާތެރިކޮށް ދަމަހައްޓާ ތަންތަނާ ބެހޭ ގަވައިދުގައިވާ ގޮތަށެވެ.
އިތުރު ލިޔުންތައް
މަގްބޫލް ލިޔުންތައް
Mihaaru Print Edition
Download Mihaaru News App
Offline Alerts
SMS 'sub mihaaru' to 5454
ކޮމެންޓްތައް
އައްޑޫބެއްޔާ
23 September 2020
މިއީ އައްޑޫގެ ވަކި ބަޔަކު އިސްވެތިބެ ހިންގާ ބޮޑު ޖަރީމާއެއް. ކޯއްޓޭ ހިމާޔަށް ކުރުވީ އެސަރަހައްދުގައި ދިރިއުޅޭ މީހުނަށް ތަރައްޤީގެ ކަމެއް ކޮށްނުދެވުނީމާ އެކަން ފޫބައްދާން. ތިމަންމެނަށް ރައްޔިތުންނަށް ކަމެއް ކޮށްނުދެވުނީމާ ސިޔާސީ ހިކުމަތްތެރި ހިޔަޅު ވިސްނުމެއްގައި މިފަދަ ހިމާޔަށް ކުރުންތައް ފެނިގެންދޭ، މަށަށް ފެންނަނީ މުޅި އަތޮޅު ހެރިޓޭޖް ސައިޓްއަކަށް ބަދަލު ކުރަން. ދެން ބުނާނީ ކަލްޗަރަލް ޓޫރިޒަމް މާރަގަޅުވާނެއޭ. އައްޑޫ ކުދިވެރީން ގަބޫލުކުރާނެ
ރާއްޖެ
23 September 2020
މިއީ އައްޑުއަށް ހައްގު މިންވަރު ތަރައްގީ. ކަރުދާސް ގަނޑެއްގަ “ހިމާޔްތް ކޮއްފި” ލިޔެފަ ބޭއްވުން.
ބަތްކައްކާ
23 September 2020
ކޮބައިތަ ތިންވަނަ ކުޅިއަކީ
ސޮބުރީ
23 September 2020
މަގުތަކުގާ ހެދޭ ފެން އެޅެނީ ކުޅިޔަށޯލަ... ތާރަ އަޅާ މަގަށް ހިންދަނީކީ ނޫންބާ... މަގުތަށް މިފަދަ ގޮތަށް ހެދުމުން ކުޅިތަކުގެ ފެން ހިނދި ނެތިދާނެ...
ގަލަން
23 September 2020
ތިޔަފޮޓޯ ގައި ތިޔަވަނީ މިހާރުގެ އައްޑޫ އިކުއެޓޯރިއަލް ހޮސްޕިޓަލް ނުވަތަ ކުރީގެ ކޮންވެންޝަން ސެންޓަރ ގެ ވަށައިގެން އޮތް ކުޅި. ތިޔަތަނުގައި މިހާރު ލޮޓަސް ގަހެއް ނެތޭ ބުންޏަސް ދޮގަކަށް ނުވާނެ. ހުރިހާ އެއްޗެއް ނަގާ މުޅިތަން ސާފުކޮށް ވަށައިގެން ހުރި ގަސްތައް ކޮށާ ވިނަކޮށަމުން އެގެންދަނީ. ހޮސްޕިޓަލުގެ ލޭންޑްސްކޭޕިން ހަދަނީޔޯ! އެތާ ކުރިން އުޅުނު ދޫނިތައް ބިރުން އެހެން ދިމަދިމާލަށް ގޮސް މުޅިތަން ފަޅުވެފައޮތީ.
އޮނަރަބްލް އަފީފު ދީދީ
22 September 2020
މުޅި އައްޑޫސިޓިގެ ލޭންޑް ޔޫޒްޑް ޕްލޭން އެއްނެތި ޙަޤީގަތުގައި ތަރައްޤިއާއި ތަންތަން ހިމާޔަތް ކުރުމުގެ ކަންކަން ފުރިހަމަ ގޮތުގައި ނުހިންގޭނެ. # ކުޅިތައް ހިމާޔަތް ކުރުމަކީ "ފޮތުގައި ލިޔެފައި އޮތުމުން ހަމައެކަނި ކޮށްގެން ވާނެ ކަމެއްނޫން" ކަން ޤަބޫލު ކުރާންޖެހޭ. މިސިޓީގެ ކުޅިތައް ގޮޑުތަކެއްހެން ކުނިއަޅާން ސަރުކާރުން ދޫކޮށްފައިވާނަމަ "އެއީ ހިމާޔަތް ކޮށްފައިވާ ތަނެއްކަން ރައްޔަތުންނަކަށް އިޙްސާސް ނުވާނެ" އިގޭތޯ. ފުރަތަމަ ސަރުކާރުގެ އަމަލު ބަދަލުވާންޖެހޭ.
ވަޑްޔައްތޮކިނަބާ
22 September 2020
އައްޑޫގައި "ކުޑަ ކަނޑު" ކިޔާ ކަނޑެއް ނޯވެއެވެ. އޮންނަނީ "ކޮޑޮ ކަނޑު" އެވެ. އެއީ ހިތަދޫ ދުނިފަރާއި ކަނޑިހެރަ ފަރާއި ދެމެދު އޮންނަ ކަނޑުއޮޅިއެކެވެ.
ބުރުސީ
22 September 2020
އައްޑޫ ތަރައްގީކުރާނަމޭ ބުނި ސަރުކާރުން އައްޑޫއަށް ކަމެއް ނުކޮށްދޭން މުޅި އައްޑޫ ހިމާޔަތްކުރަނީ...
ތުއްތުނާ 1
22 September 2020
އެންމެ ފުރަތަަމަ އިންސާނުން ހިމާޔަތް ކުރުން ރަނގަޅު.......ތަންތަން ހިމާޔަތް ނަމެއްގައި ކުރުމުގެ ބަދަލުގައި އިންސާނުންނަށް ބޭނުންވާ އަސާސީ ޚިދުމަތްތައް ފެނާއި ނަރުދަމާގެ ކަންކަން ފޯރުކޮށް ދީބަލަ......