ވިނަރެސްގެ ލިސްޓު އާއްމުކުރިއިރު ގިނަ ބަޔަކު ޝަރުތު ހަމައެއް ނުވޭ

ހުޅުމާލޭގައި އިމާރާތްކޮށްފައިވާ ވިނަރެސް ފްލެޓްތަކުގެ ވަގުތީ ލިސްޓު މިއަދު އާއްމުކުރިއިރު ގިނަ ބަޔަކު ޝަރުތު ހަމަނުވާ ކަމަށް ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ)ން މިއަދު ބުނެފި އެވެ.

އެޗްޑީސީން މިއަދު ބޭއްވި ނޫސްވެރިންގެ ބައްދަލުވުމުގައި އެ ކުންފުނީގެ މެނޭޖިން ޑިރެކްޓަރު އަހުމަދު އާތިފު ވިދާޅުވީ ފްލެޓްތަކަށް ކުރިމަތިލާން ހުޅުވާލުމުން 1،413 ފަރާތަކުން ފޯމު ހުށަހެޅި ކަމަށެވެ. އެކަމަކު ގިނަ އަދަދެއްގެ ފޯމުތަކުގައި ޑޮކިއުމެންޓް ހަމަނުވާ ކަމަށް އޭނާ ވިދާޅުވި އެވެ.

ވިނަރެސްގެ ވަގުތީ ލިސްޓު ދައްކާ ގޮތުން ޝަރުތު ހަމަވީ 723 މީހުންނެވެ. ކުރިމަތިލީ 690 މީހުން ޝަރުތު ހަމަނުވާ ކަމަށް އެޗްޑީސީން ބުންޏެވެ.

އޭނާ ވިދާޅުވީ ޕްލޭނިން މިނިސްޓްރީން ކަނޑައެޅި ލިސްޓުގައި ހިމެނޭ ފަރާތްތަކުގެ ތެރެއިން ޑޮކިއުމެންޓްތައް ހަމަ ނުވާ ފަރާތްތަކަށް ފަސް ދުވަހުގެ މުއްދަތެއް ދޭން ނިންމާފައިވާ ކަމަށެވެ.

"[ފްލެޓްތަކަށް ކުރިމަތިލާން] ހުޅުވާލީ ހައުސިން މިނިސްޓްރީން ކަނޑައެޅި ކްރައިޓީރިއާތަކަށް. ފުރަތަމަ އެޗްޑީސީން މިބަލަނީ ހައުސިން މިނިސްޓްރީގެ އިޖްތިމާއީ ބޯހިޔާވަހިކަމަށް ކަނޑައަޅާފައިވާ ކެޓަގަރީއަށް ކޮލިފައިވާ ފަރާތްތައް. އެހެންވީމަ 1،413 އެޕްލިކޭޝަންގެ ތެރެއިން 723 އެޕްލިކޭޝަންއަކީ ހައުސިން މިނިސްޓްރީގެ ކްރައިޓީރިއާއަށް ހަމަވާ ފަރާތްތައް،" އޭނާ ވިދާޅުވި އެވެ.

ވިނަރެސް ފްލެޓްތަކަށް ކަނޑައެޅި މައިގަނޑު ޝަރުތަކީ މާލޭ މީހުންނާއި މާލޭގައި ދިރިއުޅޭތާ 15 އަހަރުވެފައިވާ މީހަކަށް ވުމެވެ.

އެޗްޑީސީން ބުނި ގޮތުގައި ވިނަރެސްގެ 1،344 ފްލެޓަށް ހުށަހެޅި ގިނަ ފަރާތްތަކެއްގެ ޝަރުތު ހަމަނުވީ ގިނަ ފޯމުތަކުގެ އަސާސީ ބައެއް ޝަރުތުތައް ހަމަނުވާތީ އެވެ. ވަގުތީ ލިސްޓަށް ޝަކުވާ ހުށަހަޅަން މިއަދުން ފެށިގެން ތިން ދުވަހުގެ މުއްދަތެއް ވަނީ ދީފަ އެވެ.

ޕްލޭނިން މިނިސްޓްރީން ކަނޑައެޅި ލިސްޓުގައި ހިމެނޭ ފަރާތްތަކުގެ މާލީ ގާބިލުކަން ބެލުމަށް ފަހު، ވިނަރެސްގެ ބާކީ ހުރި ފްލެޓްތަކަށް ހުޅުވާލާނެ އެވެ. އެކަމުގެ ތަފްސީލުތައް އާންމު ކުރާނީ މިހާރު ފްލެޓް ލިިބިފައިވާ ވަގުތީ ލިސްޓުގައި ހިމެނޭ ފަރާތްތަކުގެ މާލީ ހާލަތު ބެލުމަށް ފަހު ކަމަށް އެޗްޑީސީން ބުންޏެވެ.

ލިސްޓުގައި ހިމެނޭ ފަރާތްތަކުގެ ތެރެއިން މާލީ ޑޮކިއުމެންޓް ހުށަހެޅުމަށް އޯޕަން ޑޭއެއް އަންނަ މަހުގެ 6 އިން 12 އަށް އޮންނާނެ އެވެ.

އެ މުއްދަތުގެ ތެރޭގައި ޑޮކިއުމަންޓްތައް ފުރިހަމަ ކުރުމަށް ފަހު ދާއިމީ ލިސްޓެއް އާންމު ކުރާނީ އަންނަ އަހަރުގެ ފެބްރުއަރީ މަހުގަ އެވެ. ވިނަރެސް ފްލެޓްތަކަށް އަންނަ އަހަރުގެ އޭޕްރީލްގައި ވަދެވޭ ވަރުވާނެ ކަމަށް އެޗްޑީސީން ބުންޏެވެ.

"ވިނަރެސް" މަޝްރޫއުގައި ހިމެނޭ ހުރިހާ ޓަވަރެއްގައި ވެސް ހުންނާނީ ތިން ކޮޓަރީގެ އެޕާޓްމަންޓްތަކެކެވެ. އެއީ ހަތަރު ވައްތަރެއްގެ އެޕާޓްމަންޓްތަކެކެވެ. އެ ތަނުގައި ހިމެނެނީ މެރީނާ ވިއު އާއި އިނާ ވިއު އަދި އައުޓާ ވިއުގެ އިތުރުން ސްޓޭންޑާޑް ވިއު އެވެ.

މި ތަންތަނުގެ އަގު އުޅޭނީ 2.5 މިލިއަނާއި 2.7 މިލިއަން ރުފިޔާއާ ދެމެދުގަ އެވެ.