ހިތާމަވެރި ނިމުމެއް: ރަޔާން ވަޅުން ނެގި އިރު އޮތީ މަރުވެފައި

ރަބާތު (ފެބްރުއަރީ 6) - މޮރޮކޯގެ އުތުރުގެ ސަރަހައްދެއްގެ 100 ފޫޓު ފުން ވަޅެއްގެ ތެރެއަށް ވެއްޓުނު ފަސް އަހަރުގެ ކުޑަ ކުއްޖާ ފަސް ދުވަސް ފަހުން، ރޭ ދަންވަރު ވަޅުން ނެގި އިރު މަރުވެފައިވާ ކަމަށް އެ ގައުމުގެ ގަނޑުވަރުން އިއުލާންކޮށްފި އެވެ.

މޮރޮކޯގެ ތަމްރުތު ޓައުނުގައި ހުރި އެ ވަޅު ހަނިވުމުން ރެސްކިއު ޓީމުތަކުން ވަނީ ރަޔާން ނަމަކަށް ކިޔާ ކުއްޖާ ސަލާމަތް ކުރުމަށް ވަޅާ ކައިރިން ބުލްޑޯޒަރުތަކުން އެހެން ވަޅެއް ކޮނެފަ އެވެ. ކުއްޖާ ވަޅުގައި ހުރި ހިސާބާ އެއްވަރަށް ވަޅުކޮނުމަށް ފަހު ދެން މަސައްކަތް ކުރީ ހޮރިޒޯންޓަލްކޮށް ޓަނަލެއް ކޮނެ އެ ކުއްޖާ ސަލާމަތް ކުރުމަށެވެ. ރެސްކިއު ޓީމުން ކުއްޖާ ސަލާމަތް ކުރުމަށް ޓަނަލަށް ވަނީ މެޑިކަލް ޓީމަކާ އެކު އެވެ.

ކުއްޖާ ވަޅުން ނެގުމަށް ފަހު އެ ކުއްޖާގެ ހާލަތާ ގުޅޭ ގޮތުން އެއްވެސް މައުލޫމާތެއް އޭރު ހާމައެއް ނުކުރެ އެވެ. ކުއްޖާ ވަޅުން ނެގުމާ އެކު އެތައް ބައެއްގެ އުފާވެރި ޝުއޫރުތައް ފާޅުކުރަން ފެށި އެވެ. ސޯޝަލް މީޑިއާ އިން ވެސް އެތައް ބަޔަކު އުފާ ފާޅުކުރި އެވެ. ހޭޝްޓެކް #ސޭވްރަޔާން ދިޔައީ ސޯޝަލް މީޑިއާގައި ވަރަށް ބޮޑަށް ޓްރެންޑްވަމުންނެވެ.

ނަމަވެސް އޭގެ މަދު މިނިޓް ކޮޅެއްގެ ތެރޭގައި އެންމެންގެ ހިތްތަކަށް ވެސް އަސަރު ކުރީ ރަޔާން މަރުވެފައިވާ ކަމަށް ގަނޑުވަރުން ނެރުނު ބަޔާނެއްގައި ބުނުމުންނެވެ.

"ރަޔާން އުރާމް ސަލާމަތް ކުރުމަށް ބޮޑު އޮޕަރޭޝަނެއް ހިންގައި ވަޅުން ނެގި ނަމަވެސް، އެ ކުއްޖާގެ ފުރާނަ ސަލާމަތެއް ނުކުރެވުނު. ރަސްގެފާން މުހައްމަދު ވަނީ ރަޔާންގެ ބައްޕަ އާއި މަންމަ އަށް ގުޅުއްވައި ތައުޒިޔާ ވިދާޅުވެފައި،" ގަނޑުވަރުން ނެރުނު ބަޔާނުގައި ބުނެފައިވެ އެވެ.

ވަޅާ ކައިރީގައި ކުޅެން އުޅެނިކޮށް ރަޔާން ވެއްޓުނު ހަނި ވަޅުގެ ފުން މިނުގައި ހުރީ 32 މީޓަރު (104 ފޫޓް) އެވެ. ވަޅުގެ ފުޅާ މިނުގައި ހުންނަނީ 25 ސެންޓިމީޓަރު (9.8 އިންޗި) އެވެ.

ރެސްކިއު ޓީމުތަކުން ވަނީ ވަޅުގެ ތެރެއަށް އެ ކުއްޖާ ހުރި ހިސާބަށް އޮކްސިޖަން މާސްކް އާއި ކާނާ އާއި ފެން ފޯރުކޮށްދީފަ އެވެ.