މޯލްޑިވްސް އޯޕަން ޓެން ބޯލް ބިލިއާޑް ޗެމްޕިއަންޝިޕް ލޯންޗުކޮށްފި

މި އޭޕްރީލް މަހުގެ 22-26 އަށް ރާއްޖޭގައި ބާއްވަން ހަމަޖެހުނު ނައިން ބޯލް އޭޝިއަން ޓުއާގެ އިވެންޓްގެ ބަދަލުގައި، ވޯލްޑް ޕޫލް-ބިލިއާޑް އެސޯސިއޭޝަން (ޑަބްލިއުޕީއޭ) އާ ގުޅިގެން ހަމަ މި ތާރީހުގައި މޯލްޑިވްސް އޯޕަން ޓެން ބޯލް ޗެމްޕިއަންޝިޕެއް ބާއްވާގޮތަށް ހަމަޖެހިއްޖެ އެވެ.

"މޯލްޑިވްސް އޯޕަން 2023" ޓެން ބޯލް ޗެމްޕިއަންޝިޕަކީ ދުނިޔޭގެ ބިލިއާޑް ފެޑެރޭޝަނާއި އޭޝިއަން ކޮންފެޑެރޭޝަން އޮފް ބިލިއާޑް ސްޕޯޓްސް (އޭސީބީއެސް) ރެކޮގްނީޝަން އާއެކު ބާއްވާ މުބާރާތެކެވެ. ރާއްޖޭގައި ބާއްވާ މި މުބާރާތަކީ މި އަހަރުގެ "އޭޝިއަން ޓެން ބޯލް ޓުއާ" ސީރީޒްގެ ފުރަތަމަ މުބާރާތެވެ.

ފިރިހެން އެތުލީޓުންނަށް އަމާޒު ކޮށްގެން ބާއްވާ މި މުބާރާތަކީ ރާއްޖޭގައި ބޭއްވޭ ބައިނަލްއަގުވާމީ ބިލިއާޑް ފުރަތަމަ މުބާރާތެވެ. މޯލްޑިވްސް އޯޕަން ޓެން ބޯލް ޗެމްޕިއަންޝިޕް މުބާރާތުން، އޭޝިއާގެ ރޭންކިން އާއި ދުނިޔޭގެ ރޭންކިން އަށް ވެސް ޕޮއިންޓް ގުނާނެ އެވެ.

ދުނިޔޭގެ ޕްރޮފެޝަނަލް ބިލިއާޑް ކުޅުންތެރިން ވާދަކުރާ މި މުބާރާތުގައި ރާއްޖޭގެ 16 އެތުލީޓުންނަށް އެމީހުންގެ ހުނަރު ދައްކާލުމުގެ ފުރުސަތު ލިބޭނެ އެވެ. އެސޯސިއޭޝަންގެ ރޭންކިން އިން ގަދަ އަށް ކުޅުންތެރިންނަށް އޮޓަމެޓިކް ޖާގައެއް ލިބިފައި ވާއިރު، ބާކީ އަށް ކުޅުންތެރިން ހޮވަން ވަނީ ކޮލިފައިން އެއް ވެސް ބާއްވައިފަ އެވެ.

މިއީ 130،000 ޑޮލަރުގެ އަގުހުރި މުބާރާތެކެވެ. ޗެމްޕިއަން ކުޅުންތެރިޔާ އަށް 30،000 ޑޮލަރު ހުށަހެޅިފައިވާ މި މުބާރާތުގައި ޖުމްލަ 64 އެތުލީޓުން ވާދަ ކުރާނެ އެވެ.

މުބާރާތް އިއުލާން ކުރަން ރޭ ގައުމީ ބިލިއާޑް ސެންޓަރުގައި ބޭއްވި ރަސްމިއްޔާތުގައި ވާހަކަ ދައްކަވަމުން ކުޅިވަރު މިނިސްޓަރު އަހުމަދު މަހުލޫފް ވިދާޅުވީ، އޭޝިއާ އަދި ދުނިޔޭގެ ރޭންކިން އަށް ޕޮއިންޓް ގުނާ މި މުބާރާތުގެ ސަބަބުން ބައިނަލްއަގުވާމީ މައިދާނުގައި ރާއްޖޭގެ ބިލިއާޑް ކުޅުންތެރިންނާއި އެސޯސިއޭޝަނަށް ބޮޑު ސަމާލުކަމެއް ލިބިގެންދާނެ ކަމަށެވެ.

އެމްޕީބީއޭގެ ޗެއާމަން އަހުމަދު ނާސިފް ވިދާޅުވީ މިއީ ރާއްޖެއަށް ލިބުނު ޝަރަފެއް ކަމަށާއި، މިކަން ހާސިލް ކުރަން ދިވެހި ސަރުކާރާއި ސްޕޯޓްސް މިނިސްޓްރީ އިން ވެދެއްވި އެހީ އަށް ޝުކުރު އަދާކުރާ ކަމަށެވެ. އަދި މި މުބާރާތް ސިލްސިލާ ގޮތެއްގައި އަންނަ އަހަރުވެސް ބާއްވަން މަސައްކަތް ކުރައްވާނެ ކަމަށް ނާސިފް ވިދާޅުވި އެވެ.

ރާއްޖޭގެ ޕޫލް ބިލިއާޑް އެސޯސިއޭޝަން (އެމްޕީބީއޭ) އިން ވަނީ މިއަހަރުގެ ގައުމީ ރޭންކިން އަށް ގުނާ އެއިޓް ބޯލް ޗެމްޕިއަންޝިޕް އާއި ޓެން ބޯލް ޗެމްޕިއަންޝިޕް ބާއްވައިފަ އެވެ. އަދި ނައިން ބޯލް ޗެމްޕިއަންޝިޕް ތާވަލް ކުރެވިފައި ވަނީ އަހަރުގެ ފަހުކޮޅަށެވެ.

ސަރުކާރުން ކުޅިވަރު ވަސީލަތްތައް ގާއިމް ކުރުމުގެ ޕްލޭނުގެ ދަށުން 2020 ވަނަ އަހަރުގެ ނޮވެމްބަރު މަހު ވަނީ ހުޅުމާލޭ ސްޕޯޓްސް ކޮމްޕްލެކްސް ގައި ބިލިއާޑް ހައުސް އެއް ގާއިމްކޮށް ރަސްމީކޮށް ހުޅުވައިފަ އެވެ. އަދި ޖެހިގެން އައި އަހަރު ވަނީ މާލޭގެ ބިލިއާޑް ފެސިލިޓީ ގައި 12 މޭޒު ބަހައްޓައި، ދުނިޔޭގެ ފެންވަރުގެ ފެސިލިޓީއަކަށް އެތަން ތަރައްގީކޮށް ހުޅުވައިފަ އެވެ.

ބިލިއާޑް އެސޯސިއޭޝަނުން ވެސް އަންނަނީ ރާއްޖޭގައި މި ކުޅިވަރު ތަރައްގީކޮށް ފުޅާކުރަން ގިނަ މަސައްކަތްތަކެއް ކުރަމުންނެވެ. އެގޮތުން މާލޭގެ ބިލިއާޑް ފެސިލިޓީ ތަރައްގީ ކުރުމާ އެކު އެ އަހަރު ވަނީ ގައުމީ މުބާރާތް ބާއްވަން ފަށައިފަ އެވެ. އަދި ރަށްރަށުގައި ބާއްވާ މުބާރާތްތަކުން ފާހަގަ ކޮށްލެވޭ ކުޅުންތެރިންނަށް ގައުމީ މުބާރާތުން ފުރުސަތު ފަހިކޮށްދިނުމުގެ އިތުރުން، ޒުވާން ކުޅުންތެރިން އުފައްދަން ޔޫތު ޑިވެލޮޕްމަންޓް ޕްރޮގުރާމެއް ވެސް ވަނީ ފަށައިފަ އެވެ.