ނަޒާކީ އޮންލައިންއާ މެދު ބޮޑެތި ޝަކުވާތަކެއް

ނަޒާކީ އޮންލައިން އިން ތަކެތި ގަތް ގިނަ ބަޔަކަށް ވަނީ ހިތި ތަޖުރިބާއެއް ކުރަން ޖެހިފަ އެވެ. ޕްރީ-އޯޑާކޮށް، ފައިސާ ދައްކާއި އެތައް ދުވަހެއް ވީ އިރު ވެސް ތަކެތި ނުލިބި އަދި ރީފަންޑް ލިބޭ ގޮތް ނުވެގެން ޝަކުވާ ބޮޑުވެއްޖެ އެވެ.

ނަޒާކީ އޮންލައިން އިން މެދުވެރިކޮށް މެލޭޝިޔާއިން ގިނަ އަދަދެއްގެ ސާމާނަށް ޕްރީ-އޯޑާ ނެގި އެވެ.

އެނގިފައިވާ ގޮތުގައި ނަޒާކީ އޮންލައިން ނިސްބަތްވަނީ ކުރީގެ މަޝްހޫރު ވިޔަފާރިވެރިޔާ ނަޒާކީ މުހައްމަދު ޒަކީގެ އާއިލާގެ ވިޔަފާރި، ނަޒާކީ ޓްރޭޑަށެވެ. ޒަކީއަކީ 1985 ގައި އުފައްދައި، ހާޑްވެއާ އާއި ކޮންސްޓްރަކްޝަން އަދި ދަތުރުފަތުރުގެ ދާއިރާއާ ގުޅޭ ވިޔަފާރިތައް ފުޅާ ދާއިރާއެއްގައި ހިންގެވި ބޭފުޅެކެވެ.

ނަޒާކީ އޮންލައިން މެދުވެރިކޮށް ތަކެތި ގަނެފައިވާ އަހުމަދު ޝިރްހާން ބުނީ 15،000ރ. ގެ ތަކެއްޗަށް އޯޑަރުކުރި ކަމަށެވެ. އެކަމަކު އެ އެއްޗެހި ނުލިބޭ ތަނުގައި އޭނާ ދެއްކި ފައިސާ ވެސް އަދި ހަމައަށް ނުލިބޭ ކަމަށް ބުންޏެވެ.

"ސޯފާއަކާއި ބައެއް ވާޑްރޯބް އޮގަނައިޒާ ގަތީ. އަދި ލިބުނީ ދެއްކި ފައިސާގެ އެއް ބައި،" ޝިރުހާން ބުންޏެވެ.

ނަޒާކީ އޮންލައިން އަކީ ޕްރީ އޯޑާކޮށްގެން މެލޭޝިޔާއިން ރާއްޖެއަށް ތަކެތި ފޯރުކޮށްދޭ ބައެކެވެ. އެގޮތުން ދުނިޔޭގެ މަޝްހޫރު އިކެއާއިން ހެޔޮ އަގުގައި ފަރުނީޗަރާއި ގޭތެރެއަށް ބޭނުންވާ ސާމާނުގެ އިތުރުން މަޝްހޫރު ބްރޭންޑްތަކުގެ ހެދުމާއި އެހެނިހެން ސާމާނު ވެސް ފޯރުކޮށްދެ އެވެ. އެކަމަކު މިދިއަ އަހަރު އޯޑަރުކޮށް ފައިސާ ދެއްކި ބައެއް މީހުން މިހާރު ތިބީ ކަންބޮޑުވުމެއްގަ އެވެ.

ނަޒާކީ އޮންލައިން އިން ވިޔަފާރިކުރި ޝަހްލާ އަހުމަދު ބުނި ގޮތުގައި މިދިއަ އަހަރުގެ އޮކޯޓަރު މަހު 7،000ރ އަށް ގަތް ކަބަޑު އަދިވެސް ނުލިބެ އެވެ.

"ރީފަންޑަށް އެދި އަދިވެސް ހަބަރެއް ނުވޭ. އެމީހުންގެ ވައިބާ ނަންބަރު ވެސް މިހާރު ވަނީ ޑީއެކްޓިވޭޓްކޮށްފައި،" އޭނާ ބުންޏެވެ.

ޝަހުލާ އާއި ޝިރްހާނުގެ އިތުރަށް ވެސް ގިނަ އަދަދެއްގެ ބަޔަކު ނަޒާކީ އޮންލައިނާ ގުޅޭ ގޮތުން ސޯޝާލް މީޑިއާގައި ގެންދަނީ ހިތްހަމަނުޖެހުން ފާޅުކުރަމުންނެވެ. ބައެއް ކަސްޓަމަރުން ވަނީ ފައިސާ ނުލިބުނު މައްސަލަ ފުލުހުނަށް ވެސް ހުށަހަޅައިފަ އެވެ.

ބައެއް މީހުން ބުނާ ގޮތުގައި ތަކެތި ނުލިބުމުން ރީފަންޑަށް އެދުނުތާ ވެސް އެތައް މަހެއް ވެއްޖެ އެވެ. އަދި ވައިބަށް ކުރާ މެސެޖްތަކަށް ވެސް މިހާރު ޖަވާބު ނުލިބޭ ކަމަށް އޭގެ ތެރެއިން ބައެއް މީހުން ބުނެ އެވެ.

"މިދިޔަ ޑިސެމްބަރު މަހުގެ 28 ވަނަ ދުވަހު ރީފަންޑަށް އެދެވޭނެ ކަމަށް ބުނި. އެކަމަކު އަދިވެސް ރީފަންޑެއް ނުލިބޭ. މިހާރު މަހަކަށް ވުރެ ގިނަ ދުވަސް ވެއްޖެ. އެމީހުންނަށް މެސެޖުކުރުމުން ރިފްލައި ވެސް ނުކުރޭ،" ފޭސްބުކްގައި މީހަކު ކޮށްފައިވާ ޕޯސްޓެއްގައިވެ އެވެ.

ނަޒާކީ އޮންލައިން އިން މިހާރު އެއްވެސް ޖަވާބެއް ނުދޭތީ ބައެއް މީހުންގެ ނަޒަރުގައި އެއީ "ބޮޑު ސްކޭމްއެކެ"ވެ.

ނަޒާކީ އޮންލައިންގެ ބަސް: މާލީ އުނދަގޫތަކާއި ކޮވިޑް

ނަޒާކީ އޮންލައިން ޕޭޖަށް "މިހާރު" އިން ކުރި ސުވާލުތަކަށް އީމެއިލް މެދުވެރިކޮށް ވަނީ ޖަވާބުތަކެއް ދީފަ އެވެ. ޖަވާބު ދިން މީހާގެ ނަމަކަށް އޮތީ "ޒައިނާ" އެވެ. އޭނާއަކީ މެނޭޖަރު ކަމަށް ވެސް ލިއެފައިވެ އެވެ. އެކަމަކު ފުރިހަމަ ނަމެއް ނުޖަހަ އެވެ.

އޭނާ ބުނި ގޮތުގައި ވިޔަފާރިއަށް ބޮޑެތި ހުރަސްތަކެއް ކުރިމަތިވީ ކޮވިޑްގެ ހާލަތުގެ ސަބަބުންނެވެ. އެގޮތުން މިދިޔަ ފަސް މަހު ވިޔަފާރިއަށް ވަރަށް ބޮޑު ދަތިތަކެއް ކުރިމަތިވި ކަމަށް ބުންޏެވެ. އެންމެ ބޮޑު އެއް ސަބަބަކީ ކޮވިޑާ ގުޅިގެން މެލޭޝިޔާއިން ރާއްޖެއަށް ތަކެތި ފޮނުވުމުގައި ހުރި ދަތިތައްކަން ފާހަގަކުރި އެވެ. އޭގެ އިތުރުން ރާއްޖެއިން ޑޮލަރު ހޯދުމުގައި ކުރިމަތިވި އުނދަގޫތަކުން ވެސް ވިޔަފާރިއަށް ވަރަށް ބޮޑު ހުރަހެއް އެޅުނު ކަމަށް އޭނާ ބުންޏެވެ.

"ޑޮލަރު ރޭޓް 15.24 އިން 19ރ. އަށް ކުއްލިއަކަށް އަރައިގެން ދިޔުމުން ތަކެތި ގެންނަން ދަތިތައް ދިމާވި. ސަބަބަކީ އޭރު ކަސްޓަމަރުން ޕޭމެންޓް ދައްކާފައި ހުރީ 15.24ރ. ގެ ރޭޓުން،" ޒެއިނާގެ އީމެއިލްގައި ލިއުނެވެ.

ކޮވިޑާ ގުޅިގެން ރާއްޖޭގެ ޓޫރިޒަމް ހުއްޓި، ޑޮލަރަށް ޖެހުމާ އެކު ބީއެމްއެލްގެ ކާޑުތަކުން ޑޮލަރުން މުއާމަލާތްކުރުމުގައި އައި ހުއްޓުންތައް ވެސް، ނަޒާކީ އޮންލައިނުން ނަގަނީ، އެ މީހުންގެ ވިޔަފާރިއަށް އެޅުނު ހުރަހެއްގެ ގޮތުގަ އެވެ.

ބީއެމްއެލްގެ ކާޑަކުން މަހަކު ކުރެވޭނީ 250 ޑޮލަރުގެ މުއާމަލާތް ކަމަށް، ގައުމީ ބޭންކުން ހަމަޖެއްސި އެވެ.

އީމެއިލްގައި ޒައިނާ ބުނި ގޮތުގައި ނަޒާކީގެ އަގު ވައްޓާލަން ބައެއް ކަސްޓަމަރުން ސޯޝަލް މީޑިއާގައި "ދޮގު މައުލޫމާތު" ފެތުރުމަކީ ވެސް، ކުރިމަތި ބޮޑު މައްސަލައެކެވެ.

ނަޒާކީ އޮންލައިނުން ބުނީ ކޮވިޑްގެ ކުރިން ކަސްޓަމަރުންނަށް ބަރާބަރަށް ތަކެތި ފޯރުކޮށްދިން ކަމަށެވެ. ކޮވިޑާ ގުޅިގެން ކުރިމަތިވި ލަސްވުންތަކުގައި ވެސް އޮންނަ އުސޫލުގެ ތެރެއިން ކަސްޓަމަރުންނަށް ތަކެތި ފޮނުވައިދީ އަދި ރީފަންޑް ބޭނުންވާ މީހުންނަށް އެކަން ވެސް ހަމަޖައްސައިދެމުން އަންނަ ކަމަށް، ޒައިނާގެ އީމެލްއިން ގައި ބުންޏެވެ. ނަމަވެސް އޭނާ ބުނީ މަދު ބައެއް ކަސްޓަމަރުން ސޯޝަލް މީޑިޔާގައި ކުންފުނީގެ އަގު ވައްޓާލައި، ފެތުރި ވާހަކަތަކުގެ ސަބަބުން ގިނަ ކަސްޓަމަރުން ހާސްކަމެއްގެ ތެރެއަށް ގެންގޮސް، ގިނަ ބަޔަކު ރީފަންޑަށް އެދެން ފެށި ކަމަށެވެ.

"ނަޒާކީން މަސައްކަތް ކުރަނީ ޑިލޭތަކާ އެކު ވެސް ކަސްޓަމަރުންނަށް ރީފަންޑު ދޭން. އެކަން އެގޮތަށް ކޮށްދޭނެ ކަމުގެ ފުރިހަމަ ޔަގީންކަން ކަސްޓަމަރުންނަށް ދެން،" ޒައިނާ ބުންޏެވެ.

އެކަމަކު "މިހާރު"އާ ވާހަކަދެއްކި ބައެއް ކަސްޓަމަރުންގެ ވިސްނުން ތަފާތެވެ. އެ މީހުން ބުނާ ގޮތުގައި ކޮވިޑްގެ ދަތި ހާލަތުގައި ދެއްކި ފައިސާއަށް ތަކެތި ނުލިބި އަދި ރިފަންޑް ހޯދަން އުނދަގޫ ވުމަކީ ކުރިމަތީގައި އޮތް ބޮޑު މައްސަލައެކެވެ. އެހެންކަމުން ވީހާވެސް އަވަހަކަށް ރީފަންޑް ދިނުމަކީ، ނަޒާކީ އޮންލައިންގެ ޒިންމާއެއް ކަމަށް ވެސް، އެ ކަސްޓަމަރުން ބުންޏެވެ.