މިދިޔަ އަހަރު ރިލީޒްކުރި ކާމިޔާބު ތަމަޅަ ފިލްމު "ކައިތީ" ގެ ހިންދީ ރިމެކްގެ ބަތަލުގެ ރޯލުން ފެންނާނީ ރިތިކް ރޯޝަން ނުވަތަ ރަންވީރު ސިންގް ކަމަށް ރިޕޯޓްތައް ބުނެފި އެވެ.
ލޮކޭޝް ގަނަގަރާޖް ޑައިރެކްޓްކޮށް، ކާތީ ބަތަލުގެ ރޯލް ކުޅެފައިވާ "ކައިތީ" އަކީ އެކްޝަން ތުރިލާއެކެވެ. މީގެ މައިގަނޑު ޕްލޮޓަކީ ބައްޕައަކާއި އަންހެން ދަރިއެއްގެ ވާހަކަ އެވެ. ފިލްމުގެ ކާސްޓުންގެ ތެރޭގައި ނަރައިދާ އާއި ދީނާ ވެސް ހިމެނެ އެވެ.
ބޮކްސް އޮފީހުގައި 105 ކްރޯޑް ރުޕީސް (18 މިލިއަން ޑޮލަރު) ގެ އާމްދަނީއެއް ހޯދި "ކައިތީ" ގެ ހިންދީ ފިލްމު ބެލުންތެރިންނަށް ގެނެސްދޭނީ ރިލައިންސް އެންޓަޓައިންމަންޓާއި ތަމަޅަ ފިލްމު ވެސް ގެނެސްދިން ޑްރީމް ވޮރިއާޒް ޕިކްޗާޒް ގުޅިގެންނެވެ.
މި ފިލްމާ ބެހޭ ގޮތުން ރިލައިންސް އެންޓަޓައިންމަންޓްގެ ސީއީއޯ ޝބާސިޝް ސަރުކާރް "ކައިތީ" އަކީ ވަރަށް ޝައުގުވެރި ފިލްމެއް ކަމަށާއި މި ފިލްމުގެ ހިންދީ އޯޑިއަންސަށް ގެނެސްދޭން ފުރުސަތު ލިބުމަކީ ވަރަށް ބޮޑު ހިތްހަމަޖެހުމެއް ކަމަށެވެ. އަދި ވަރަށް ފުރިހަމަ ފިލްމެއްގެ ގޮތުގައި "ކައިތީ" ގެނެސްދޭން މަސައްކަތްކުރާނެ ކަމަށް ބުންޏެވެ.
ހިންދީ ފިލްމު ވެސް ޑައިރެކްޓްކުރާނީ އޮރިޖިނަލް ފިލްމު ޑައިރެކްޓްކުރި ލޮކޭޝް އެވެ. ނަމަވެސް ފިލްމުގެ ބަތަލުގެ ރޯލުން ރިތިކް ނުވަތަ ރަންވީރު ފެނިދާނެ ކަމަށް ބުނާ ވާހަކަތައް އަދި ރަސްމީކޮށް ކަށަވަރެއް ނުވެ އެވެ.
ފިލްމުގެ ޓީމުން ބުނީ ކާސްޓުން ނެގުމުގެ މަސައްކަތް މިހާރު ކުރިއަށްދާ ކަމަށާއި އެކަން ވަރަށް އަވަހަށް އިއުލާންކުރާނެ ކަމަށެވެ.