ސަންޖޭ ދަތުގެ ހަޔާތުގެ މައްޗަށް ބިނާކޮށް ގެނެސްދޭ ފިލްމްގައި ރަންބީރު ކަޕޫރާ އެކު މަސައްކަތްކޮށްފައި، ޑައިރެކްޓަރު ރާޖްކުމާރް ހިރާނީ ބުނަނީ އަދިވެސް ރަންބީރާ އެކު މަސައްކަތް ކުރަން ބޭނުންވާ ކަމަށެވެ. ހިރާނީ މިހާތަނަށް ގެނެސް ދިން ފިލްމްތަކަށް ބަލާ އިރު، އެއް އެކްޓަރުންތަކަކާ އެކު މަސައްކަތްކޮށްފައިވާ ފާހަގަވެ އެވެ.
އެގޮތުން އޭނާ ސަންޖޭއާ އެކު "ޕަރިނީތާ" އާއި "މުންނާބާއީ" ގެ ފިލްމްތަކާއި އާމިރް ހާނާ އެކު ގެނެސް ދިން "3 އިޑިއަޓްސް" އާއި "ޕީކޭ" ފާހަގަކޮށްލެވެ. ރަންބީރާ އެކު ސަންޖޭގެ ބައޮޕިކްގައި މަސައްކަތް ކުރުމުގެ ކުރިން ހިރާނީ ވަނީ 2014 ގައި ރިލީޒް ކުރި "ޕީކޭ" ރަންބީރުގެ ވަރަށް ކުރު، ހާއްސަ ފެނިލުމެއް ހިމަނައިފަ އެވެ.
ޖޫން މަހުގެ 29 ގައި ރިލީޒް ކުރާ ސަންޖޭގެ ބައޮޕިކްގައި، ރަންބީރު ލައްވައި ސަންޖޭގެ ރޯލް ކުޅުވާފައި ލިބުނު ހިތްހަމަޖެހުމާ އެކު ހިރާނީ ބުނަނީ އަދި ނުފުދޭ ކަމަށެވެ.
"ރަންބީރަކީ ވަރަށް މޮޅު އެކްޓަރެއް. އޭނާއާ އެކު މަސައްކަތްކޮށްލުމަކީ ވަރަށް ގަޔާވި ކަމެއް. އަހަރެން އަދިވެސް ބޭނުން އޭނާ ލައްވައި ފިލްމް ކުޅުވަން،" އިންޑިއާގެ އެންމެ ކުޅަދާނަ ޑައިރެކްޓަރުންގެ ތެރޭގައި ހިމެނޭ ހިރާނީ ބުންޏެވެ.
އޭނާ ބުނީ ސަންޖޭގެ ރޯލް ވަރަށް ފުރިހަމަ އަށް ރަންބީރް ދައްކުވައި ދީފައިވާ ކަމަށާއި އޭނާގެ ޑެޑިކޭޝަނަން ފެނިފައި ވެސް އަންތަރީސްވި ކަމަށެވެ. މި ފިލްމްގައި ސަންޖޭގެ އެކި ދުވަސްވަރު ދެއްކުމަށް ރަންބީރު ވަނީ ހަށިގަނޑަށް ވެސް ބޮޑެތި ބަދަލުތަކެއް ގެނެސްފަ އެވެ.
ހިރާނީ ބުނީ ފިލްމް ބަލައިލުމުން އޭނާ ބުނާ ވާހަކައިގެ ހަގީގަތް ބެލުންތެރިންނަށް ކަށަވަރުވެގެން ދާނެ ކަމަށެވެ. އަދި ރަސްމީކޮށް ނަން ވެސް އިއުލާންކޮށްފައި ނުވާ ސަންޖޭގެ ބައޮޕިކްގެ ނަމާއި ޓްރެއިލާ އަންގާރަ ދުވަހު ބެލުންތެރިންނަށް ދޫކޮށްލާނެ އެވެ. ބައެއް ރިޕޯޓްތައް ބުނާ ގޮތުން ފިލްމްގެ ނަމަކީ "ސަންޖޫ" އެވެ.
މި އަހަރުގެ އެންމެ އުންމީދީ އެއް ފިލްމްގެ ކާސްޓުންގެ ތެރޭގައި އަނުޝްކާ ޝަރްމާ، ސޯނަމް ކަޕޫރް، މަނީޝާ ކޮއިރަލާ، ޕަރޭޝް ރާވަލް، ދިއާ މިރްޒާ، ވިކޯ ކޯޝަލް، ޖިމް ސަރްމް، ތައްބޫ އަދި ޓީވީ ބަތަލާ ކަރިޝްމާ ތަންނާ ހިމެނެ އެވެ.
މި ފިލްމްވެގެން ދާނީ މިދިޔަ އަހަރު ރިލީޒް ކުރި ފްލޮޕް ފިލްމް "ޖައްގާ ޖާސޫސް" އަށް ފަހު، ރަންބީރް ފެނިގެންދާ ފުރަތަމަ ފިލްމަށެވެ. ބައެއް މީހުން ބުނާ ގޮތުގައި ހިރާނީގެ ފިލްމާ އެކު، ރަންބީރުގެ ވިދުން އަނެއްކާ ވެސް ގަދަވެގެން ދާނެ އެވެ.