"އެވެޓާ" ގެ ސީކްއެލްތައް ރިލީޒް ކުރުން ފަސްކޮށްފި

އަހުމަދު އަދްޝަން، މިހާރު

10 މެއި 2019 - 08:56

ޖޭމްސް ކެމެރެންގެ "އެވެޓާ" ގެ ސީކްއެލްތަކުގެ އިންތިޒާރުގައި ތިބި މީހުންގެ އިންތިޒާރީ ދިގުކޮށް ސީކްއެލްތައް ގެނެސްދޭ ތާރީހުތަކަށް ބަދަލުތަކެއް ގެނެސްފި އެވެ.

ދެހާސް ނުވައެއްގައި ރިލީޒް ކުރި "އެވެޓާ" ގެ ހަތަރު ބައެއް ގެނެސް ދޭން ނިންމާފައިވާ އިރު، ކުރިން އޮތް ގޮތުން ނަމަ އަންނަ އަހަރު "އެވެޓާ 2" ސިނަމާ އަށް އަންނާނެ އެވެ. އެކަމަކު ތާރީހުތަކަށް ގެނައި ބަދަލުތަކާ ގުޅިގެން "އެވެޓާ 2" ރިލީޒް ކުރާނީ ޑިސެމްބަރު، 17، 2021 ގަ އެވެ.

ކުރިން ތާވަލުކޮށްފައިވާ ގޮތާ ހިލާފަށް "އެވެޓާ 3" ޑިސެމްބަރު، 17، 2021 އިން ޑިސެމްބަރު، 22، 2023 އަށް ވަނީ ފަސްކޮށްފަ އެވެ. އަދި "އެވެޓާ 4" ރިލީޒް ކުރާނީ ޑިސެމްބަރު، 19، 2025 ގަ އެވެ. ކުރިން އެ ފިލްމު ރިލީޒްކުރާ ގޮތަށް އޮތީ ޑިސެމްބަރު، 20، 2024 ގަ އެވެ.

"އެވެޓާ 5" ޑިސެމްބަރު، 19، 2025 އިން މިހާރު ވަނީ ޑިސެމްބަރު، 17، 2027 އަށް ފަސްކޮށްފަ އެވެ.

Now scheduled to land on Pandora December 17, 2021 pic.twitter.com/d21QmCwiHC
— Avatar (@officialavatar) May 7, 2019

ވެރައިޓީން ބުނި ގޮތުގައި "އެވެޓާ" ގެ ކުރިއަށް ހުރި ބައިތައް ފަސްކުރަން ނިންމީ ޑިޒްނީ އާއި ލޫކަސް ފިލްމްސް އިން ބޮޑު ބަޖެޓްތަކުން ގެނެސްދޭ "ސްޓާ ވޯސް" ސީރީޒްގެ އިތުރު ތިން ފިލްމެއް ގެނެސް ދޭން ނިންމުމާ ގުޅިގެންނެވެ. އެއީ މި އަހަރުގެ ޑިސެމްބަރުގައި ގެނެސްދޭ "ސްޓާ ވޯސް: ދަ ރައިޒް އޮފް ސްކައިވޯކާ" ނުލަ އެވެ.

އެގޮތުން އަލަށް އިއުލާން ކުރި ތިން ފިލްމުގެ ތެރެއިން ފުރަތަމަ ބައި ތާވަލުކޮށްފައި ވަނީ ޑިސެމްބަރު، 16، 2022 އަށެވެ. ދެވަނަ ފިލްމު ޑިސެމްބަރު، 20، 2024 އަށް ތާވަލުކޮށްފައިވާ އިރު، ތިން ވަނަ ފިލްމު ރިލީޒް ކުރާނީ ޑިސެމްބަރު، 18، 2026 ގަ އެވެ.

މީގެ 10 އަހަރު ކުރިން ރިލީޒް ކުރި "އެވެޓާ" އަކީ މިހާތަނަށް ބޮކްސް އޮފީހުގައި އެންމެ ބޮޑު އާމްދަނީއެއް ހޯދި ފިލްމެވެ. އެ ފިލްމަށް 2.788 ބިލިއަން ޑޮލަރު ލިބިފައިވެ އެވެ.