ދިރާގުގެ އަހަރީ އާއްމު ޖަލްސާ މި މަހު 20ގައި

2018 ވަނަ އަހަރުގެ އަހަރީ އާއްމު ޖަލްސާގަައި ދިރާގުގެ ބޯޑު މެމްބަރުންނާއި ހިއްސާދާރުން ބައިވެރިވަނީ-- ފޮޓޯ: މިހާރު

އިދުހާމް ނައީމް، މިހާރު

03 މެއި 2021 - 12:32

ދިރާގުގެ މިދިޔަ އަހަރުގެ އަހަރީ އާއްމު ޖަލްސާ މި މަހުގެ 20 ވަނަ ދުވަހު ބާއްވަން ނިންމައިފި އެވެ.

ދިރާގުން ކުރި އިއުލާނެއްގައި ބުނީ މި ޖަލްސާ ބާއްވާނީ 20 ވަނަ ދުވަހުގެ މެންދުރު 1:00ގައި ކަމަށެވެ. މި ޖަލްސާ ބާއްވާނީ މޯލްޑިވްސް ސެކިއުރިޓީ ޑިޕޮޒިޓަރީގެ "ފަހިވޯޓު" ޕޯޓަލް މެދުވެރިކޮށެވެ.

މި ޖަލްސާގައި އެ ކުންފުނިން ހިއްސާގެ ފައިދާގެ ގޮތުގައި ކަނޑައަޅާ އަދަދު ފާސް ކުރާނެ އެވެ. އެ ކުންފުނީގެ ބޯޑުން ވަނީ މިދިޔަ އަހަރުގެ ހިއްސާގެ ފައިދާގެ ގޮތުގައި ހިއްސާއަކަށް 7.23 ރުފިޔާ ބަހަން ހުށަހަޅައިފަ އެވެ. އެގޮތުން، ޖުމްލަ 549.48 މިލިއަން ރުފިޔާ ބަހަން ވަނީ ނިންމައިފަ އެވެ.

ދިރާގު އަހަރީ އާއްމު ޖަލްސާގައި ބައިވެރިވެވޭނީ މި މަހުގެ 10 ވަނަ ދުވަހުގެ ކުރިން އެ ކުންފުނީގެ ހިއްސާދާރުންގެ ގޮތުގައި ރަޖިސްޓްރީވާ މީހުންނަށެވެ. ހިއްސާދާރެއްގެ ބަދަލުގައި މީހަކު ބައިވެރިވާނަމަ ޕްރޮކްސީ ހުށަހަޅަން ޖެހޭނެ އެވެ.

މި ޖަލްސާގައި ބައިވެރިވާން ރަޖިސްޓްރީވުމުގެ ފުރުސަތު މިހާރު ވަނީ ހުޅުވާލައިފަ އެވެ.