ދުނިޔޭގެ އެންމެ މަގުބޫލު އެއް ކަލިނަރީ ޓީވީ ޕްރޮގްރާމް ކަމަށްވާ މާސްޓާޝެފް ސްރީލަންކާގެ ހާއްސަ އެޕިސޯޑެއް ރާއްޖޭގައި ޝޫޓްކޮށްފި އެވެ.
އެ އެޕިސޯޑު ރާއްޖޭގައި ޝޫޓްކުރީ މޯލްޑިވްސް ހޮލިޑޭ ކަލެކްޝަންސް (އެމްއެޗްސީ) ގްރޫޕާއި ވިޒިޓް މޯލްޑިވްސްއާ ގުޅިގެންނެވެ.
ވިޒިޓް މޯލްޑިވްސް އިން ބުނީ، އެ އެޕިސޯޑު މިރޭ 10:00 ގައި ޓީވީއެމް އިން ވެސް ގެނެސްދޭނެ ކަމަށެވެ. އެ އެޕިސޯޑުގައި ރާއްޖޭގެ ކެޔުންތަކާއި ސަގާފަތާއި މެހެމާންދާރީ ދައްކުވާދޭނެ ކަމަށް ވިޒިޓް މޯލްޑިވްސް އިން ބުންޏެވެ. އެޕިސޯޑުން މާސްޓާޝެފް ސްރީލަންކާގެ ފަނޑިޔާރުންނާއި، ހޯސްޓް އަދި ބައިވެރިން ރާއްޖެ އައިސް، ރާއްޖޭގެ ރަށްތަކުގެ މާހައުލުގައި ކެއްކުމުގެ ގޮންޖެހުންތަކާ ކުރިމަތިލާ މަންޒަރު ފެންނާނެ ކަމަށް ވިޒިޓް މޯލްޑިވްސް އިން ބުންޏެވެ.
ވިޒިޓް މޯލްޑިވްސް އިން ބުނީ، އޮފިޝަލް ޑެސްޓިނޭޝަން ޕާޓްނަރުގެ ގޮތުގައި އެ ކުންފުނިން އެ ޕްރޮޑަކްޝަނަށް އެއްބާރުލުން ދީފައިވަނީ، މަންޒިލް އިޝްތިހާރުކުރުމުގެ އުކުޅުތައް ޑައިވާސިފައިކޮށް، ކޮންޓެންޓާއި މުނިފޫހިފިލުވުމުގެ ވަސީލަތްތައް މެދުވެރިކޮށް ބައިނަލްއަގުވާމީ އޯޑިއަންސަކާ ހަމައަށް ވާސިލުވުމަށް ކުރަމުންދާ މަސައްކަތުގެ ތެރެއިން ކަމަށެވެ.
ވިޒިޓް މޯލްޑިވްސްގެ މެނޭޖިން ޑިރެކްޓަރު އަބްދުﷲ ޔާސިރު ވިދާޅުވީ، ރާއްޖެއަކީ ރަށްތަކާއި، ކަނޑުފަޅުތަކުގެ އިތުރުން ފުރިހަމަ މެހެމާންދާރީއަށް މުޅި ދުނިޔޭގައި ވެސް މަޝްހޫރު ގައުމެއް ކަމަށާއި ނަމަވެސް ރާއްޖޭގެ ކެއުންތަކާއި ކާބަފައިންގެ ކަލިނަރީ ތަރިކައަކީ ރާއްޖޭގެ ވާހަކަ ދުނިޔެއަށް ކިޔައިދިނުމަށް ލިބޭ ވަރަށް މުހިންމު އިތުރު ވަސީލަތެއް ކަމަށެވެ.
"މާސްޓާޝެފަކީ މީހުން ދަންނަ އަދި ގަޔާވާ ފޯމެޓެއްގެ ޒަރީއާއިން ދިވެހި ރަހަތަކާއި، ސަގާފަތާއި އަދި އެކަމުގެ ފަހަތުގައިވާ މީހުން ސަރަހައްދީ ފުޅާ އޯޑިއަންސަކަށް ގެނެސްދިނުމަށް ލިބުނު ފޯރިގަދަ ޕްލެޓްފޯމެއް،" އޭނަ ވިދާޅުވި އެވެ.