މާފުށީ ޖަލަށް ވައްދަން އުޅުނު ތަކެތި -- ފޮޓޯ: ފުލުހުން
16 ޖޫން 2021 - 12:42
3 comments
ޖަލަށް މަނާތަކެތި ވެއްދުމާއި އަދި އެކި މައްސަލަތަކުގައި މިދިޔަ އަހަރު ކަރެކްޝަނަލް ސާވިސް އިން 10 އޮފިސަރަކު ވަޒީފާއިން ވަކިކޮށްފި އެވެ.
ކޮމިޝަނާ އޮފް ޕްރިޒްންސް (ސީޕީ) އަހުމަދު މުހައްމަދު "މިހާރު" އަށް އިއްޔެ ވިދާޅުވީ ޖަލަށް މަނާތަކެތި ވެއްދުމުގައި ވަރަށް ގިނަ މައްސަލަތައް ދިމާވާ ކަމަށެވެ. އެއް ކަމަކީ، ޖަލުތައް ހުރީ އާއްމުން ދިރިއުޅޭ ސަރަހައްދާ ކައިރީގައި ވުމާއި ކަނޑައަޅާފައިވާ މިންގަނޑުތަކާ އެއް ލެވެލަށް ޖަލުގެ އެކި ތަންތަނުގެ ސެކިއުރިޓީ ނެތުމެވެ.
އޭނާ ވިދާޅުވީ މާފުށީ ޖަލުގެ ވަށާފާރު އަދި ވެސް އެއްކޮށް ނުނިމޭ ކަމަށެވެ. އެ ތަން ކުރިން ހަދާފައި ހުރީ ފެންސް ޖަހައިގެންނެވެ. އެގޮތަށް ހުރުމުން ފެންސް މަތިން އެއްޗެހި އުކުން ދިމާވި އެވެ.
ސީޕީ އަހުމަދު ވިދާޅުވިގޮތުގައި މަދުން ނަމަވެސް އެ ކަމުގައި ޖަލު ބަލަހައްޓާ އޮފިސަރުން ބައިވެރިވާ ކަމަށެވެ.
"އެ ކަންކަން ހައްލު ކުރުމަށްޓަކައި އިދާރީ އޮނިގަނޑު މި އޮތީ ވަރަށް ބޮޑަށް ހަރުދަނާ ކޮށްފައި. ޕްރޮފެޝަނަލް ސްޓެންޑާޑްސް އެއް ކަނޑައަޅާފައި އިންޓާނަލީ އެ ކަހަލަ ތުހުމަތެއް އެއްވެސް މީހަކަށް ކުރެވިއްޖެއްޔާ އެ މައްސަލައެއް ތަހުގީގު ކޮށްފައި އަޅުގަނޑުމެން އެ މީހާ މެދު ފިޔަވަޅު އަޅަން. ހަމަ އެ ގޮތަށް ފިޔަވަޅު އެޅިފައި ހުރި މީހުންގެ ތެރެއިން ބައެއް މީހުން އެބަތިބި ފުލުހުންނާއެކު މި ހިންގޭ އޮޕަރޭޝަނުގައި އެބަހުރި ބައެއް މީހުން އަތުލައިގަނެވިފައި ޖަލުގައި ވެސް،" އޭނާ ވިދާޅުވި އެވެ.
ކޮމިޝަނާ އޮފް ޕްރިޒަންސް އަހުމަދު މުހައްމަދު އިއްޔެ "މިހާރު" އަށް އިންޓަވިއުދެއްވަނީ.-- ފޮޓޯ: އަހުމަދު އަވްޝަން/ މިހާރު
ސީޕީ ވިދާޅުވިގޮތުގައި ހެއްކާއި ގަރީނާ ލިބިފައި ހުރުމުން އޭގެ ތެރެއިން ބައެއް މީހުން ވަނީ ވަޒީފާ އިން ވަކިކޮށްފަ އެވެ.
"މިދިޔަ އަހަރު ނިމުނުއިރު އަޅުގަނޑުމެންނަށް 10 ވަރަކަށް މީހުންނަށް އެބަހުރި އިދާރީ ފިޔަވަޅު އަޅައި ވަޒީފާ އިން ވަކިކުރެވިފައި. އެއީކީ، މުޅިއަކުން ޖަލަށް މަނާ އެއްޗެހި ވައްދައިގެން ވެސް ނޫން،" ސީޕީ ވިދާޅުވި އެވެ.
ބައެއް މީހުން އަތުލައިގަތީ މަސްތުވާތަކެތި ވެއްދުމުގައި އެހީތެރިވަނިކޮށް، ރެޑްހޭންޑް ކޮށެވެ.
ޖަލަށް ފޯނާއި މަސްތުވާތަކެތި ވެއްދުމުގައި އެ ތަންތަން ބަލަހައްޓާ ކަރެކްޝަންސްގެ އޮފިސަރުން ބައިވެރިވާކަމަށް އަބަދު ވެސް ތުހުމަތުކުރެ އެވެ. އޭގެ އެއް ހެއްކަކީ، ޖަލުގައި ފުލުހުން ހިންގާ އެކި އޮޕަރޭޝަންތަކުގައި ކޮންމެ ފަހަރަކު ވެސް ގިނަ އަދަދެއްގެ ފޯނު އަތުލައިގަތުމެވެ.
ހަރުކަށި ފިކުރާ ދެކޮޅަށް މިދިޔަ ހަފުތާގައި މާފުށީ ޖަލުގައި ހިންގި އޮޕަރޭޝަނުން އެކަނި ވެސް 43 ފޯނު އަތުލައިގަތެވެ.
އިތުރު ލިޔުންތައް
މަގްބޫލް ލިޔުންތައް
Mihaaru Print Edition
Download Mihaaru News App
Offline Alerts
SMS 'sub mihaaru' to 5454
ކޮމެންޓްތައް
ބަބޫ
16 June 2021
ޕްރިޒަން ސީޕީ އިސްތިއުފާ ދޭންޖެހޭ. އެހެން މީހަކާ ހަވާލުކޮށް ތަން އެބަ ހިންގަން ޖެހޭ. ޒަމާންވީ ތިޔަ ވިޔަފާރި ހުއްޓެން އެބަ ޖެހޭ.
މަޖިލީހަށް
16 June 2021
މި ގައުމުގައި މަސްތުވާތަކެތި ބޭނުންކުރުމާއި ވިޔަފާރިކުރުން ކޮންޓްރޯލް ކުރެވިފައި ނުވާތީ ގޭންގްތައް އަންނަނީ ހުރިހާ ދިމާލަކަށް ވަދެ ބާރު ގަދަކުރަމުން! ދެވަނަ ހޮންޑިއުރާސްއަށް ވުމުގެ ކުރިން މިކަންކަން ހުއްޓުވަން އެބަޖެހޭ!
އޮނަރަބްލް އަފީފު ދީދީ
16 June 2021
ސީޕީ ވިދާޅުވެފައިވާ ކަންކަމަށްބަލާއިރު ވަކިކުރި ބައެއް މުވައްޒަފުންވަނީ ޖިނާއީކުށްތަކެއް ކޮށްފަ. # އެހެންކަމުން ހަމައެކަނި އެމީހުން ވަޒީފާއިންވަކިކޮށް ފޮނުވާލާ އެމީހުނަށްދޭންޖެހޭ ޤާނޫނީ އަދަބުލިބުމަށް ހުރަސްއެޅޭގޮތަށް ތިކަންކުރުމަކީ ސީޕީމެންގެވެސް އިހްމާލެއް. ތިގޮތަށް "ލުއި ގޮތަކަށް" ތިކަން ކުރުމަކީ ގޯހެއް ޤާނޫނީ ކުށެއް. # ޖަލަށް މަސްތުވާ ތަކެއްޗާއި ފޯނާއި މިފަދަ ތަކެތި ވެއްދުމަށް އެހީތެރިވުމަކީ އާދައިގެ ކަމެއްނޫން. ތިގޮތަށް އެކަން ނުހުއްޓުވޭނެ.