ކެއިރާ ނައިޓްލީގެ ދިފާއުގައި ބައެއް ޑައިރެކްޓަރުން ނިކުމެއްޖެ

ކެއިރާ ނައިޓްލީ: އޭނާ އަށް އަމާޒުވި ފާޑު ކިއުންތަކާ ގުޅިގެން ބައެއް ފަންނާނުން ވަނީ ދިފާއުގައި ވާހަކަ ދައްކާފައި.

އަހުމަދު އަދްޝަން، މިހާރު

02 ޖޫން 2016 - 09:13

ދެ ފަހަރެއްގެ މަތިން އޮސްކާ އަށް ނޮމިނޭޓްވެފައިވާ ހޮލީވުޑްގެ މަޝްހޫރު ބަތަލާ ކެއިރާ ނައިޓްލީއަކީ އެކްޓް ކުރަން ނޭނގޭ "ސްޕަމޮޑެލްއެއް" ކަމަށް ބުނެ ޑައިރެކްޓަރު ޖޯން ކާނީ ދެއްކި ވާހަކަތަކާ ގުޅިގެން، ކެއިރާ އާ އެކު މަސައްކަތްކޮށްފައިވާ ބައެއް ޑައިރެކްޓަރުން އޭނާގެ ދިފާއުގައި ވާހަކަ ދައްކައިފި އެވެ.

ކާނީ ބުނި ގޮތުގައި އޭނާ 2014 ގައި ކެއިރާ އާއި މާކް ރަފެއްލޯ ލީޑް ރޯލަށް ލައިގެން ހެދި "ބިގިން އެގެއިން" އަށް އުންމީދު ކުރި ވަރުގެ ތަރުހީބެއް ނުލިބުނީ ކެއިރާ ފިލްމުގައި ދައްކުވައި ދިން ދަށް އެކްޓިން އާ ހެދި އެވެ.

އެހެންވެ އޭނާ ވަނީ ކެއިރާ އަކީ ބަތަލާއެއް ނޫން ކަމަށާއި އެއީ ސްޕަމޮޑެލްއެއް ކަމަށް ބުނެ، އޭނާ އަށް ވަރަށް ބޮޑަށް ފާޑު ކިޔައިފަ އެވެ.

ކާނީގެ މި ވާހަކަތަކާ ގުޅިގެން ކެއިރާ އާ އެކު 2010 ގައި "ނެވަ ލެޓް މީ ގޯ" ހެދި ޑައިރެކްޓަރު މާކް ރޮމަނެކް ބުނީ އޭނާ ކެއިރާ އާ އެކު ކުރީ ވަރަށް ސަޅި ތަޖުރިބާއެއް ކަމަށެވެ.

My experience with #keiraknightley was utterly spectacular on every level. I have no clue what this guy is talking about. #arrogantshithead
— mark romanek (@markromanek) May 30, 2016

ޑައިރެކްޓަރު މާކްގެ ޓްވީޓް

"ހުރިހާ ގޮތަކުން ވެސް ކެއިރާ އާ އެކު އަހަންނަށް ކުރެވުނީ ވަރަށް ހިތްގައިމު ތަޖުރިބާއެއް. އަހަންނަކަށް އެއްގޮތަކަށް ވެސް ނޭނގޭ އޭނަ [ކާނީ] އެ ކިޔާ އެއްޗެއް،" މާކް ކުރި ޓްވީޓެއްގައި ބުންޏެވެ.

ޑައިރެކްޓަރު ލީން ޝެލްޓަން ބުނީ ކެއިރާއަކީ "މަތިން ފެށިގެން ތިރިއަށް ފުރިހަމަ ބަތަލާއެއް" ކަމަށެވެ. އޭނާ 2014 ގައި ޑައިރެކްޓް ކުރި "ލެގީސް" ގެ ބަތަލާއަކީ ކެއިރާ އެވެ.

Working with #KeiraKnightley was magnificent, top to bottom. She is the real deal. #Knightleylove
— Lynn Shelton (@lynnsheltonfilm) May 30, 2016

ޑައިރެކްޓަރު ލީންގެ ޓްވީޓް

އެއްތިރީސް އަހަރުގެ ބަތަލާ އާ އެކު "ސީކިން އަ ފްރެންޑް ފޮ ދި އެންޑް އޮފް ދަ ވޯލްޑް" 2012 ގައި ހެދި ޑައިރެކްޓަރު ލޮރެން ސްކަފާރިއާ ވެސް ބުނީ ކެއިރާއަކީ އެކުގައި މަސައްކަތްކޮށްލަން ވަރަށް ރަނގަޅު ބަތަލާއެއް ކަމަށެވެ.

"އޭނައަކީ އެކުގައި މަސައްކަތް ކުރަން ފަސޭހަ، މަސައްކަތަށް ކަމޭ ހިތައިގެން ރަނގަޅަށް މަސައްކަތް ކުރާ ބަތަލާއެއް،" ލޮރެން ބުންޏެވެ.

.@Lieryn @markromanek I agree with Mark. Keira was a joy to work w/. Present & easy & really, really good at her job. Just lovely.
— Lorene Scafaria (@LoreneScafaria) May 30, 2016

ލޮރެންގެ ޓްވީޓް

އަޔަލެންޑަށް އުފަން ކާނީ ވަނީ ކެއިރާ އަށް އިޝާރާތްކޮށް، ދެން ދުވަހަކު ވެސް ސްޕަމޮޑެލްއަކާ އެކު ފިލްމެއް ނަހަދާނެ ކަމަށް ބުނެފަ އެވެ.

ކެއިރާއަކީ 2006 ވަނަ އަހަރު ޕްރައިޑް އެންޑް ޕްރެޖްޑައިސް އަދި މިދިޔަ އަހަރު "ދި އިމިޓޭޝަން ގޭމް" އިން އޮސްކާ އަށް ނޮމިނޭޓްވި ބަތަލާއެކެވެ.

ކާނީ ދެއްކި ވާހަކަތަކާ ގުޅިގެން ބައެއް ތަރިން ވެސް ވަނީ ކެއިރާގެ ދިފާއުގައި ވާހަކަ ދައްކައިފަ އެވެ.

"އަހަރެން އަދި ކާނީ އާއި ކެއިރާ އާ އެކު ވެސް މަސައްކަތެއް ނުކުރަން. އެކަމަކު އިތުބާރު ނުކުރެވޭ ޑައިރެކްޓަރަކާ އެކު މަސައްކަތް ކުރުމަކީ އެކްޓަރަކަށް ވަރަށް އުނދަގޫ ކަމަށް ވާނީ،" ބަތަލާ މެލަނީ ލީންސްކީ ބުންޏެވެ.