ޑައިރެކްޓަރު އަލީ އައްބާސް ޒަފަރާއި ޒީ ސްޓޫޑިއޯސް ގުޅިގެން "މިސްޓަ އިންޑިއާ" ގެ ނަމުގައި ޓްރިލޮޖީއެއް ހަދަން ނިންމާފައިވާތީ އެކަމާ ހިތްހަމަނުޖެހިގެން އޮރިޖިނަލް ފިލްމުގެ ޑައިރެކްޓަރު ޝޭކަރް ކަޕޫރް ކަންްބޮޑުވުންފާޅުކޮށްފި އެވެ.
"މިސްޓަ އިންޑިއާ" އަކީ އޭނާ މީގެ 33 އަހަރު ކުރިން 1987 ގައި ގެނެސްދިން ވަރަށް ކާމިޔާބު ސައިންސް ފިކްޝަން ފިލްމެކެވެ. ބޯނީ ކަޕޫރް ޕްރޮޑިއުސްކޮށްފައިވާ "މިސްޓަ އިންޑިއާ" ގެ ލީޑް ރޯލް ކުޅެފައި ވަނީ މަރުވެފައިވާ، ބޯނީގެ އަންހެނުން އަދި ކުރީގެ ބަތަލާ ސްރީދޭވީ އާއި ބޯނީގެ ކޮއްކޮ އަނިލް ކަޕޫރެވެ.
"މިސްޓަ އިންޑިއާ" ގެ ނަމުގައި ޓްރިލޮޖީއެއް ހަދާކަން ކަށަވަރުކޮށް ދެމުން "ބާރަތު" އާއި "ޓައިގާ ޒިންދާ ހޭ" ފަދަ ފިލްމުތައް ގެނެސްދިން އަލީ ކުރި ޓްވީޓެއްގައި ބުނީ އެ ފިލްމު ހަދަން ލިބުމަކީ ކޮނޑުގައި އެޅުނު ވަރަށް ބޮޑު ޒިންމާއެއް ކަމަށެވެ. އަދި މިހާރު އޭގެ ސްކްރިޕްޓްގެ މަސައްކަތްކުރަމުން އަންނަ ކަމަށާއި އޭގެ ފައިނަލް ޑްރާފްޓް ނިމުމާ އެކު ފިލްމަށް ކާސްޓުން ނެގުމުގެ މަސައްކަތް ފަށާނެ ކަމަށް ބުންޏެވެ.
ބައެއް މީޑިއާތަކުން ރިޕޯޓްކޮށްފައިވާ ގޮތުގައި އަލީގެ "މިސްޓަ އިންޑިއާ" ގައި ޓައިޓްލް ރޯލް ކުޅޭނީ ރަންވީރު ސިންގެވެ.
މި ފިލްމުގެ ވާހަކަ މީޑިއާތަކަށް ތިލަވުމާ ގުޅިގެން ޝޭކަރް ކުރި ޓްވީޓްތަކެއްގައި ބުނީ އޭނާ ހެދި ފިލްމެއްގެ ނަމުގައި އެހެން ބަޔަކު ފިލްމެއް ހަދަން ނިންމި އިރު، އެކަމާ ބެހޭ ގޮތުން އެއްވެސް ބަޔަކު އޭނާއާ ވާހަކަ ދައްކާފައި ނުވާ ކަމަށެވެ. އެހެންވެ ބައެއްގެ ވާހަކަ އާއި އޭގެ ކެރެކްޓާތަކަށް ހުއްދަ ނެތި އެހެން ބަޔަކަށް ފިލްމެއް ނެހެދޭނެ ކަމަށް ވެސް ބުންޏެވެ.
ޝޭކަރްގެ އިތުރު ޓްވީޓެއްގައި ބުނީ "މިސްޓަ އިންޑިއާ" ގެ 3ޑީ ވާޝަނެއް ހަދަން ވަރަށް ބުރަކޮށް މަސައްކަތްކުރި ކަމަށާއި އެކަމަކު ޕްރޮޑިއުސަރު ބޯނީ އެކަން ހުއްޓައިލީ ކަމަށެވެ.
ނަމަވެސް "މިސްޓަ އިންޑިއާ" ގެ ޓްރިލޮޖީއާ ބެހޭ ގޮތުން އޭނާ އަދި އެއްވެސް ވާހަކައެއް ނުދައްކަ އެވެ. ބޯނީ މިދިޔަ އަހަރު ވަނީ ފިލްމުގެ ރިބޫޓް ވާޝަނެއް ހަދާނެކަމަށް ބުނެފަ އެވެ. ޒީ ސްޓޫޑިއޯސް އާއި ބޯނީއާ ދެމެދު އަބަދު ވެސް ވަރަށް ގާތްގުޅުމެއް އޮންނަ އިރު، އޭނާ މިހާރު ވެސް އަންނަނީ އެ ސްޓޫޑިއޯއާ ގުޅިގެން ފިލްމެއް ހެދުމުގެ މަސައްކަތް ކުރަމުންނެވެ. އެއީ މި އަހަރުގެ ޑިސެމްބަރު 11 ގައި ރިލީޒްކުރާ އަޖޭ ދޭވްގަންގެ "މައިދާން" އެވެ.
"މިސްޓަ އިންޑިއާ" ގެ ޓްރިލޮޖީއާ ގުޅިގެން ޝޭކަރު ހިތްހަމަނުޖެހުން ފާޅުކުރި ވާހަކަ މީޑިއާތަކުން ގެނެސްދިނުން ބުނީ ކަންބޮޑުވީ ނޫން ކަމަށާއި އޭނާ ހުރީ މިކަމާ އަންތަރީސްވެފައި ކަމަށެވެ.