ރ. އިފުރު އެއާޕޯޓާ އެކު އެރަށުގައި ތަރައްގީކޮށްފައިވާ ރިސޯޓު ވިއްކާލާނީ 65 މިލިއަން ޑޮލަރު (ގާތްގަނޑަކަށް އެއް ބިލިއަން ރުފިޔާ) އަށްކަމަށް އެ ރިސޯޓް ހިންގާ ދަ ސްމޯލް މޯލްޑިވްސް އައިލެންޑް ކޯ (ޓީއެސްއެމްއައި) އިން އިއުލާނުކޮށްފި އެވެ.
ޓީއެސްއެމްއައި އިން އެންމެ ފުރަތަމަ މި ދެ ޕްރޮޕަޓީ ވިއްކާލަން އިއުލާން ކުރީ މިއަހަރުގެ މެއި މަހުގަ އެވެ. ނަމަވެސް ވިއްކަލާ އަގު އިއުލާން ކޮށްފައި ނުވެ އެވެ.
ބޭރުގެ މެގަޒިނެއް ކަމަށްވާ ދަ ސީއީއޯ މެގަޒިންގައި ބުނެފައިވާގޮތުގައި އިފުރު އެއާޕޯޓާއި ރިސޯޓުގެ އިތުރުން ބ. ފުނަދޫ ވެސް 50 އަހަރުގެ މުއްދަތަށް ލީސް އެގްރީމެންޓުގެ ދަށުން ވިއްކާލާނެ އެވެ. މި ރަށަކީ 11.69 ހެކްޓަރުގެ ރަށެކެވެ. ރަށް ވިއްކާލަން ހަމަޖެހިފައިވަނީ ރަށުގައި ރިސޯޓު ތަރައްގީކުރަން ޑިވެލޮޕްކޮށްފައިވާ 90 ވިލާގެ ކޮންސެޕްޓާ އެކު އެވެ.
އިފުރު ރިސޯޓަކީ ގާތްގަނޑަކަށް 56 ހެކްޓަރުގެ، ފަސް ތަރީގެ 150 ވިލާ ހިމެނޭ ރިސޯޓެކެވެ. މިއީ 300 އެނދުގެ ރިސޯޓެކެވެ. އަދި މި ރިސޯޓުގައި 215 މީހުންގެ ޖާގައިގެ ރެސްޓޯރެންޓެއް ހުރެ އެވެ. ރިސޯޓު ސަރުކާރުން ދޫކޮށްފައިވަނީ 50 އަހަރަށެވެ.
މި ރިސޯޓުގައި ހިތްހަމަ ޖައްސާލުމަށް ގިނަ ހަރަކާތްތަކެއް ވެސް ރޭވިފައިވެ އެވެ. އެގޮތުން ޓެނިސް ކޯޓަކާއި ބެޑްމިންޓަން ކޯޓެއްގެ އިތުރުން ރީކްރިއޭޝަން ސެންޓަރެއް ވެސް ހުރެ އެވެ. އަދި ޖިމަކާއި ކިޑްސް ކްލަބެއްގެ އިތުރުން ޑައިވް ސެންޓަރަކާއި ވޯޓާ ސްޕޯޓްސްގެ ގިނަ ހަރަކާތްތަކެއް ވެސް ހިންގޭނެ އިންތިޒާމުތައް ވަނީ ހަމަޖައްސައިފަ އެވެ.
މީގެ އިތުރުން ސްޓާފުންނަށް ހާއްސަ އެކޮމޮޑޭޝަނަށް އަށް އިމާރާތް ހަދާފައިވެ އެވެ. މި އިމާރާތުގައި 128 ކޮޓަރި ހުންނަ އިރު 400 މީހުންނަށް ބޭނުން ކުރެވޭނެ އެވެ.
އިފުރު ތަރަައްގީކުރުމުގެ މަސައްކަތް އިފުރު އިންވެސްޓްމަންޓާ ހަވާލުކުރީ ރިސޯޓް ތަރައްގީ ކުރުމަށް ތިން ރަށް ދޭ ގޮތަށް މެއި، 2011ގަ އެވެ. އެރަށުގައި އެއާޕޯޓު ހުޅުވާފައިވަނީ 2015 ވަނަ އަހަރު އެވެ. ކޯސްޓްލައިން ކުންފުނިން ތަރައްގީކުރި މި އެއާޕޯޓު މެނޭޖްކުރަމުން އައީ އައިލެންޑް އޭވިއޭޝަނުންނެވެ.