ދުނިޔޭގެ އެކި ކަންކޮޅުތަކުގައި ހިނގަމުންދާ ހަމަނުޖެހުންތަކާ އެކު، ދުނިޔޭގެ އިގްތިސާދަށް ކުރިމަތިވެފައިވާ ނުތަނަވަސްކަމުގެ ތެރޭގައި، ދުނިޔޭގެ ބާޒާރުގައި ރަނުގެ އަގު ފުރަތަމަ ފަހަރަށް 5،000 އެމެރިކާ ޑޮލަރަށް ވުރެ މަތިވެއްޖެ އެވެ.
ދުނިޔޭގެ ބާޒާރުގައި ރަން އައުންސެއްގެ އަގު މި ވަގުތު ހުރީ، 5،089.78 އެމެރިކާ ޑޮލަރުގަ އެވެ. އެ އަދަދަށް ދެ ޕަސެންޓުގެ ދަށްވުމެއް އައިސްފައިވަނީ، އިއްޔެ ރަން އައުންސެއްގެ އަގު 5،100.50 ޑޮލަރަށް އެރުމަށްފަހު އެވެ.
އެމެރިކާއަށް ގިނަ ގައުމުތަކުން އެތެރެކުރާ މުދަލުން ނަގާ ޑިޔުޓީ ބޮޑުކުރުމާއި، ސަރަހައްދީ ހަމަނުޖެހުންތަކުގެ ސަބަބުން، މާލީ ބާޒާރަށް ކުރިމަތިވެފައިވާ ނުތަނަވަސްކަމުގެ ސަބަބުން، ރަނަށް އިންވެސްޓުކުރާ މިންވަރަށް ވަނީ ވަރަށް ބޮޑަށް އިތުރުވެފަ އެވެ.
އެއާ އެކު، ދުނިޔޭގެ ބާޒާރުގައި ރަނުގެ އަގު، މިދިޔަ އަހަރު ވަނީ 64 ޕަސެންޓު އުފުލިފަ އެވެ.
މިއީ، 1979 ވަނަ އަހަރަށް ފަހު، ރަނުގެ އަގަށް މިހާބޮޑު އިތުރުވުމެއް އައި ފުރަތަމަ ފަހަރެވެ.
މި އަހަރު ފެށުނު ފަހުން ވެސް، ރަނުގެ އަގު ވަނީ 18 ޕަސެންޓު މައްޗަށް ގޮސްފަ އެވެ.
ރަނުގެ އިތުރުން، ރިހީގެ އަގު ވެސް ވަނީ ރެކޯޑު މިންވަރަކަށް އުފުލިފަ އެވެ.
އެގޮތުން، މިދިޔަ ހުކުރު ދުވަހު، ދުނިޔޭގެ ބާޒާރުގައި ރިހި އައުންސެއް ވަނީ ފުރަތަމަ ފަހަރަށް 100 ޑޮލަރަށް ވުރެ މަތިވެފަ އެވެ.