ކާތިކްގެ "ފްރެޑީ" އަށް ކެޓްރީނާ

އަރަމުން އަންނަ ޒުވާން އެކްޓަރު ކާތިކް އާރިޔަން ސޮއިކޮށްފައިވާ ފިލްމު "ފްރެޑީ" ގެ ބަތަލާގެ ރޯލު ކެޓްރީނާ ކައިފަށް ހުށަހަޅާފައިވާ ކަމަށް ރިޕޯޓްތައް ބުނެފި އެވެ.

މި ދެ ތަރިން އަދި އެކީގައި ފިލްމެއްގެ މަސައްކަތްނުކުރާތީ މިއީ ބެލުންތެރިންނަށް ސްކްރީނުން ފެންނާނެ އާ ޖޯޑަކަށް ވާނެ އެވެ. ފިލްމީ ޚަބަރުތައް ގެނެސްދޭ ނޫސްތަކުން ބުނީ "ފްރެޑީ" ގެ ބަތަލާގެ ރޯލު ކެޓްރީނާ އަށް ހުށަހެޅުމުން އެ ގަބޫލުކޮށްފައިވާ ކަމަށާއި އެކަމަކު އޭނާ ވަރަށް އަވަހަށް ޝޫޓިން ފަށަން ޖެހިފައި ހުރި އެހެން ޕްރޮޖެކްޓްތަކެއް ހުރުމުން ފިލްމަށް ވަގުތު ހުސްކުރާނެ ގޮތަކާ ބެހޭ ގޮތުން މިހާރު ފިލްމުގެ ޓީމާ އެކު މަޝްވަރާތައް ކުރިއަށްދާ ކަމަށެވެ.

"ފްރެޑީ" އަކީ ޝާހްރުކް ޚާން ރެޑް ޗިލީޒް އެންޓަޓައިންމަންޓުން ޕްރޮޑިއުސްކުރާ ފިލްމެކެވެ.

ދެހާސް ނަވާރައިގައި "ބާރަތު" ކުޅުނު ކެޓްރީނާ މި ވަގުތު އަންނަނީ "ފޯންބޫތު" ގެ މަސައްކަތްކުރަމުންނެވެ. އަދި އެޕްރީލް މަހުގެ ތެރޭގައި ޑައިރެކްޓަރު ސްރީރާމް ރަގްވަންގެ ފިލްމެއްގެ ޝޫޓިން ފަށަން ކެޓްރީނާ ހަމަޖެހިފައިވާ އިރު، އަލީ އައްބާސް ޒަފަރުގެ ސުޕަހީރޯ ފިލްމު "ސުޕަ ސޯލްޖާ" އަދި ސަލްމާންގެ "ޓައިގާ 3" އަކީ ވެސް ވަރަށް އަވަހަށް ޝޫޓިން ފަށަން ތައްޔާރުވަމުން އަންނަ ފިލްމެކެވެ.

ކާތިކް ދާދި ފަހުން "ދަމާކާ" ގެ ޝޫޓިން ނިންމައިލި އިރު، މިދިޔަ އަހަރު ޝޫޓިން ފަށައި މަސައްކަތް ހުއްޓިފައި އޮތް ދެ ފިލްމެއް އޭނާގެ އަތުގައި އެބައޮތެވެ. އެއީ "ދޯސްތާނާ 2" އާއި "ބޫލް ބުލައްޔާ 2" އެވެ.

ރޮމޭންޓިކް ކޮމެޑީއެއްގެ ގޮތުގައި ހަދާ "ފްރެޑީ" އަކީ އަޖޭ ބާލް ޑައިރެކްޓްކުރާ ފިލްމެކެވެ. "ބީއޭ ޕާސް" ގެނެސްދިން ޑައިރެކްޓަރުގެ އެންމެ ފަހުގެ ފިލްމަކީ 2019 ގެ "ސެކްޝަން 375" އެވެ.

އަޖޭ "ފްރެޑީ" އަށް ތައްޔާރުވާން ފަށާފައި މި ވަނީ ޑައިރެކްޓަރު އަނޫރާގް ކެޝަޕް 2013 ގައި ގެނެސްދިން "އަނގްލީ" ގެ ސީކްއެލްއެއް ވެސް ހަދަން ނިންމާފައިކަން އިއުލާންކޮށްފައި ވަނިކޮށެވެ. އެކަމަކު އެ ޕްރޮޖެކްޓް މިހާރު އޮތީ ފަސްކޮށްފަ އެވެ.