ރާއްޖޭގެ ކުޅިވަރު ކުރިއަރުވަން ގަތަރާއެކު އެއްބަސްވުންތަކެއް

ރާއްޖޭގެ ކުޅިވަރުތައް ކުރިއެރުވުމުގެ ވިސްނުމުގައި ގަތަރުގެ ކުޅިވަރު އެސޯސިއޭޝަންތަކާ އެކު އެއްބަސްވުންތަކެއް ހަދަން މޯލްޑިވްސް އޮލިމްޕިކް ކޮމިޓީ (އެމްއޯސީ) އިން ތައްޔާރުވެއްޖެ އެވެ.

އެމްއޯސީގެ ސެކްރެޓަރީ ޖެނެރަލް އަހުމަދު މަރުޒޫގް (މަރޭ) ދާދި ފަހުން ގަތަރަށް ކުރެއްވި ދަތުރުގައި ގަތަރުގެ ކުޅިވަރު އެސޯސިއޭޝަންތަކާ އެކު ރާއްޖޭގެ ކުޅިވަރު ތަރައްގީ ކުރަން ކުރެވިދާނެ ކަންތައްތަކާ ބެހޭގޮތުން މަޝްވަރާ ކުރެއްވި އެވެ.

އެމްއޯސީ އިން އެއްބަސްވުމެއް ހަދަން މަސައްކަތް ކުރަމުން އަންނަނީ ގަތަރު ފުޓްބޯޅަ އެސޯސިއޭޝަނާއި ގަތަރުގެ ހޭންޑްބޯލް އެސޯސިއޭޝަނާއި ގަތަރުގެ އެތުލެޓިކްސް ފެޑެރޭޝަނާއި ގަތަރު ޓޭބަލް ޓެނިސް އެސޯސިއޭޝަން އަދި ގަތަރު ސްވިމިން އެސޯސިއޭޝަނާ އެވެ. މީގެ އިތުރުން ގަތަރުގެ އެސްޕެޓާ ހޮސްޕިޓަލާ އެކު ވެސް އެއްބަސްވުމެއް ގާއިމްކުރަން ވަނީ މަޝްވަރާކޮށްފަ އެވެ. އެސްޕެޓާ އަކީ ގަތަރުގެ މަޝްހޫރު ސްޕޯޓްސް މެޑިސިން ހޮސްޕިޓަލެކެވެ.

އެމްއޯސީން ބުނީ ގަތަރާ އެކު ވާ އެއްބަސްވުންތަކުގެ ސަބަބުން ރާއްޖޭގެ ކުޅިވަރު އެސޯސިއޭޝަންތަކުގެ އިތުރުން ކުޅުންތެރިންނާއި އޮފިޝަލުންނަށް ގިނަ ގޮތްގޮތުން ފައިދާކުރާނެ ކަމަށް ގަބޫލުކުރާ ކަމަށެވެ. އަދި އެސްޕެޓާއާ އެކު ސޮއިކުރާ އެއްބަސްވުމުގެ ތެރެއިން ކުޅިވަރުގެ ތެރެއިން ލިބޭ އަނިޔާތަކަށް ކުޅުންތެރިންނަށް ވީ އެންމެ ރަނގަޅަށް ފަރުވާކުރަން ފަސޭހަތަކެއް ލިބިގެންދާނެ ކަމަށް ވެސް އެތަނުން ބުނެ އެވެ.

ރާއްޖޭގެ ކުޅިވަރު އެސޯސިއޭޝަނަކުން އެންމެ ފުރަތަަމަ ގަތަރާ އެކު އެއްބަސްވުމެއްގައި ސޮއިކުރީ 2017 ވަނަ އަހަރު ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) އިންނެވެ. އެ ފަހަރު ގަތަރު ފުޓްބޯޅަ އެސޯސިއޭޝަނާ އެކު ވި އެއްބަސްވުމުގެ ސަބަބުން ގުޅުން ބަދަހިކުރުމާއި ފުޓްބޯޅަ ތަރައްގީ ކުރުމުގެ ތެރެއިން ރާއްޖެ އަށް ގިނަ ފައިދާތަކެއް އަންނަނީ ކުރަމުންނެވެ. އޭގެތެރެއިން އެންމެ ބޮޑު އެއް ފައިދާ އަކީ 2018 ވަނަ އަހަރުގެ ސާފް ސުޒުކީ ކަޕްގެ ކުރިން ގަތަރުގައި ދިގު މުއްދަތަކަށް ގައުމީ ފުޓްބޯޅަ ޓީމު ކޭމްޕް ކުރުމެވެ. އެ ފަހަރު ކޭމްޕަށް ފަހު ރާއްޖޭން ވަނީ ސަރަހައްދުގެ ޗެމްޕިއަންކަން ހޯދައިފަ އެވެ. މުސްތަގުބަލުގައި ވެސް ގަތަރު ފުޓްބޯޅަ ފެޑެރޭޝަނުން އެފްއޭއެމަށް ގިނަ ރޮނގުރޮނގުން އެހީތެރިކަން ފޯރުކޮށްދޭން ބޭނުންވެ އެވެ.

އެތުލީޓުންނާއި ކޯޗުން އަދި ކުޅިވަރުގެ އެޑްމިނިސްޓްރޭޓިވް މަސައްކަތްކުރާ ފަރާތްތަށް ތަރައްގީ ކުރުމުގެ ގޮތުން ބައިނަލްއަގުވާމީ ގޮތުން ގިނަ ފުރުސަތުތަކެއް މީގެ ކުރިން ވެސް އެމްއޯސީން ވަނީ ފަހިކޮށްދީފަ އެވެ. އަދި އެމްއޯސީން އެހެން ހޯދައިދިން ފުރުސަތުތަކުގެ ބޭނުންހިފައި ގިނަ އެތުލީޓުން ވަނީ ރާއްޖެ އަށް ބައިނަލްއަގުވާމީ މުބާރާތްތަކުން ރަނގަޅު ވަަނަތަކެއް ހޯދައިދީފަ އެވެ.